El Carta para con el Maga Gente Hebreo
1
Puede Kita Sabe el Maga Palabra de Dios por Medio del Di Suyo Hijo
Antes pa gayot Dios ta habla con el di aton maga tatarabuelo por medio del di suyo maga profeta. Ya habla le canila muchas veces usando diferente manera. Pero ahora, durante este maga tiempo ta manda le sabe canaton el di suyo maga palabra por medio del di suyo Hijo. Y por medio del di suyo Hijo tamen, Dios ya crea todo las cosas na mundo y na cielo. Y ya nombra le con ese Hijo heredero de todo. El Hijo igual como el resplandor del brillo de Dios y ele tiene el mismo naturaleza de Dios. Ele amo el quien ta sostene y ta controla todo el creacion por medio del di suyo maga palabra bien poderoso. Ya dale tamen ele canaton el manera para queda limpio el di aton maga pecado por medio del di suyo muerte, despues ya volve ya le ole na cielo, y ahora sentao ya le na lao derecha de Dios todo poderoso.
El Hijo de Dios Mas Superior Que con el Maga Angeles
Sabe kita que Dios ya dale con el Hijo el mas alto puesto que tiene el maga angeles, cay el puesto de un hijo mas alto que con el puesto de un angel. Dios nuay nunca habla ni con ningunos del di suyo maga angeles,
“Tu amo mi Hijo, este dia ta declara yo que yo el di tuyo Tata.”
O nuay nunca le habla con el maga angeles que ay queda le el di ila tata, ni ay queda sila el di suyo maga anak. Cuando Dios ya manda con su unico Hijo aqui na mundo, ya habla tamen le,
“Todo el di mio maga angeles debe adora con ele.”
El Dios ya habla otra vez acerca del maga angeles,
“Sila el di mio maga mensajero y tiene vez ta manda yo canila hace como maga viento fuerte o igual como maga fuego bien arde para sirvi sila conmigo.”
Pero Dios ya habla acerca del di suyo Hijo,
“Tu el Dios, quien ay reina hasta para cuando, y el di tuyo gobernada bien justo.
Ta ama tu el maga cosas de verdad y ta tene gayot tu asco con el maga mal trabajo. Poreso Dios quien el di tuyo Dios, ya escoje contigo y ya dale contigo el alegria de tener el mas alto honor que ya dale le con el di tuyo maga uban.”
10 Y ya habla tamen le,
“Na principio pa, tu amo el Señor quien ya crea el mundo y por medio del di tuyo maga mano ya crea tamen tu todo las cosas na cielo.
11 Un dia el cielo y el mundo ay desaparece, pero tu ay continua vivi hasta para cuando. Y ese dos lugar ay queda ya sin provecho como el maga ropa que ya queda nuay mas sirve.
12 Y ay ajunta el cielo y el mundo igual como un gente ay saca el ropa para cambia de nuevo. Pero si para contigo, hende tu nunca ay cambia ni hende nunca ay queda viejo.”
13 El Dios nuay nunca habla ni con ningunos del di suyo maga angeles,
“Senta na mi lao derecha hasta ay llega el tiempo que ay pone yo con el di uste enemigo abajo del di uste pies.”
14 Cosa man el trabajo del maga angeles? Sila el maga espiritu quien ta sirvi con Dios. Y Dios ta manda canila para anda con aquellos quien ay queda gayot salvao.