Hebrew Bughunek K'eyahalhtuk Hubuts'un K'e'éduguz
1
K'an 'et degha nus dzin hoh Yak'usda buYe' 'en be newhulh yalhtuk
Hoh da lhat 'ink'ez lhelhts'un na'a, niz haóodanzut, Yak'usda ba nus whunilh'en, 'en hubugha netsuhda hezulh, 'en Yak'usda hubulh yaílhtuk. 'Aw 'et njan dek'elh'az dzin hoh Yak'usda buYe' 'en be nelh yaílhtuk. 'En zeh 'uja be'aBá ndai yit'i, 'i ts'iyawh bube'ildzun tele, 'et whuz na'a be'aBá yutl'ahó'ai. BuYe' 'en be 'uja ts'iyaintsuk 'uhóonla. 'En zeh 'int'ah be'aBá ye dézti, 'i newhunelhtan. 'Ink'ez be'aBá dant'ah, 'et buYe' 'en soo ts'ah'un yundult'ah. Ndai 'uhóonla, bughunek ulhtus, 'i be yalhtuk, 'i be ndulhcho hoontun. 'En dich'oh 'uja, nelubeshi 'i ts'iyawh neba yuna'dalhde. 'Et hukw'elh'az yak'uz ts'ih ndun degha nus ncha, 'en nalhnih ts'ih yughu nátl'adeda. 'Et huwa ndunnah lizas huba 'o nus ncha 'int'ah. Ndi boozi bugha ídelts'ut, 'i lizas buboozi ba 'o nus dézti ho' 'int'ah. 'Et nduhóolcho hoh bugha ndoh 'int'ah.
Yak'usda buYe' 'en lizas hubugha ndoh 'int'ah
Ndez na'a njan ndúhoont'ah, Yak'usda 'aw 'ilhunuh lizas 'et nduchaoobudínil,
“Nyun suYe' 'unint'ah.
'Et huwa k'an 'et dzin suYe' sinli, whuz na'a nyoozízi.” 'Ink'ez njan chah Yak'usda 'utni,
“En ba 'aBá tesdle
'ink'ez si suba 'uYe' tele.”
'Ink'ez 'udechoo whuzdli, Yak'usda doo chah ndi yun k'ut nítelhtelh hoh 'et ndutni,
“Yak'usda bulizas,
'en ts'iyawh hits'u teni' noolhdzin.”
'Et dulizas bughu yalhtuk hoh njan ndutni,
“Bulizas nilhts'i k'una'a 'obinla.
'En hiba 'uhut'en 'uhint'ah 'ink'ez kwun nudúnat, 'i k'una'a hubulhtsi.”
'Et whunts'ih buYe' yughu yalhtuk hoh ndez na'a 'et ndutni,
“O Yak'usda nts'e hoh hubudayi cho inli, 'et 'i 'ilhuz wheni 'int'ah.
'Ink'ez ts'ah'un na'a k'une' whutel'en.
Ts'ah'un 'uhoont'ah zeh hukw'entsi'.
'Uk'únucha'ust'en, 'i buts'u díntnik.
'Et huwa O Yak'usda, nYak'usda ndi khe,
'i dune be ba ts'odelhti,
'i bugha budzi hoont'i,
'i nyulh dune ba nus lhai be nyúlhlho.”
10 'Ink'ez 'udun chah bughunek 'i 'uk'e'edúguz hoh 'et ndutni,
“Moodihti nyun 'udechoo whe'whudit'en 'et whuts'un, ndi yun inla.
Nyula be yaz chah 'uhóonla.
11 'I ts'iyawh hoolah whutéleh, 'et whunts'ih nyun 'ilhuz wheni 'int'ah.
Ndai inla, 'i 'ants'i naih jut 'ulhih teh whuz na'a 'uwhutenilh.
12 'Ink'ez nahiyits'uz, 'i k'una'a lhenántetelh,
'ink'ez 'uyoo natedle.
'Et whunts'ih nyun whuz na'a zeh 'et ndint'ah.
Nye naooduzuk 'et 'aw whulátahchahóolah,” Yak'usda 'et ndi yúlhni.
13 'Et whunts'ih Yak'usda bulizas 'aw 'ilhunuh whunts'i njan nduchaoobudínil,
“Nch'a hudetni ts'iyawh nke hubuk'ut natelyis mba hubutelhtsilh.
'Et whuts'un 'et duhóoja t'eh,
nalhnih ts'ih suzih tanda.”
14 'Et ndez na'a njan dúhoont'ah, ndunnah lizas, 'en nudúdeh 'ink'ez be ne'úst'en 'uhint'ah. Yak'usda whébalh'a 'et t'eh ndunnah ndi bé uzdujih, 'i nuhts'ite'alh, 'et huba neba ne'hut'en 'uhint'ah.