Rut
Inteꞌ checsuyaj tama e libro de Rut
¿Tucꞌa tuaꞌ tzꞌijbꞌabꞌir e jun era?
Pues e bꞌijnusiaj xeꞌ más nojta tama e jun era jax tuaꞌ uchecsu ticoit que ayan uxteꞌ gente xeꞌ cay uturbꞌa ubꞌobꞌ tuaꞌ uchiobꞌ lo que imbꞌutz tut e Dios motor que aquetpa intran tutobꞌ tuaꞌ uchiobꞌ.
¿Chi umen tzꞌijbꞌabꞌir e jun era?
Pues motor que machi che chi umen tzꞌijbꞌabꞌir e jun, ayan tin e ubꞌijnu que jax e Samuel xeꞌ utzꞌijbꞌa. Pero ma chequer jay bꞌan umen que ayan lo que tzꞌijbꞌabꞌir nacpat que chamay jaxir.
¿Tucꞌa año tzꞌijbꞌabꞌir e jun era?
Pues tzꞌijbꞌabꞌir e libro de Rut conda cꞌanix acꞌapa e tiempo conda war acꞌotoriobꞌ e ajbꞌijresiajobꞌ xeꞌ arobꞌnobꞌ jueces tama e castilla. Entonces erer caware que e libro de Rut tzꞌijbꞌabꞌir tama e año 1000 conda merato acuxpa e Cristo.
¿Chi tamar cansenon tama e jun era?
Pues irsenon meyra tama ucuxtarobꞌ uxteꞌ gente xeꞌ jax e Rut, y e Noemí, y e Booz.
¿Tucꞌa lugar tiaꞌ numuy tunor lo que achectesna tama e jun era?
E lugar tiaꞌ turuanobꞌ e Noemí taca ufamilia jax e lugar Moab, y de allí sutpa ixiobꞌ e Noemí y e Rut esto tama e chinam Belén.
1
Conda ixin e Elimelec tuaꞌ aturuan tama e lugar Moab
Pues tama e onian tiempo conda mato tucꞌa inteꞌ rey tama e lugar Israel tunor tin e turuanobꞌ tama e lugar era quetpobꞌ yebꞌar cora ajbꞌijresiajobꞌ* Pues tara che que e gente quetpobꞌ yebꞌar cora ajbꞌijresiajobꞌ xeꞌ cꞌotoriobꞌ cora cora tujor e gente ixin, y bꞌan e bꞌijnusiaj tama e ojroner “jueces” bꞌan cocha che tama e castilla.. Y tama e tiempo era checta inteꞌ nuxi winar cocha machi cꞌaxi e jajar tama tunor or e lugar. Entonces inteꞌ winic xeꞌ turuan tama e chinam Belén xeꞌ turu tama e departamento Judá ixin innajt cora tuaꞌ aturuan tama inteꞌ lugar xeꞌ ucꞌabꞌa Moab. Y uqꞌueche ixin uwixcar, y e chateꞌ uyunenobꞌ. Pues jaxir ucꞌabꞌa Elimelec y uwixcar ucꞌabꞌa Noemí y uyunenobꞌ ucꞌabꞌobꞌ Mahlón y Quilión. Tunorobꞌ ajlugarobꞌ tama e chinam Belén tama e departamento Judá y ixiobꞌ tuaꞌ aturuanobꞌ cora año tama e lugar Moab.
Pero conda numuy cora tiempo chamay e Elimelec, y tamar era uwixcar xeꞌ e Noemí quetpa ubꞌajner taca e chateꞌ uyarobꞌ. Pero conda numuy cora tiempo umaxtacobꞌ utajwi ubꞌobꞌ taca chateꞌ ijchꞌoctac xeꞌ ajlugarobꞌ Moab, y nujbꞌiobꞌ tacarobꞌ. Inteꞌ ijchꞌoc ucꞌabꞌa Orfa y inteꞌ ucꞌabꞌa Rut. Pero conda numuy diez año chamayobꞌ e Mahlón y e Quilión, y tamar era quetpa ubꞌajner e Noemí. Matucꞌa uyarobꞌ y matucꞌa uviejo.
Conda E Noemí y e Rut ixiobꞌ esto tama e chinam Belén
Pues entonces cꞌotoy unata e Noemí tiaꞌ turu tama e lugar Moab que Cawinquirar Dios sutpa uchojbꞌes ut e gente tama uchinam otronyajr xeꞌ jax e Belén y que cꞌapa e winar. Y tamar era ubꞌijnu e Noemí tuaꞌ asutpa axin esto tama e departamento Judá otronyajr y tuaꞌ uqꞌueche axin e chateꞌ uyaribꞌobꞌ. Pero conda war axanobꞌ tama e bꞌir xeꞌ acꞌotoy esto tama e departamento Judá cay ojron e Noemí taca uyaribꞌobꞌ y che:
—Sutpenic quiquic tama uyotot ituꞌ otronyajr tuaꞌ machi ixixin tacaren. Y que Cawinquirar Dios uyajtanicox bꞌan cocha cay quetpox incꞌun iwirnar tacaren y taca niviejo ani, y taca nimaxtac ani ubꞌan. Y que Cawinquirar Dios utacricox tuaꞌ ixsutpa ixnujbꞌi otronyajr, y tuaꞌ itajwi inteꞌ iviejo tuaꞌ ucojcox y tuaꞌ ixtzay otronyajr.
