2
Maria nara iisi Lamatua Yesus
(Mateos 1:18-25)
1-2 Ca tèka, ètu dꞌara Kirenius jꞌajꞌi gubernur ètu Siria, dhèu aae kapai Agustus, hia paredha, dhu peka na, “Dhèu aaꞌi-aaꞌi ètu paredha Roma, hudꞌi lèpa asa rae èta-èsu ra ho madhutu sensus!” Èèna heka hiu-lai kèna, dhèu paredha Roma ige ana kabarai na. 3 Ka dhèu aaꞌi-aaꞌi lèpa asa rai èta-èsu ra, sèna ka madhutu sensus.
4-5 Lodꞌo èèna, Yusuf pea ètu rae Nasaret, ètu propensi Galilea. Nèngu dhu lii dꞌai ana bhèni ca dhèu, ngara na Maria, dhu dènge le babia. Yusuf ne, ana-èpu nèti dhèu aae Daud. Ka nèngu hudꞌi lèpa ku asa kota Daud, nuka Betlehem ètu propensi Yudea, sèna ka madhutu sensus.
Nèti èèna ka, dua ra lasi asa kota Betlehem. 6 Ropa dua ra ètu nèi, Maria dꞌai lodꞌo nara iisi. 7 Te ngaa ètu èèna, dua ra abhu boe kama ètu dꞌara losmen. Nèti èèna ka, dua ra maso lasi asa dꞌara oka badha. Hèia Maria nara iisi Ana uuru, mone ca dhèu. Ka pasigꞌi Ne dènge kahaꞌi bèla, aa pajꞌunu ètu dꞌara karabꞌa, era badha raꞌa-rinu.
Ama Lamatua peka dènge ana madhenge badha
8 Mèda èèna, abhu ana madhenga badha dhèu pèri-pèri dhu beke madhenge kahibꞌi-kalèbho ètu dꞌara padꞌa ètu liꞌu kota.
9 Kacaꞌa laa, rèngu rèdhi ana pajuu Ama Lamatua nèti sorga. Hèia saraa Lamatua rai-reo nare rèngu, ka ra madhaꞌu bia. 10 Te ngaa ana pajuu ne peka,
“Baku madhaꞌu! Nanene pabeꞌa-beꞌa! Te jaꞌa ne mai ho peka lii lolo beꞌa èci hia miu. Cee dhu tadèngi lii neꞌe, tatu rèngu karejꞌe.
11 Lii lolo beꞌa ne, sèmi neꞌe ka:
Deo neꞌe, ca dhèu ina nara iisi le Kristus ètu Betlehem, nuka kota dhèu aae Daud.
Kristus neꞌe ka dhu Ama Lamatua pajaji tèke le karèi nèti uru ka.
Lamatua hia Na mai, sèna ka Na patabuli dhèu nèti koasa sasala-sasigo ra.
Nèngu neꞌe, èèna na dhèu paroa Na, ‘Lamatua’!
12 Pe miu tadhe Ne sèmi neꞌe ka: miu paraga dènge Ana rara iisi hiu ca dhèu dhu pahutu dènge sigꞌi. Ra pajꞌunu Ne ètu dꞌara karabꞌa.”
13 Ropa na padhai lii nare, hèia cagꞌagꞌa laa, ana pajuu Ama Lamatua ae-ae mai nèti sorga. Ka ra paꞌèci dènge ne. Hèia ra koa-kio kolongara Ama Lamatua dènge lii sodꞌa, peka na,
14 “Jiꞌi dedꞌe padedha-dedha kolongara Ama Lamatua!
Nèngu dhu nèdꞌu paredha ètu dedha-liru dhu dedha risi.
Ama Lamatua neo hia dame dènge mera-milu mi dhèu rai-haha,
dhu pakarejꞌe dꞌara Na!”
15 Èle ka, ana pajuu se lèpa hari asa sorga. Hèia ana madhenga badha se padhai lii, peka na, “Mai lati ku asa Betlehem, ho ladhe ku Ana nèi! Te Lamatua paꞌadhu le lii ne hia èdhi.”
16 Hèia lasi ka lai-lai asa Betlehem. Ka rèngu paraga Maria dènge Yusuf. Aa ladhe rèdhi kahèi Ana dhu heka rara iisi, dhu bhèjꞌi ètu dꞌara karabꞌa.
17 Ropa rèngu rèdhi Ana ne, hèia ra lolo, peka na, “Deo na ana pajuu Ama Lamatua nèti sorga dhu peka le dènge jiꞌi, lula-nèti Ana neꞌe ne!” Ka ra lolo aaꞌi-aaꞌi toke èle.
