9
ፆሳይ ካሴ ዶሬዳ ኢስራዔሊያ ኣሳ
1 ታኒ ቱሙዋ ሃሳያይ፤ ታኒ ኪሪስቶሳሳ፤ ቃሲ ዎርዶቲኬ። ጌሻ ኣያናይ ሞዲያ ታ ቲላ ዎዛናይ ታኒ ዎርዶቴናዋ ታው ማርካቴ። 2-3 ታው ኣሹዋን ዛሬ ጊዲያ ታናዳን ኣማኒያዋንቶ፥ ታ ዎዛናን ዳሮ ቃሬታይኔ ኣጌና ቆፋይ ዴዔ። ኣዪሲ ጎፔ፥ ታኒ ታ ሁጴው ኡንቱንቱ ዲራው፥ ፆሳ ሼቃፔ ጋርሳና ዴዓሪኪታሻ! ቃሲ ኪሪስቶሳፔካ ሻኬታሪኪታሻ! 4 ኡንቱንቱ ኢስራዔሊያ ኣሳቱዋ፤ ፆሳይ ኡንቱንታ ባሬ ናና ኡዲዴ፥ ባሬ ቦንቹዋ ኡንቱንቱና ሻኬዳ። ኡንቱንቱና ቃላ ጌሊዴ፥ ሂጊያ ኡንቱንቶ ኢሜዳ። ኡንቱንቱ ፆሳው ቤሲያ ኦጊያን ጎዪኒኖ፤ ቃሲ ፆሳይ ኢማና ጌዳዋካ ኣኬዲኖ። ኬስ 4፡22 5 ኡንቱንቱ ዜሬꬃኒ ካሴ ኣዋቱዋ ዛሬ፤ ቃሲ ኪሪስቶሲካ ኣሹዋን ኡንቱንቱ ዛሬ። ኢ፥ ኡባፔ ቦላ ጊዲዴ ሞዲያ፥ ሜꬊናው ጋላቴቴዳዌ ፆሳ። ኣሜንዒ።
6 ሺን ታኒ፥ «ፆሳይ ኢማና ጌዳዌ ኣታና» ያጊኬ። ኣዪሲ ጎፔ፥ ኢስራዔሊያ ኣሳ ኡባቱ ፆሳይ ዶሬዳዋንታ ጊዲኪኖ። 7 ቃሲ ኣብራሃሜ ዜሬꬃቱ ኡባቱ ፆሳ ናና ጊዲኪኖ። ፆሳይ ኣብራሃሞሲ፥ «ኔ ዜሬꬃይ ዪሳቃ ባጋና ፄሴታናዋ» ያጌዳ። ዶም 21፡12 8 ሄዋ ጉሳይ ኡንቱንቱ ፆሳይ ኢማና ጌዳ ኦጊያን ዬሌቴዳ ናናይ ዛሪያዳን ፓይዴታና፤ ሺን ኣሳ ቆፋዳን ዬሌቴዳዋንቱ ፆሳ ናና ጊዲኪኖ ጉሳ። 9 ኣዪሲ ጎፔ፥ ፆሳይ ኢማና ጊዴ ሃሳዬዳዌ ሃዋ፤ «ታኒ ሃ ጌቴቴዳዋዳን ሄዎዴ ያና፤ ሳራካ ኣቱማ ናዓ ዬላና» ያጌዳ። ዶም 18፡10
10 ሄዋ ፃላላካ ጊዴና፤ ኢርቢቃ ዬሌዳ ማንቴ ናና ኣዉ ኢቱዋ፤ ኢካ ኑ ኣዉዋ ዪሳቃ። 11-12 ሺን ኢቲ ናዓ ዶሬዳ ፆሳይ ባሬ ሁጴው ቆፔዳዋ ጊዳናዳን፥ ፆሳይ ኢርቢቂው፥ «ባይራይ ቴፋው ኣዛዜታና» ያጌዳ፤ ኢ ሄዋ ኡንቱንቱ ዬሌታናፔኔ ኢታባ ዎይ ሎዖባ ኣይኔ ኦꬃናፔ ካሴና ጌዳ። ሄዋ ዲራው፥ ፆሳ ዶሩ ኣ ፄሴዳዋዳኒፔ ኣቲን፥ ኡንቱንቱ ኦꬄዳዋና ጊዴና። ዶም 25፡33 13 ፆሳ ማፃፋይ፥ «ያዪቆባ ሲቃዲ፤ ሺን ኤሳ ኢፃዲ» ያጌ።
14 ያቲና፥ ኑኒ ዋጋኔ? ፆሳይ ዴሺሲዴ ፒርዲ? ሄዋ ጊዴና። 15 ኣዪሲ ጎፔ፥ ሙሴው ኢ፥
«ታኒ ማራናው ኮዪያዋንታ ማራና፤
ቃሲ ቃሬታናው ኮዪያዋንቱሲካ ቃሬታና»
ያጌዳ። ኬስ 33፡19 16 ሲሚ ፆሳይ ኣሳ ማሪያዌ ኢ ማራናው ኮዪያ ዲራሳፔ ኣቲን፥ ኣሳይ ኮዪያ ዎይ ኦꬂያ ዲራሳ ጊዴና።
17 ኣዪሲ ጎፔ፥ ፆሳ ማፃፋይ ጊብፄ ካቲያሲ፥ «ታኒ ታ ዎልቃ ኔናን ቤሳናዉኔ ታ ሱንꬃይ ኣላሚያ ኡባን ኦዴታናው፥ ሄዋሲ ታኒ ኔና ካዉꬃዲ» ያጌ። ኬስ 9፡16 18 ሲሚ ፆሳይ ማራና ኮዪያዋ ማሬ፤ ቃሲ ዎዛና ጎርዳና ኮዪያዋ ዎዛና ጎርዴ።
ፆሳ ሃንቁዋኔ ማሮታ
19 ሲሚ ሂንቴ ታና፥ «ሄዌ ቱማ ጊዶፔ፥ ፆሳይ ኣሳ ባዪዙዋሲ ኣያው ቶሺ? ፆሳይ ጌዳዋ ኢፃዲ ጋናዌ ኦኔ?» ያጋናው ዳንዳዪታ።
20 ሺን ታ ላጌው፥ ፆሳሲ ዛራናው ኔኒ ኦኔ? ኡርቃፔ ሜꬌቴዳ ሚሻይ ጉዬ ዛሪዴ ባሬና ሜꬌዳዋ፥ «ታና ሃዋዳን ኣዪሲ ሜꬋዲ?» ጊዴ ኦቻናው ዳንዳይ? ኢሳ 29፡16፤ 45፡9 21 ዎይ ኡርቃ ሜꬊያዌ ባሬ ሜꬊያ ኡርቃ ባሬ ኮዪያዋዳን ኦꬃናዉኔ ኢቲ ማላ ኡርቃፔ ኢቱዋ ቦንቾ ሚሻ ኡዲዴ፥ ቃሲ ኢቱዋ ቶሼቴዳ ኦሱዋ ኦꬂያ ሚሻ ኡዲዴ ሜꬋናው ኣው ማቲ ባዌ?
