Malakiyasarini kuku
Malakiyasarini yandarangu anoo pakich kamanchintspa
¿Chakaja anoo yandarang?
Hebrewshuch kuk Malají átuch, Nuw kamanimapantana átu atiya. Ashirucha, Malakiyasarini kuku atitaatini, itaru ¿chakamasaja kaapanaari tputsi suru? Izuuru yasamaam pinasakaniya. ¿Kamapari suru Malakiyasaya? Ashiriya, minamari tputs nee kirak yandarangiya. Malakiyasparee suruya. Apanll waana kamachtaku, uwsha yandarangiya.
Yuwapur Nehemiyasarini taarangu anpur yandarangiya. Malakiyasarini nee kiraka yandarangu, anumunsha Nehemiyasarini tputsee waneerangu, Utaáchichsha tputs mangooneersin, Apanllee kuk kis payurangana.
¿Chakaama yandarang?
Utaáchcheem tputs yandarangiya. Itaru, anpur apanllpansha nda wanasir taarangsin, Apanllee kuk kapeetarangsin, anumandsha Malakiyasarini apanllpanee kizpur waneerangiya. ¿Mayaamsha Apanllshuri pang' yutarit chinaksa? ¿Mayaamsha tputsee nda tatsamooru napaksa? ántar ashirangiya. Apanllpanee kapung waneerangiya.
¿Mayaamaja yandarang?
Utaáchich tputs kapung mang' mantsarangusin, nda wanasir taamaam zandarangana. ¿Antaati Apanll iyaa istakeeja? táta ashkusin, Apanllee kasamaam zandarangana. Ashirucha, Malakiyasarinsha, Támana tárintspa. Apanll wandaritam waanaa tiptsiree kizpur chinakiya. Yuwari sirú siyaa tárangu anootsiri kuku uru payuchiya. Yuwash zar waritakchu anush Apanll kuskachu, tputsee ichinguru natstachiya. Wandaya yutarit taarangsin, sumaspa wanichiya. Itaru, wanariya wanasir taarangsin, tapachindakchu, urutari kisshapari taachinllinaya, tárangiya.
Waneeku, Malakiyasarini uru, ¿Mayaamsha piy yutarit taaksa? táyaru, tputssha, ¿Yapeeja iy ashiranginee? atusin, Malakiyasarinsha, Tárintspa. Apanll siyaa zurampatari wanichiya, watam yutarit taaksawa, ántar ashirangiya.
¿Mayaatseeja kamanik?
Na yuwaa kamanku anoo kamanchintspa.
a). Apanll siyaa Akoparinchicheetsis kizpur chinakiya (1.1-5)
b). Apanllpanee waneekiya (1.6—2.9)
c). Wizanllee kasaku anoo waneekiya (2.10-16
d). Paptsa. Apanll musá wanimaam kuschiya, atiya (2.17—3.4)
e). Apanlleem tatsamooru panamaam kamankiya (3.6-12)
f). Yutaritshishpanee tputsi, misha wanasirimsheetstam tputs kamankiya (13-18)
g). Yuwaa Apanll kuschu anoo kamankiya (4.1-6)
Nuw Malakiyasi Apanllee kuku kamanchintspa
1
Apanll Israelchichee chinaktaa, Israelchichsha Apanllee niyrarangana anoo kamankiya
1 Nuwaa Malakiyasaatsi Apanll, Shiysha Malakiyasaa, nuwaa kuki Israerchichee kamaningcha, tárangiya. Ashiri na kamanchintspa. 2 Israelchicheetsis, Apanll siyaa ksumish chinakiya. Itaru siysa, Apanll iyaa ksumish chinaktana atitaati, ¿tamareeja iysha anoo yasachini? átssa. Ashiri Apanllsha siyaa atiya. Mazinangtsa. Mangeetsis p'tseechintspa. Nuwaana chinaranguri, siyaa zitaminaris, Akoparini tputsireemi ipusarangina. 3 Itaru zoonllee, Esawarineetsi iwachiztamaatstaa, nuw niyrarangina.* Romshucheema 9.11-13 tsiyatsis nipta tatsamooru taaritamta. Esawarini watsapun mach kizpur wanasirimunataa taarangu, nuwsha anoo tsap puzaam ínaranguri, manginsharisha kasarangina. Anush maachee kayustanandarisha taamaam wayarangina. Wand kayustan anshuri taakanaya.