18 Dhèu aaꞌi-aaꞌi malaa-maloha, tadèngi lii lolo ana madhenga badha se. 19 Te ngaa Maria tèke ka ètu dꞌara na, aaꞌi-aaꞌi dhu jꞌajꞌi le. Aa na pangee mau-mau, ho neo neꞌa sasoa na tasa mera mia. 20 Èle ka, ana madhenga badha se lèpa hari asa era kahibꞌi-kalèbho ra. Hèia ra dedꞌe padedha-dedha kolongara Ama Lamatua. Ra manèngi makasi mi Lamatua, lula dhu rèngu tadèngi aa rèdhi dènge musi madha ra, lèke tareꞌa-reꞌa sèmi ngaa dhu ana pajuu Ama Lamatua peka sèra.
Ana iiki ne, ra pangare Na, Yesus
21 Ropa Ana iiki ne dꞌai aru lodꞌo, ka ra suna Ne madhutu atora Musa. Hèia ama dènge ina Na pangare Ne, ‘Yesus’. Ngara ne, ngara dhu ana pajuu nèti sorga peka le dènge rèngu, lodꞌo ina Na dènge mèka babia.✡ Lukas 1:31, Atora nèti Ama-ama Agama 12:3
Rèti Ana iiki ne, asa Èmu Kapua Manèngi-Mangajꞌi
22 Atora èci nèti baki Musa peka na, bhèni dhu rara iisi rare, dꞌai èpa nguru lodꞌo hudꞌi madhutu ku adꞌa, pamèu iisi ra ètu Èmu Kapua Manèngi-Mangajꞌi. Dènge jꞌara neꞌe, rèngu bisa maso sèmi biasa asa dꞌara èmu sabajꞌa. Nèti èèna ka, Yusuf dènge Maria lasi asa kota Yerusalem, sèna ka tao madhutu adꞌa. Lasi rèti dènge Ana iiki èèna asa dꞌara Èmu Kapua Manèngi-Mangajꞌi, ho saraka Ne, sèna ka jꞌajꞌi unu Lamatua.✡ Atora nèti Ama-ama Agama 12:1-8 23 Rèngu madhutu atora Lamatua dhu peka na, “Bhèni dhu nara iisi ana mone uuru, nèngu hudꞌi saraka ana ne jꞌajꞌi unu Lamatua.”✡ Kalua nèti Masir 13:2,12 24 Madhutu atora Lamatua, ladhe saraka ana èèna mi Lamatua, ina-ama hudꞌi hia ku koro iia ca pasa, do koro jꞌaha ngèru dua ngiꞌu. Nèti èèna ka, Yusuf dènge Maria tao madhutu atora èèna.✡ Atora nèti Ama-ama Agama 12:6-8
Baki Simeon peka na, Ana iiki dhu ngara Na Yesus èèna, nuka Kristus, dhu Ama Lamatua jaji tèka le
25-26 Taa èèna, abhu mone heka ca dhèu ngara na Simeon, dhu pea ètu kota Yerusalem. Nèngu ne dhèu dꞌara mola, aa dꞌèi Lamatua. Roh Lamatua dhu Mola-Mèci peka le dènge ne, na, nèngu hudꞌi nèdhi ku Kristus, heka na madhe kèna. Kristus èèna ka, dhu bèli-camèdꞌa hia mamuri mi dhèu Israꞌel.
27 Lodꞌo èèna, Roh Lamatua lere Simeon laꞌe asa Èmu Kapua Manèngi-Mangajꞌi. Lodꞌo èèna kahèi, ina-ama Yesus rèti Ne, ho saraka jꞌajꞌi unu Lamatua. 28 Ropa ladhe nèdhi Ana ne, ka Simeon saꞌu nare Ne, hèia na koa-kio kolongara Ama Lamatua, aku nèngu na,
29 “Koa-kio kolongara Lamatua!
Lamatua tao le madhutu lii pajaji Na mi dedha jaꞌa.
De neꞌe ne Lamatua bisa le patabuli jaꞌa,
sèna ka jaꞌa madhe dènge mera-milu,
30 te jaꞌa kèdhi le Dhèu dhu Lamatua pua mai,
ho patabuli jiꞌi nèti koasa sasala-sasigo jiꞌi!
31 Lamatua neo pake Ana neꞌe,
sèna ka hia mamuri mi suku aaꞌi-aaꞌi.
32 Nèngu nuka sèmi saraa,
dhu pakabꞌua suku-suku Israꞌel, dhèu Lamatua sèra.
Nèngu kahèi èci èèna ka dènge saraa,
dhu padꞌelo jꞌara Lamatua,
pala mi suku-suku leo kahèi.”✡ Yesaya 42:6, 49:6, 52:10
33 Ropa tadèngi sèmi èèna, hèia Yusuf dènge Maria malaa lula lii padhai dhu Simeon peka lula-nèti Ana rèngu ne. 34 Èle ka Simeon padhai lii hia si mèngi-nale. Hèia na peka dènge Maria, aku nèngu na, “Ina Yesus! Bèli-camèdꞌa dhèu ae ètu Israꞌel tule eele Ana èu ne. Te ngaa tatao rèngu mi dedha Nèngu ne, èèna na pamanahu hari rèngu. Ana neꞌe, bèli-camèdꞌa pakarejꞌe dꞌara dhèu ae kahèi. 35 Dènge jꞌara èèna, Lamatua bhoke patalele dꞌara dhèu. Te ngaa èu, Maria, pe mu paraga dènge jꞌajꞌèra ae-ae, nuka sèmi samala dhu lose adhe-usu èu.”