Y de allí e Noemí utzꞌujtzꞌi utiꞌ uyaribꞌobꞌ y tamar era cay aruobꞌ jaxirobꞌ. 10 Pero ojronobꞌ jaxirobꞌ y chenobꞌ:
—Machi ixto cꞌani casutpa caxin otronyajr esto tama uyototobꞌ catuꞌ. Non cꞌani caxin tacaret esto tama e chinam tabꞌa, chenobꞌ e Rut y e Orfa.
11 Pero sutpa ojron e Noemí otronyajr y che:
—Quiquic niwijchꞌoctacox. ¿Tucꞌa tuaꞌ cꞌani ixixin tacaren? Nen machix tuaꞌ inchꞌijrse más nimaxtac tuaꞌ uyubꞌiox ixnujbꞌi tacarobꞌ. 12 Sutpenic quiquic tama iyotot. Nen onian ixiquen y tamar era ma cocha erer insutpa innujbꞌi otronyajr. Y motor jay ayan ani niviejo y tama e acbꞌar era inxin ani tuaꞌ inwayan tacar, y jay tamar era inxin inchꞌijrse más niwarobꞌ ani, 13 y nox, ¿icojcoto ca este que axin aꞌchꞌiobꞌ ani tuaꞌ ixnujbꞌi tacarobꞌ? Machi. Y jay bꞌan ani inche, ¿ixquetpato ca ani ibꞌajner tunor e tiempo era este que aꞌchꞌiobꞌ tuaꞌ ixsutpa ixnujbꞌi tacarobꞌ? Machi, niwijchꞌoctacox. Pues Cawinquirar Dios war uchien innumse nibꞌa taca inteꞌ nuxi cꞌuxner xeꞌ inchꞌaj ut, y más ani inxin innumse nibꞌa jay inwira que nox war inumse ibꞌa ubꞌan umen que war ani ixquetpa ibꞌajner tacaren, che e Noemí.
14 Y entonces jaxirobꞌ cay aruobꞌ otronyajr, y de allí e Orfa utzꞌujtzꞌi utiꞌ upixam y locꞌoy ixin. Pero e Rut war uyajta ut upixam y tamar era machi cꞌani uyacta tuaꞌ umeqꞌue y machi cꞌani alocꞌoy najtir tut. 15 Entonces ojron e Noemí otronyajr y che:
—Iran, war asutpa axin awet aribꞌnar esto tama uchinam otronyajr y war asutpa axin esto tut udiosobꞌ ubꞌan. Quiqui net tacar ubꞌan, che e Noemí.
16 Entonces ojron e Rut y che:
—Machi awaren tuaꞌ inlocꞌoy inxin innajt toit, y machi awaren tuaꞌ inwactet. Nen cꞌani inxin tiaꞌ iꞌxin net, y nen cꞌani inturuan tiaꞌ ituruan net. Y achinam cꞌani acꞌotoy aquetpa tanibꞌa, y Adiosir cꞌani acꞌotoy aquetpa Nidiosir ubꞌan. 17 Nen cꞌani inchamay tiaꞌ tuaꞌ iꞌxin ichamay net, y tiaꞌ tuaꞌ iꞌxin imujca net, yajaꞌ taca cꞌani inmujca nen ubꞌan. Que e Dios axin uwatzꞌien meyra jay inlocꞌoy inxin innajt toit. Jax taca e chamer xeꞌ tuaꞌ axin uxereon, che e Rut.
18 Pues conda e Noemí uwira que e Rut cꞌani ixto axin tacar, machi ixto ojron más. 19 Entonces ixiobꞌ chatertiobꞌ este que cꞌotoyobꞌ tama e chinam Belén.
Pero conda war oꞌchoyobꞌ tama e chinam, e gente cay bꞌactobꞌ uwirobꞌ ut e Noemí y cay tzayobꞌ meyra ubꞌan este que cay ojronobꞌ e ixictac y chenobꞌ:
—¿Ma ca jax era e Noemí? chenobꞌ e ixictac.
20 Pero ojron jaxir y che:
—Nen. Pero machix ipejquen tama e Noemí, sino que pejcaniquen que inchꞌaj niut, porque Cadiosir xeꞌ nojta ucꞌotorer uturbꞌa lo que inchꞌaj ut tamaren, che e Noemí. 21 Pues conda locꞌoyen tama e lugar era ayan niviejo y ayan chateꞌ nimaxtac xeꞌ ixiobꞌ tacaren, pero coner war inyopa nibꞌajner umen que bꞌan war ucꞌani Cawinquirar Dios. Entonces ¿tucꞌato tuaꞌ ipejquen Noemí xeꞌ war che “Atzay”, cocha Cawinquirar Dios xeꞌ nojta ucꞌotorer ixin uchien innumse nibꞌa este que war aquetpa tzajtaca niut, che e Noemí.
22 Pues entonces bꞌan numuy conda sutpa tari e Noemí tama e lugar Moab taca e Rut xeꞌ jax uyaribꞌ xeꞌ ajlugar Moab. Pues conda cꞌotoyobꞌ, intocto war acay amorojsena e cosecha tama e cebada tama e chinam era.

*1:1: Pues tara che que e gente quetpobꞌ yebꞌar cora ajbꞌijresiajobꞌ xeꞌ cꞌotoriobꞌ cora cora tujor e gente ixin, y bꞌan e bꞌijnusiaj tama e ojroner “jueces” bꞌan cocha che tama e castilla.