22 ፆሳይ ኦꬄዳዌ ሃዋና ኢቱዋ። ኢ ባሬ ሃንቁዋ ቤሳናዉኔ ባሬ ዎልቃ ኤሪሳናው ኮዬዳ፤ ኢ ባሬ ሃንቁዋን ፒርዳናዋንታ፥ ባዪዛናው ጊጊ ኡቴዳዋንታ፥ ዳሮ ጌንጩዋን ዳንዳዬዳ። 23 ቃሲ ኢ ማሬዳዋንቶ፥ ባሬ ቦንቹዋ ኣካናው ጊጊሲ ዎꬄዳዋንቱሲ ኢ ኣይ ኬና ቦንቼቲንቶኔ ቤሳናው ኮዬዳ። 24 ኑኒ ኢ ፄሴዳዋንታ፤ ሺን ኣዪሁዳ ኣሳ ፃላላፔ ጊዴናን፥ ኣዪሁዳ ጊዴና ኣሳ ጊዶፔካ ፄሴዳ።
25 ሆሴዓ ማፃፋን ኢ ጊያዌ ሃዋ፤
«ታ ኣሳ ጊዴናዋንታ፥
‹ታ ኣሳ› ጋዴ ፄሳና።
ታኒ ሲቃቤና ዛሪያካ፥
‹ታ ሲቃቶ› ጋዴ ፄሳና። ሆስ 2፡23
26 ‹ሂንቴንቱ ታ ኣሳ ጊዲኪታ› ጊያዋ
ኡንቱንቱ ሲሴዳ ሄ ሳዓን፥
ኡንቱንቱ፥ ‹ዴዑዋ ፆሳ ናና› ጌቴቲዴ ፄሴታናዋንታ»
ያጌ። ሆስ 1፡10 27 ኢሲያሲ ኢስራዔሊያ ኣሳባ ያጊዴ ሃሳዬዳ፤
«ኢስራዔሊያ ኣሳይ ኣባ ማታን
ዴዒያ ሻፊያ ኬና ጊዶፔካ፥
ኡንቱንቱፔ ኣማሬዳዋንቱ ፃላላይ ኣታና። ኢሳ 10፡22-23
28 ኣዪሲ ጎፔ፥ ጎዳይ ሳዓ ቦላን
ዴዒያ ኣሳ ኡባ ቦላ
ኤሌካ ፒርዳና»
ያጌዳ። 29 ኢሲያሲ ካሴቲዴ፥
«ኡባፔ ዎልቃማ ጎዳይ ኑሲ
ኣማሬዳ ዜሬꬃ ኣሼኔንቶ፥
ኑኒ ሶዶማ ካታማዳኒኔ
ጋሞራ ካታማዳን ሃኔዶሺን»
ያጊ ሃሳዬዳ። ኢሳ 1፡9
30 ያቲና፥ ኑኒ ዋጋኔ? ፂሎቴꬃ ኮዪቤና ኣዪሁዳ ጊዴና ኣሳይ ኣማኑዋን ፂሌዳ፤ 31 ሺን ኢስራዔሊያ ኣሳይ ባሬንታ ፂሊሲያ ሂጊያ ኮዬዳዋንቱ ሄ ሂጊያ ዴሚቤይኪኖ። 32-33 ኣዪሲ ዴሚቤይኪኖ? ኡንቱንቱ ኦሱዋናፔ ኣቲን፥ ኣማኑዋን ፂሎቴꬃ ኮዪቤና ዲራሳ። ኡንቱንቱ ፆሳ ማፃፋይ፥
«ኣኬኪቴ፤ ታኒ ፂዮኔን ኣሳ ꬉቢያ ሹቻ፥
ኡንቱንቱ ኦጊያን ዛላ ዎꬃና።
ሺን ኣኒ ኣማኒያ ኦኒኔ ዬላቴና»
ያጊዴ ፃፌቶዋዳን ꬉቢያ ሹቻን ꬉቤቴዲኖ። ኢሳ 28፡16