4 Ashiri Esawarinchichsha tputs; Yaktareemani yusur yaramaam panguyani, atitaateesinaya, pangumaam chtakchusin, itaru nuwsha anoo yusur izuuru kapeetchima, Apanll tárangiya. Tputs ichingarusin Esawarineetsi watsapun yasakchusin; Apanll Esawarinee watsapun izuuru tayutaritarangiya, tputs táchinllinaya. Mishat, Esawarinchichee tputs yasakchusin: Apanll Esawarinchichee ayamtaati nda kis napchiya. Urutari tsiyantaku taachiya, tputs táchinllinaya. Nuw Apanlltana. Nuw tputsee ichinguru kasiru taakina. 5 Ashiri nuw Esawarinchichee tputs ashtachima áti, anoo izuuru tuminchima. Siysa Israelchichis anoo kchiptis pangatssa. Pakchus, Apanll nda iyaatsimari napkiya. Tputsee ztaru kasiru taakiya, tátssa.
Ashiriya, kamaneena yuwaa Apanll Akoparinee chinarangu, zoonlleetssha Esawarinee niyrarangu anootsi.
Na kamanchintspa yuwaa Apanll Malakiyasaa: Nuw apanllpanee wanichima, tárangu anootsi
6 Na siyaa apanllpaneetsis tsiyatchintspa. Watam Apanll wamari kasiru an nuwaa kuki siyaa apanllpaneetsis kamaningcha, táranguwa. Ashiri na kamanchintspa. Apanll siyaa apanllpaneetsis ateeja. ¿Ndusha nllur waparee kuk payutar? Mishat, ¿Ndusha tarawzipan uru upaturunaree kuk payutar? Itaru, siysa nuwaa kuki nda payuksa, nuw siyaa ipartaati. Siy nuwaa kurakartanicha, atitaatis, nuwaa kuki payukeezis. Siy apanllpantaatis nuwaa kuki payumaam nda zandaksa. Ashkus, nuwaa niyraksa. Itaru, nuwsha siyaa waneekuri, siysa: ¿Apanll mayaamaja iyaa át? ¿Ashinooja Apanllee niyraranganee? ¿Ashinooja Apanllee kuk kapeetaranganee? átssa siya. 7 Itaru, nuwsha itsinsaru kamanchintspa: ¿Ndusha siy nuwash pangi tputsee chin wanguyaa, misha wach mchusaa, misha upaz kzimaa, yuwaa waana tputs nda zandkana, anoo nuwashsha sumi siysa nuwaam muchkis? Ashkus, nuwaa kuki izuuru kapeetaksa. ¿May mangishis chinakus ashiksa? ¿Ndusha, amb ashkis an yutarit? 8 Mazinangtsa. ¿Nitaati chineetsich yutaritawa gobernadoroom panacheezich? ¿Nitaati gobernador ashimaa mang' ksaritari napcheeja? Ndusha, ¿mayaamsha chineetsis mantsiree nuwaam panaksa, táyach? 9 Itaru, siysa mapiyrus, tputsee chin mantsireewa nuwaam panaksa. Nuwamun sumi muchiksa. Mucheerus, nuwaa tsiyatkus: Apaa, mangeetsi yaranda. Nuwaa kis napangandama, nuwaa átssa. Atitaateesa, ¿nuwsha siyaa wanasiri napcheezi? nda. Nuw Apanlltana. Nuwamari kasirina. Ashiri nuwaa kuki mazinangsa. 10 Nuwaam wakarareetsis wanasiree pachindkeesa, nuwash pangi pshturintspa. Nuw, Pangeetsi wachoo tstsangints, táchima. Wakarareetsis yutaritawaa zandkeezi. Anumun nuw siyaa yutaritshishireetsis tachingcheezi, ndambaree. Siyaa kapung tsiyantakina. 11 Piyartach tputs ichingarusin nuwaa chinakanaya. Apanll wamari kasiriya, atusin, nuwaam chinoo kizpur wanasirinand wayayarusin, nuwaam mucheersin, kzamash nuwaa kis ungirtakanaya. 12 Itaru, siysa apanllpantaatis nda ashiksa. Siy mapiyksa. Tputsee chin wanguyawaa Apanllish sum muchimaam waritakiya. ¿Tamaree ashkitaateechi Apanllee yutaritchich? átssa. Átus, nuwaa niyraksa. Nuwaam nda mangis kis patataksa. 13 Apanlleem tarawaztamaam nizeenicha, átssa. Itaru atitaateesa, nuwamaricha Apanlli. Nuwamari siyaa kasirina tsapurunasshucheetsis. Ashiri nuwsha siyaa atina: Siy wakarareetsis, opeejareetsis wanguyawa nuwaam wayakis anoo ¿nuw kis napcheezi? nda. 14 Tputs nuwapat tsiyatku, Apaa, shiyaam chineetsi kizpur wanasirimash, matambish panachinllpa, atitaa, itaru wanguyawaatssha nuwash pangi wayakchu, nuwsha anoo tputsee izuuru wanichima. Nuw kizpur kuraktana. Nuwamari kasiruri taakina. Tputs ztaru nuwaa yasakanaya. Nuwaa punikanaya. Nuw Apanlltana. Taarashipantana. Nuwapat tatsamoomaam wanindaja, Apanll tárangiya.