Heebrii awuye
Wo̱re̱ ne̱ ɔko̱ a kyo̱rɛɛ bo̱ kyo̱ŋwe̱ Yudaa awuye ne̱ bo̱ be̱e̱ ba te̱e̱ bamo̱ fe̱yɛ Heebrii awuye ne̱ baa bo̱ kii Kristoo awuye‑o
1
Ane̱ŋ ne̱ Yeesuu kyɔ Wuribware̱ a mbɔɔ‑ɔ
1 De̱daa‑ɔ, iluwi bwe̱e̱tɔ na e̱kpa bwe̱e̱tɔ se̱, ne̱ Wuribware̱ a sa se̱ŋsa gywii ane̱ ade̱daapo̱‑ɔ, mò̱ akyaamɛɛ‑ɔ se̱ ne̱ ɔɔ bo̱ bo̱rɔ. 2 Amaa ndɔɔ a ŋke mɔ‑rɔ ne̱ kaye̱ a tɔ‑rɔ e̱gye̱ kɛɛ‑ɔ fe̱raa, mò̱ gyi Yeesuu si ne̱ ɔɔ bo̱rɔ sa se̱ŋsa gywii ane̱. Ane̱ŋ se̱ ne̱ baa waa mò̱ gyi amo̱ kuŋu si kiliŋ ko̱ fe̱yɛ,
“Mò̱ ne̱ Wuribware̱ a bo̱rɔ se̱ bo̱ twe̱e̱ kaye̱.
Mò̱ ne̱ Wuribware̱ a lee fe̱yɛ lalalo̱we̱‑ɔ
ɔ taa atɔ pɛɛɛ mɔ a ɔ bo̱ bɔɔrɔ.
3 Wuribware̱ a ke̱laŋŋe̱rɔ dabe̱‑ɔ
bɔ mò̱ se̱ ne̱e̱ ke̱ e̱ laŋŋe̱‑rɔ.
Ɔɔ le̱e̱ Wuribware̱ ke̱tɔ ke̱maa‑rɔ.
Mò̱ ase̱ŋ dabe̱‑ɔ ne̱ o de ɔ sa
ne̱ atɔ pɛɛɛ mɔ e̱ yɔ se̱ kyɛɛkyɛɛ.
Ɔɔ kpɛɛ ase̱sɛ iyisi.
Ne̱ ŋkee o yii so̱so̱, mfe̱ŋ ne̱ ɔɔ kye̱na
Nyiŋkpe̱ŋ‑ɔ‑kyɔ-bamo̱-pɛɛɛ-ke̱dabe̱ kigyisesare̱e̱ se̱,
ne̱ mò̱ aa mò̱ i gyi kuwure.”
4 Amo̱se̱ ne̱ ane̱ i ŋu fe̱yɛ ane̱ŋ ne̱ Wuribware̱ a sa mò̱ gyi‑o ke̱nyare̱ dabe̱ ne̱ ko̱ kyɔ mò̱ mbɔɔ‑ɔ lee‑o, ane̱ŋ dɛɛ ne̱ ɔɔ sa mò̱ gyi‑o ke̱dabe̱ kyo̱ŋ mò̱ mbɔɔ‑ɔ. 5 Amo̱se̱ ne̱ abware̱se̱ŋ wo̱re̱‑ɔ‑rɔ, Wuribware̱ a tɔwe̱ mò̱ gyi‑o wo̱re̱ kpeŋ kuŋu si ase̱ŋ fe̱yɛ,
“Ndɔɔ mo̱ a lee fo̱ bo̱ kaapo̱ fe̱yɛ mo̱ gyi e̱ gye̱ fo̱.
Ne̱ mo̱‑ɔ, fo̱ se̱ e̱ gye̱ mo̱.”* Kiliŋ 2.7.
N gye̱ mò̱ mbɔɔ‑ɔ ɔko̱ ase̱ŋ ne̱ ɔɔ tɔwe̱ ane̱ŋ. Ne̱ ɔɔ be̱e̱ tɔwe̱ mò̱ fɔŋfɔŋ mò̱ gyi amo̱ kuŋu si ase̱ŋ abware̱se̱ŋ wo̱re̱‑ɔ‑rɔ to̱ŋ ko̱ fe̱yɛ,
“Ɔ te̱e̱ mo̱ fe̱yɛ mò̱ se̱,
na mo̱‑ɔ mɔ te̱e̱ mò̱ fe̱yɛ mo̱ gyi.”* 2 Samuwɛl 7.14; 1 Ŋko̱we̱kyase̱ 17.13.
