Jon Laapo
Ripili Agale
Lotu adana ali mudu meda Jon-me go pepa lisa. Enaali adaapumiri lotu ada komea-para piri enaalinu piri lu rapaasa-aina kone wisa. Nimumi yago raaname komoma makirae agale le alinu waru adoma aina kone wisa. Go alinuri Gote-na agale mabebola-ae alinu yaade.
Robonu go-rupa adamina:
Abala adape agale (1-3)
Ranaa komape agale (4-6)
Makirae tisaa alinu waru adalepape (7-11)
Pora po agale (12-13)
1
Jon-me pepa rana laapopa gupa rapasa
Niri Gote-na ruru enaalinuna ali mudu Jon-me go epe ena-para* Go agalere ora ena-para na-lisa. Dia, Esia su-para piri enaalinu-para saa pi agale lakelisa. Gore Jon-me go lisa: Neme nimi raana komalo-rupare ora agale ria makuaaeme enaalimi page nimi raana waru komenalo lakelisua. Gore Esia su-para piri Krias-na ruru enaali-para lisa. nena nogo naakinu-para go agale luma rapaato. Gore nimi Esia su robo-para piri enaalinuri neme nimi madaa ranaame waru komalo. Go pea pare neme kama-daa dia. Enaali raayome ora agale pageme rabu go enaalinumi nimi madaa ranaame komalimi. Gore ora agalena re-re naame naana lo robaa-para maa samina. Go puma ade abuna page naa madaa salia. Gore Aapa Gote-para nipuna Si Yesu Keriso laapome nipuna raba meape kone-para kodome komape kone pare epe kuma pi kone-para naa gea. Go mealima rabu naa ora agale loma enaalinu ranaame komamina.
Naame pedo puma raaname komape kone samina
Gore nena nogo naakinu medalomame ora agale loma epe pora raleme-daa neme raaname waru kome. Go-rupa pamuapeaina Aapame agale mana naa lagiaa. Go puma abi neme nimi epe enaali-para go-rupa lagialo: Naa raayome ranaame komamina. Go agalere neme kagaa agale mana nalagialo. Dia, ora abala ririnare nimimi go agale mana pagisimi. Gore ranaa komape kone madaare naame Gote-na agale mana pagisimide-rupa go agale waru pago pora pamuamina. Go abala ririna pagisimade agale manare go-rupa: Nimi raayome ranaame komape kone muma piralepape.
Naame Keriso-na agale waru saapiramina
Gore Mudu enaali adaapumi naa makiralalo su raayona pora pamuaeme. Go puma nimumi Yesu Keriso nipu abalade su kamaa ali naipisa leme. Gore ali medame go-rupa teare go ali nipu ora makirae agale le ali piruma nipu Keriso-na yada lore ali pia. Go pea-le nimimi elenu mulalo kogono peme-le nimimi nimina kone waru suma mo mealiminalo yoto ora mealimina. Go palimi rabu nimina rudunu page na-alupalia pare raayo mada mealimi. Go pea pare ali medame Keriso-na epe agale mana waru napagoma nipu koe kone suma Keriso-na kone raapu napitiare go-rupa paliade aliri Gote nipu raapu napiralia. Go pea pare ali medame Keriso-na agale waru pago raitalia-daare go aliri nipu aapa-para Si laapo nipu raapu pirualia. 10 Go pea-le ali meda nimi piri-para epa agale abala pagisimide namuma epaliare gore nimimi nipu nimina ada-para nalamua pulupape. Go page nimimi nipu-para epe-rupa pirape lo agale natapape. 11 Gore ali medame go ali-para epe-rupa pirape tea-daare gore nipuna pea koe kogono raba mulalo lea.
Agale medaloma
12 Neme nimimi adaliminalo agale adaapu pepa mada luma rapaano waape pina-le neme nimi adola epaluade raburi agale waru lagialua. Go puma naame raaname waru komoma komea-para piruma agale lamina.
13 Gore nena epe baalina nogo naakinumi ne-para epe-rupa pirape lo agale rapaateme.

*1:1: Go agalere ora ena-para na-lisa. Dia, Esia su-para piri enaalinu-para saa pi agale lakelisa. Gore Jon-me go lisa: Neme nimi raana komalo-rupare ora agale ria makuaaeme enaalimi page nimi raana waru komenalo lakelisua. Gore Esia su-para piri Krias-na ruru enaali-para lisa.