2
Yusuja Espíritu junacuareque
Pentecostés chine juetihuajutu Jesús queja dutya ecatyati cuanaque ecasitati jucuare ecasitaticuareju cama. Pentecostés chinetu jucuare israelita cuanara euhua cuanaque huesayaque chine. Muya jutidyatu Yusuja Espíritu tuna queja butecuare. Sicacada tunajatu barepa equeque buteyaju bacacuare, cuejipa casadaque tuuuetibeya bucha. Dutya etareju cuanaratu bacacuare tumeque sicacadaque. Tume tunajatu bacuare ai cuana achaacha piji etiqui juju bucha. Etiqui buchiquetu tunaja iyuca cuana dyaque peadya peadyaju netibarecuare. Jadya junaetu Yusuja Espíritu jucuare tuna peadya peadya queja. Tuna queja butetsu tujatu ecana bape bape yana eque quisaratishacuare. Tunaja yana eque ama tuna quisaratitibunecuare, peya yahuaju cuanaja yana cuana eque.
Tume patyatu jetiama israelita cuana jucuare Jerusalénju Yusu muijaca baecua jucuare cuanaque, Moisésja cacuatsashati eque aniya cuanaque. Dutya yahua juque jujeri tuna juticuare. Eje bucha juyaque bacatsu tuna cuacuare Jesús queja ecatyati cuana queja. Tuhua junatitsu tunajatu Jesús queja nimee cuanaque quisaratibareyaju bacacuare. Bape bape yana eque tunajatu ecana quisaratiyaju bacacuare. Tuna quisarati cueja juyaju bacaqui cuanaja yana eque quisaratiyaju tunajatu bacacuare. Jadya bacatsu tuna eje buchadya jucara jucuare. Dyaque ejecutana tuna jucuare. Bape tunajatu bacacuare. Cacuejatibarecuare tuna tuna cama:
—¡Nebacacue! Dutya riya quisaratiya cuanaque taa rena Galileaju cuanaque. Jadya ama bucha taa rena Galileaju cuanaja yana eque ama quisaratiya, ecuanaja yana eque jutidya. ¿Eje buchique jatsu rique ecuana ecana ecuanaja yana eque quisaratiyaju bacaya ecuana nanada equedya quisaratihua eque? Ecuana taa ecuana eje uma peya yahua cuana juque. Umae ecuana Partia juque, peya cuana bacue Mediaju, Elamju cuanaque. Umae bacue ecuana Mesopotamiaju, Judeaju cuanaque. Umae ecuana Capadocia juque, Pontoju, Asiaju cuanaque jadya. 10 Umae ecuana Frigiaju cuanaque, Panfiliaju, Egiptoju cuanaque jadya. Peya cuana bacue ecuana Africa juque, Libia yahua juque Cirene japadamaque. Umae bacue ecuana Romaju cuanaque. 11 Umae ecuana jechine Creta juque, Arabiaju cuanaque jadya. Umae ecuana Israel eque neri ejuracana cuanaque. Dutyaradya tuque ecuana Yusu Neri muiya israelita cuanara, israelita cuanara ama jadya. Dutyadya ecuana Moisésja cacuatsashati eque aniya. Arepa ecuana umada peya yahua cuana juque ama bucha tuque ecuana ecana bacaya ecuanaja yana eque quisaratiyaju. Bacayadya ecuana ecana jida quisaratiyaju, —jadya tuna jubarecuare.
12 Dutyara tunajatu bape bacuare eje bucha adebataqui ama jadya. Jadya tibudya tuna cabacaduratibarecuare:
—¿Eje buchique ri riya jadya juyaque? —jadya ecana jubarecuare.
13 Umaera bacue ijaribacuare jutidya Jesús queja ecatyati cuanaque.
—Nijuqui tibu tuna jadya quisaratiniya, —jadyatu jucuare umae cuana.
Pedrora ecuita cuana isaracuareque
14 Pedrotu netitsuracuare ecuita cuana isara ishu. Peadya tunca peadya earacana Jesúsja ecuadisha cuanaque tuna tumebaedya tuhuadya jucuare. Etsuri jebuda tsehue tujatu isaratibunecuare israelita cuana, Jerusalénju aniya cuanaque tuhua jucuare cuanaque jadya:
—Tata ecana, nebacacue ique. Nebacacue jida era cuejayaque. 15 Nijuqui ama ecuana, micuanara inime tupuya bucha. Barepatya ama jari taa rique; las nueve pijidya taa rique. Ecuana israelita cuanaja tuque ecuanaja uva nacaca sasadaque iji baecua apudajudya cuita. Cuejaya micuana era, ecuana eje bucha juatsu jadya quisaratihuaque. 16 Riyaqueri jadya juya, Yusura icueneta cueja acuareque Joel tuja quisarati cuejaqui eque:
17 “Amena ishuque huecaca cuanaju tuque ecue Espíritu cuadishabuque yahuaju.
Israelita cuanaja ishu camadya ama, israelita ama cuanaja ishu tumebaedya tuque cuadishabuque.
