Santiago
chuteca jun pila
Caque fiqui: Jacóbori in pila quinue. (Aman Jacobo Santiágonan joe.) Aman yari yachi ayan tenchi Jesucrístochi aco jominue. (Mateo 13:55-bi quirade!) Jesús in tote micarinasa yachi aco Jacóbori yabe cayaitutonan, ya mansonhinunbi cayainue. Junni Mantá Tanla 15:13-bi quirato tenhintsan joe in Jacóbori Jesucrístobe penenaminla tala mantá tan jominueque.
Aman Diosichi pilabi uyan postote tuca micarica joe Diosica quereitosiri se lontsan joeque. Pablo Románolachi Ereca Jun Pilabi tuca micarica joe monantiya Diosichi mantaca obedeseino podeituto, monantiya ya mantabe se lono podeitueque. Cayaito, seque quereito, se lonola joyoeque micarica joe.
Junni Jacobo in pila quino mate weyanlari ya sen fiquica palaque micarinaminlanue. Itsantimin jominlanue: Quereitosiri se lono jotori, junni Jesucrístobe cayaitobi, jutsa quiniqueyanae timin jominlanue. Diosi chiquilaca laquiratosiri se larica jotori, chiquila seitonque nenalarasanan paituchunae timin jominlanue. Junni Jacobo in pilabi tuca micarinae tsan itoeque. Jesucrístobe tsa cayaitori, yaca tsa quereitori, seque nenantsan joeque micarinae. Cayaicayoe titonan jutsa caquiniquito nenanari, junbe tenhintsan joe tsa cayaituca joeque. Ya fiquica, junsi duque uyan sen fiquica, Jacobo in pilabi micarinae.
1
La Santiago in pilaca chuteto erechinayoe. Diosibe mantaimin joto, junsi Miya Jesucrístobenan mantaimin joto, pila chutenayoe. Jerale ara cura chumin Diosichi tsachilachi erechun in pilaca chutenayoe. Nula jeralelabe saludainayoe.
Peleituntsan jonunca
2-3 Nulari Jesucrístobe cayaica jonun tenchi padeseilainae. Tsanque padeseinatori, nanni fe sonba tenca ito peleitumin ilaichunae. Nulari junca miralaranae. Junto Jesucrístobe cayaica jonun tenchi padeseinato, duque son jolajona! Jera sen tsachila jono muquilaquinari, natiya peleilaituna! Tsanque seque nenalaranari, nulachi tencabi natiya falta itochunae.
Ti quino jonuncatiya miitotori, Diosibe rocailaina! yape seque tenca cuwasa. Diosiri isapun itoe. Lucarituminnan jeralelachi cuwaniquimin joe. Junni nulachinan seque tenca cuwachunae. Juntonan Diosibe rocainato, Diosica seque tennato rocaintsan joe. Palaque tenca catuntsan joe. Palaque tenca caminlari lamari latsa cuwenta jolajochunae. Casale wu cayaito man nanchi jimin joe. Junsi man nanchiman jimin joe. Jun lamari latsa cuwenta tsachilari Miya Diosi yalachi cuwachunaeque tenca catuntsan joe. Palu tenca tan tsachila joto, palaque tenca cato nenaminla jochunae.
Poperelacanan, cala tanlacanan itsanque payinunca
9-10 Jesucrístobe cayaica junla tala weyanla popere tsachila jolajochunae. Weyanlari cala tan jolajochunae. Aman popere tsachilari son tinola jochunae Diosi yalaca sen jolajoe tichunae tito. Junni cala tanlanan popere manhino jototiya yape jochunae tito son tinola jochunae. Lapa luli cuwenta moora iton ilaichunae. 11 Duque pata quinari, lapari moora jequeito puyamanhe. Lapa lulinan jequeito jera queereiniimanhe. Casaleri uraran jominnan, moora yucapiyamanhe. Aman cala tanlari jun tsanquenan moora popere manhilaichunae cala camin jominnan.
Diosi tsachilaca se suwamin jonunca
12 Junni yucan nulaca jutsa quisa carichique tenfenari, jutsa quituminnan wantaintsan joe. Tsanque wantaiminlari duque son tilatichunae. Diosi wantaiminlaca numatotiya sonnasa carichunae premio cuwanun cuwenta. Yaca laquiraminlacari tsanque Numatotiya sonnasa cariyanae tinue.
13 Junni tsan josanan, jutsa quino tenca canatori, Diosica culpa quituntsan joe. Diosi laca jutsa quisa carinae tituntsan joe. Diosiri jutsaca munaino podeituto, mocanantiya jutsa quisa caritumin joe. 14 Tsachilari tenca mántanan seitonque tenca cato, jutsa quinoca tenca calaquichunae. 15 Junto jutsa quinoca tenca cano deitutori, jutsa quilaquichunae. Junni michi jutsa quinaminnan, jutsa tenchi puyalaichunae.
16 Junni acola, soquila, nulaca laquirato payichinayoe. Junni junca encanaituto meralaquede! 17 Diosisiri jera senca cuwamin joe. Yari yoca, peca, tsaboca quimin joto, yalari canbiyaiminla jonan, yari canbiyaitumin joe. Yasiri jera senca cuwamin joe. 18 Junto yachi tenca munate chiquilaca cae yape yachi tsara sen tsachila jolajosa. Diosi yachi tsarasi fiquica merása carito, chiquilaca yachi tsachila suwae.
Seque nenantsan jonunca
19 Acola, soquila, nula jeralelaca laquirato payichinayoe. Nulari tenca catuminnan palaquituna! Meracachiri duque meráminla jona! Paitulajona! 20 Pa tala nenatori, Diosichi mantate seque quilaquituchunae. 21 Junni seiton quito jutsa quicaca jera telaquepolaquina! Junca telaquepoto, Diosichi fiquica seque tenca cato meralaquina! Ya fiquiri nulachi tencaca se larino podeichunae.
22 Junni jun fiquica meráto, seque mantainola joe. Merátonan mantaitutori, epenan meralaquichunae. Tencachique encanaimin jolajochunae. 23-24 Merátonan obedeseitutori, to midica caforoca espejochi quiratonan mancasino pansica cuwenta jolajochunae. Niyan jonunca quirato manjitonan, pansiniichunae. 25 Weyanla mantimini espejochi quirato mancasimin cuwenta, Diosichi sen mantaca tenca cato meráminla jochunae. Diosichi casan mantabe mantaiminlari jutsaca wepanatuminla joe. Junni ya mantaca pansituto mantaito nenamin tsachilari pansi nenalarachunae.
26 Junni weyanlari Diosica tenca tayoe tinatonan, seitonque palaquichunae. Yalari epele tsantito, tencachiquenan encanailainachunae. Yala Diosica epele tenca caminla jochunae. 27 Diosica tsara seque tenca tanla mantimini apa iton nalalacanan, biudalacanan ayudaiminla jochunae. Diosica tennatuminla seiton quilaquinasatiya, yalari seiton quituminla jochunae. Junni Apa Diosiri yalaca sen jolajoe tichunae palaituto Diosiberi nenaminla joeque.