Bèi Hana manèngi makasi mi Ama Lamatua, lula Yesus
36-37 Ètu Èmu Kapua Manèngi-Mangajꞌi, abhu kahèi bhèni heka ca dhèu, ngara na Hana. Umur na, aru nguru èpa tèu kèna. Ngara ama na Fanuel, nèti suku Aser. Na leo-èmu pidhu tèu, ka dhèu èmu na madhe. Hana ne, dhèu nèti lii padhai Ama Lamatua. Nèngu loe boe sabajꞌa dènge puasa ètu Èmu Kapua Manèngi-Mangajꞌi, ho pahaha iisi mi Ama Lamatua mèda-mèu.
38 Lodꞌo Simeon padhai lii dènge Yusuf dènge Maria era, hèia Hana mai padètu-dètu. Ka nanene si padhai lii, hèia na koa-kio kolongara Ama Lamatua. Ka na padhai lii lula-nèti Yesus mi dhèu aaꞌi-aaꞌi dhu tatae mamai Dhèu Aae dhu Lamatua lii dhu moa tèke neo pua mai, sèna ka patabuli dhèu Israꞌel.
Ina-ama dènge Ana ne lèpa asa rae Nasaret
39 Ropa Yusuf dènge Maria tao le madhutu atora nèti baki Musa ètu kota Yerusalem, ka ra lèpa asa rae Nasaret, ètu propensi Galilea.✡ Mateos 2:23 40 Ka Yesus asa kapai, asa èra, asa dꞌèlu-mèu dènge neꞌa madha jꞌara ae-ae. Aa Ama Lamatua padꞌelo dꞌara hua iia Na mi Yesus kahèi.
Lodꞌo Yesus ana iiki era, laꞌe dꞌara Èmu Kapua Manèngi-Mangajꞌi
41 Yusuf dènge Maria dhu tema le, tèu mai-tèu mai lasi asa kota Yerusalem ho madhutu kalela Paska ètu nèi.✡ Kalua nèti Masir 12:1-27, Lole Hari Jꞌara-jꞌara Mamuri 16:1-8 42 Ca tèka, ropa umur Yesus canguru dua tèu, hèia laꞌe palere dènge ina-ama Na asa Yerusalem, lasi raꞌa kalela Paska sèmi biasa. 43-44 Lodꞌo èle Paska, Yusuf dènge Maria mulai lèpa lasi asa Nasaret palere-lere dènge dhèu ae dhu lèpa asa Galilea. Te ngaa rèngu reꞌa boe, na, Yesus ètu Yerusalem era. Ra pangee, na, Nèngu palere dènge mone aanga-angalai Na. Te ngaa ropa dꞌai lodꞌo nihia, Yusuf dènge Maria rèdhi boe Ne. Ka dua ra mulai patangi-tenge kèna. Lasi pakarèi mi aꞌari ra, aa mone aanga-angalai ra. 45 Lula rage boe Ne, hèia dua ra lèpa hari sa Yerusalem, lasi tenge Ne ètu nèi.
46 Dꞌai nèi, ra patangi-tenge Ne toke tèlu lodꞌo kateme, heka paraga dènge Ne kèna, ètu dꞌara Èmu Kapua Manèngi-Mangajꞌi. Nèngu dhu madhèdi padhue-padhai dènge mese agama Yahudi sèra. 47 Dhèu aaꞌi-aaꞌi dhu nanene lii dhaa Na, malaa-maloha, lula Nèngu tareꞌa-reꞌa neꞌa mèu isi Sasuri Mola-Mèci Ama Lamatua, aa Na neꞌa dhaa lii karèi dènge mola. 48 Rèdhi sèmi èèna ka, ina-ama Na malaa kahèi. Hèia ina Na lii, aku nèngu na, “Yesus! Nga tao ka Èu pajꞌèra jiꞌi sèmi neꞌe? Ama Mu dènge jaꞌa patangi-tenge Èu heo dꞌèlu!”
49 Te ngaa Yesus dhaa, peka na, “Nga tao ka ina dènge ama pajꞌèra iisi tenge Jaꞌa? Meꞌa, si? Jaꞌa dènge urusan ètu Èmu Ama Ku.” 50 Te ngaa rèngu reꞌa rare boe sasoa lii Na.
51 Hèia aaꞌi-aaꞌi ra lèpa asa Nasaret. Ka Yesus madhutu kahèi dadꞌèi ina dènge ama Na. Ka ina Na tèke aaꞌi-aaꞌi seꞌe ètu dꞌara na. 52 Hèia Yesus asa tabha kapai, asa tabha dꞌèlu-mèu, asa pakarejꞌe dꞌara Ama Lamatua, dènge dhèu rai-haha asa tabha dꞌèi Ne.✡ 1 Samuel 2:26, Lii Hini 3:4