Micuana eque juracanaya cuanaratu ecue quisarati tsapebuque.
Ecuita cuanara, epuna cuanara jadyatu quisarati tsapebuque.
Tahuijutu ecue Espiritura bahue amerebuque quisarati yunerique ehue ebari cuana, tumebaedya esiri cuanaque.
18 Tumeque huecaca cuanaju tuque ecue Espíritu cuadishabuque ique merequi cuana queja,
ecuita cuana queja, tumebaedya epuna cuana queja.
Tunaratu cuejabuque ecue quisarati, era ecana jadya quisaratishabuque tibu.
19 Barepaju tsehue tuna ecue dyaque casa aniyaque bamerebuque.
Tumebaedya tuque ecue casa bamerebuque yahuaju cuana tsehue.
Amitu juribuque.
Etiquitu jujubuque.
Huani misidaquetu netitsurabuque.
20 Ijetitu huecadama jubuque.
Baditu ami bucha pudee jubuque.
Jadyatu jubuque Ecuana Cuatsashaquique junanucama jariju, emuique, casadaque jadya cabameretima jariju.
21 Dutya tuaqueja catsahuamereti ishu tuque bacaqui cuanaquetu einajaca jubuque,”
jadyatu Yusura quisarati acuare tuja quisarati cuejaqui Joel eque.
22 Pedroratu tuhua jucuare cuanaque quisarati cuejanucacuare:
—Micuana Israel eque ejuracana cuanaque, nebacacue era cuejanucayaque. Cuejaya micuana Jesús Nazaret juque eje buchique. Tuque riyaque yahuaju jarira tujatu jetiama acuare ejeque ecuitaja ataquique ama micuanaja yacuaju. Jetiama tujatu acuare micuanara bape bacuare cuanaque. Dutya riya cuanaquetu Yusura amerecuare tura tuque cuadishahuaque yunerinemere ishu. 23 Jadya ama buchatu micuanaradya inamerehua. Micuanaratu ecuita jidama cuana queja curusuju tatamerehua tuque iye ishu. Dutya riya cuanaquetu jadya judadihua Yusura inime pirehua equedya. Tuquetu icuenetadya bahue juhua micuanara jadya adadiyaque. 24 Jesús majuhuaju emajuquetu Yusura chacha nityatsuranucahua. Emajuque tujatu nityatsuranucahua, Jesús emaju eje bucha jarasiritaquima tibu. 25 Berutu ecuari Davidra huenecuare Jesús jadya ayaque:
“Ique bahue Ique Cuatsashaquique dutya huecaca eatsehueque.
Jacanime ama tuja ique.
Tuque eatsehue tibu, bajida ama juya.
26 Jutaquijudya ique dyaque pureama juya.
Pureama tsehue tuque ajacaya ama quisarati Yusu jidaque.
Arepa ique majuya ama bucha, pana ejenedya tuque aya, dutya eje bucha judadiyaquetu ecue jida ishuque.
27 Pana ejenedya tuque aya, Ique Cuatsashaquira ique emajusiri ama huanabuqueque.
Tuhuadya jutidya tura riri ishu huanasiribuque ama, ique tujaque, tuque merequique jadya juya tibu.
28 Eratu Yusu aya:
‘Mira ique bahue amerehua maju baecua ani ishu.
Mira ique dyaque jida pureama amerehua, miatsehue ique anidirubuque tibu, Yusu’ ”,
jadyatu Davidra béru huenecuare.
29 “Ecue ata cuana, pana cueja micuana aya Davidra huenecuareque. Tuta taca jadya catiyaque amatu jadya jucuare, ‘Huanasiribuque ama tura ique ecue ecuita riri ishu’ jadya huenetsu. Béru amena mara maratu ecuanaja ebaba David majucuareque. Majuhuajutu tuja ecuita ishatanacuare tumu caniju. Tuhuadya tujatu ecuita riricuare. Riya camatu narutanaya jaridya tuja uhuacuare tuque ishatanacuareque. 30 Chacha aniya jari tuputu Yusuja quisarati cueja juhua. ‘Peadya mique eque ejuracanaquetu Mesías jubuque, Ecue Emepeque. Mira israelita cuana naruya bucha, jadya naruedya tujatu ecue cuanaque abuque. Yuneridya mique jadya aya, era jadya adadiyaque’ jadya patu Yusura acuare. 31 Jadya equetu David icueneta bahue jucuare Yusura Mesías cuadishadadiyaque. Tuquetu bahuedya jucuare Yusura Mesías emajuque nityatsuranucabuqueque. Jadya tibudyatu jucuare: ‘Emajuque caniju eishaquetu jarasiribuque ama, ni tuja ecuita riribuque ama’ jadya. 32 Yusuradyatu Jesús majuhuaque chacha nityatsuranucachine. Ecuanaratu bachine Jesús tuque netitsuranucahuaju. Iyacua micuana ecuanara yuneridya cuejaya tuque chachaque. 33 Yusuratu barepaju dujunucahua tuja yacuaju. Iyacuatu tuque muita ishuju Etataqueja jida eque amaca. Yusu patu jucuare: ‘Jesusratu ecue Espíritu cuadishaya tuaqueja catyatihua cuana queja’ jadya. Riyaque Yusuja Espíritu equedya ecuana iyacua quisaratiya. Micuanara petayaque, bacayaque jadyatu tura jadya amereyaque. 34 Davidja ecuita barepaju tsurama jarijudya. Jadya ama buchatu Davidra quisarati anucacuare béru:
“Yusuratu Ique Cuatsashaquique jadya cuejacuare:
‘Anibutecue ecue jida eque amaca muita ishu,
35 era mique ujeu baqui cuanaque dutya ijahue
atillaya tupu, Ique Cuatsashaquique’ ”.