6 Amaa saŋ ne̱ Wuribware̱ e̱ kpa fe̱yɛ ɔ baa mò̱ gyi‑o kaye̱‑rɔ‑ɔ, ɔ yɛ,
“Wuribware̱ a mbɔɔ‑ɔ, mo̱nꞌ bo̱ suŋ mò̱.”* Mbraa ke̱be̱e̱sa 32.43 (LXX).
7 Amaa mò̱ mbɔɔ‑ɔ kuŋu si ase̱ŋ, ɔ yɛ,
“Ɔ sa ne̱ mò̱ mbɔɔ‑ɔ i kii fe̱yɛ afwii,
na mò̱ ayaafɔre̱ fe̱yɛ de̱e̱kpa agyabreŋ.”* Kiliŋ 104.4 (LXX).
8 Abware̱se̱ŋ wo̱re̱‑ɔ‑rɔ, a bo̱‑rɔ fe̱yɛ Wuribware̱ a tɔwe̱ gywii mò̱ gyi‑o fe̱yɛ,
“O Wuribware̱, kuwure ne̱ fo̱ i gyi‑o,
ke̱ mo̱ŋ de kɛɛ.
Fo̱ kuwureyii‑o e̱ kaapo̱ fe̱yɛ
kase̱ŋtiŋ ne̱ fo̱ de fo̱ e̱ ke̱e̱ fo̱ ase̱sɛ se̱.
9 Fo̱ maa kpa e̱bɔye̱, amɔ itimaa wo̱re̱ dooo.
Amo̱se̱ ne̱ fo̱ nyaŋpe̱ Wuribware̱ a sa ne̱
fo̱ kuwure‑o ke̱nyare̱ a de̱e̱ kyo̱ŋ fo̱ abɛɛko̱ lee‑o,
ne̱ oo yure fo̱, sa ne̱ fo̱ akatɔ a gyi kyo̱ŋ bamo̱ pɛɛɛ.”* Kiliŋ 45.6-7.
10 Wuribware̱ a be̱e̱ tɔwe̱ gywii mò̱ gyi‑o waa mò̱ wo̱re̱‑ɔ‑rɔ fe̱yɛ,
“Atɔ pɛɛɛ ke̱le̱e̱kaase̱‑ɔ, fo̱ ya twe̱e̱ kaye̱ na kamo̱‑rɔ ke̱tɔ ke̱maa.
Fo̱ asare̱e̱ ne̱ fo̱ a bo̱ waa so̱so̱ na mò̱ ke̱tɔ ke̱maa.
11 Amo̱ pɛɛɛ mɔ i kpuri fo̱ŋfo̱ŋ fo̱ŋfo̱ŋ, amaa fo̱ fe̱raa fo̱ i sii.
Amo̱ pɛɛɛ mɔ i wu a nye̱ra, fe̱yɛ ane̱ŋ ne̱ waagya i wu‑o.
12 Fo̱ e̱ bɔɔ amo̱ pɛɛɛ fe̱yɛ waagya ne̱ fo̱ i kyurowi, na fo̱ be̱e̱ taa ɔko̱ buŋ‑o.
Amaa fo̱ fe̱raa, fo̱ e̱ gye̱ fo̱. Ane̱ŋ ne̱ fo̱ du‑o dɛɛ ne̱ fo̱ du.
Fo̱ maa kyurowi kake ŋko̱ se̱, fo̱ bo̱‑rɔ bo̱ yɔ nsu pɛɛɛ.”* Kiliŋ 102.25-27 (LXX).
13 Ne̱ baa be̱e̱ kyo̱rɛɛ waa abware̱se̱ŋ wo̱re̱‑ɔ‑rɔ fe̱yɛ Wuribware̱ yɛ,
“Kye̱na mo̱ kigyise si mfe̱e̱
na n sa a fo̱ ado̱ŋ pɛɛɛ mɔ ba fo̱ kaase̱.”* Kiliŋ 110.1.
Amo̱‑ɔ pɛɛɛ ne̱ Wuribware̱ a tɔwe̱‑ɔ mo̱ŋ gye̱ mò̱ mbɔɔ‑ɔ kuŋu si ase̱ŋ, amaa mò̱ fɔŋfɔŋ mò̱ gyi‑o.
14 To, ne̱ ŋkee nsɛ‑ana e̱ gye̱ Wuribware̱ a mbɔɔ‑ɔ ne̱e̱? Bo̱ du ne̱e̱ fe̱yɛ afwii‑o, ne̱ bo̱ gye̱ Wuribware̱ ayaafɔre̱, ne̱ ba suŋ ba sa mò̱, ne̱ o suŋ bamo̱ fe̱yɛ bo̱ nare̱ kya bamo̱ ne̱ ɔ kpa a ɔ mo̱rɔwe̱ bamo̱‑ɔ‑rɔ.