Jesús jadya ayaque tujatu jadya quisarati acuare.
36 “Nebacacue jari ique, dutya micuana Israel eque ejuracana cuanara. Jesús, micuanara curusuju tatamerechinequetu Yusura Mesías amerecuare. Tumebaedyatu Ecuana Cuatsashaquique amerehua, —jadyatu Pedrora cuejacuare tuhua jucuare cuanaque.
37 Jadya juya bacatsu tuna dyaque peya inime jucuare, jidama juhuaque caadebatitsu.
—Ecuanaja ata cuana, ¿eje bucha ecuana jutaqui? —jadya tunajatu bacaduracuare Pedro, Jesúsja ecuadisha cuanaque peya cuana jadya.
38 Tume tuna Pedrora quemitsacuare:
—Jesús queja catyatitsu necacuareticue inime, Yusuja biji eque ani ishu. Necutsamereticue Jesucristoja ebacaniju. Jadya nejucue Yusura micuanaja jucha cuana apupasha ishu. Turatu cuadishaya tuja Espíritu micuana tsehue anisiri ishu, micuana tsahua ishu. 39 Yusuratu tuja Espíritu cuadisha ana ahua micuana queja, micuana eque ejuracana cuana queja, riyaque yahuaju dutya queja aniya cuana queja jadya. Jadya eque tujatu cuadishahua dutya tura tuaqueja ihuaraya cuanaja ishu, —jadya tuna Pedrora acuare.
40 Nereda bucha cuejae tujatu ecana acuare yana muida tsehue:
—Dutya jujeri iyacua aniya cuanaque tuna jidamaque inime cadujutiya. Tuna tuna Yusu queja judirunime ama. Necacuareticue inime tuna nerecaturatadadiya bucha nerecaturatae ejudadiu tibu, —jadya tuna Pedrora acuare.
41 Pedrora cuejayaque bacatsu tuna jetiama inime cacuareticuare. Quimisha mil tuna inime cacuaretitsu Jesús queja catyaticuare. Cutsamereticuare ecana Jesúsja cuanaque jadya cabamereti ishu. 42 Jesúsja ecuadisha cuanara bahuityayaque pana baca aatsu tunajatu ejenejacacuare ama. Tunaja aniya cuanaque ecana dutya tupu catyatie jubarecuare. Casitatinicuare ecana Yusu tsehue quisarati ishu. Ecuana Cuatsashaquique adeba ishu araara ishu tuna yuhua cama casitati bahue jucuare.
Jesús queja ecatyati cuanaque eje bucha anie jucuareque
43 Yusuja casa tsehuetu Jesúsja ecuadisha cuanara ejeque ecuitaja ataquique ama acuare. Jadya baatsutu Jesús queja catyatima cuanaque dyaque anajacatacuare. 44 Jesús queja ecatyati cuanaque tuna yuhua cama nimee ecadutyati jucuare. Caradatijacama tuna junenicuare. Aiqui cuanaratu tyacuare tunaja ai aniyaque aima cuanaque. 45 Catyati ecana caticuare tunaja aniya cuanaque. Tunaja ai cuana catyati aatsu tunajatu chipiru tsumecuare peya cuanara ai sareya cuanaque quemi ishu. 46 Dutya huecaca ecana caradatinicuare Yusuja etareju. Tunaja etare cuanaju tuna caradatijacama junenicuare araara ishu, Jesús majuhuaque adeba ishu. Pureama epuri jadya tsehue tuna araaranicuare. Jida tuna cabatibarecuare peya cuana tsehue. 47 Yusu tunajatu pureamaturajacacuare ama. “Dyaque jida taa mique ecuana tsehue”, jadya tunajatu ajacacuare ama. Dutya jujeri Jerusalénju cuanara tuna jida, iyuhueda jadya bacuare. Huecacaju huecacajutu Yusura peya cuana Jesús queja catyatishamereajecuare. Tume cuanaque Jesús queja catyatihuaju tuna Yusura Ijahua quejaque inajacamerecuare. Jadya eque tuna Jesús queja nimeedya jutidya juajecuare. Tuque pureama aishu ecana casitatijacacuare ama.