Maakusi
Den sani fu Masaa Jesesi di Maakusi sikiifi
Wan wowtu a fesi
Da disi na di fu tu man di e sikiifi fu den sani di Masaa Jesesi waka du di a be e tan a goontapu ya ete. Da na a pisi buku ya den e kai, Maakusi. Bika ne en na a man di sikiifi a pisi buku ya. A wantu taa pisi fu Masaa Gadu Buku den e kai a man ya, Johanisi Maakusi. A man ya, a ná be wan fu den twalufu apaiti bosikopuman di be e waka a Masaa Jesesi baka ibii yuu. Ma a be de wan biibisama fu a ten fi en de.
Da den sani di Maakusi sikiifi, a sikiifi san taa sama be taigi en anga san enseefi be sabi. Bika di den bakaman fu Masaa Jesesi sete a wooko e tyai a mofu e paati a den kondee kondee, da Maakusi be de anga den a ini a wooko. Somen sama e si enke na Peitilisi taigi en somen fu den sani di a sikiifi. Bika ai kai Peitilisi nen tyaipi leisi a ini a buku ya.
Da den fo sama di sikiifi sani fu a libi fu Masaa Jesesi a goontapu ya, da son fu den sikiifi moo fini fini fu den sani di Masaa be e leli. Ma Maakusi sikiifi moo fini fu den sani di Masaa Jesesi du, fu libisama sa sabi taki Masaa Jesesi abi gaan kaakiti anga gaan taanga tuu.
Da den leliman e si enke Maakusi sikiifi a buku ya 70 yali baka di Masaa Jesesi be meke kon a goontapu. Da a sikiifi a buku ya gi den taa foluku di á de Dyusama, moomoo gi den biibisama fu Loma Foto fu gi den taanga sikin. Bika na a ten de, da lanti fu Loma be e feti anga den e kii somen biibisama.
1
A bigin fu a Bun Nyunsu
fu Jesesi Kelestesi
Mt 3:1,2; Lk 3:1-18; Jn 1:19-28
Disi na a bigin fu a Bun Nyunsu fu Jesesi Kelestesi, a Manpikin fu Masaa Gadu. Enke fa Jesaja, wan apaiti takiman fu Masaa Gadu be sikiifi a fositen taki:
“Mi Masaa Gadu ya o sende mi bosikopuman go a fesi, fi yu.
Da dati o seeka pasi gi yu.
Da a tongo fu wan bosikopuman o bali a ini a gaan sabana taki:
‘U seeka pasi gi a Masaa,
meke a pasi sa kon taampu letiopu tollo.’ ”
Johanisi e dopu sama
Da Johanisi a Dopuman de a ini a gaan sabana e bali den sama fu kon teke dopu, fu daai libi. Meke Masaa Gadu sa gi den paadon, fu takuudu anga ogii. Hii Judeja anga ala sama fu Jelusalem kon a Johanisi. Da, te den begi Masaa Gadu paadon fu ala den takuudu anga ogii fu den, da Johanisi e dopu den a ini Joodani Liba. Johanisi seefi, be wei koosi di be meke anga a uwii fu a meti di den e kai kameili. Da a be e wei wan banti, di meke anga meti buba ne en nekilasi. Da na makonkon anga bosi oniki na be en nyanyan. Da a be e bali bosikopu taki: “Awan di o kon a mi baka, makiti bigi moo mi. Mi á dyendee sai, fu bendi losi en susu puu a futu gi en seefi. Mi e dopu u anga wataa! Ma en dati o dopu sama anga a Apaiti Jeje.”
Johanisi dopu Masaa Jesesi
Mt 3:13-17; Lk 3:21,22
Da a seefi yuu de, ne Masaa Jesesi komoto a Nasaleti, na a pisiwataa fu Galileya kon, ne Johanisi dopu en a ini a Joodani Liba. 10 Da di Jesesi e komoto a ini a wataa, ne a si, tapu a den woluku piiti opo palan. Ne a si a Jeje fu Masaa Gadu e kon ne en tapu enke wan doifi. 11 Ne wan Tongo taki a tapu anda taki: “Yu na mi Manpikin di mi lobi. Mi hii ati e piisii anga yu.”
Didibii tesi Masaa Jesesi
a ini a sabana
Mt 4:1-11; Lk 4:1-13
12 Da wanten wanten, di Masaa Jesesi dopu, ne a Jeje fu Masaa Gadu tyai en gwe a ini a gaan sabana. 13 Da, di Masaa Jesesi de a ini a sabana, ne saatan, a didibii kon. Ne a tesi en fotenti dei anga neti langa. Da, den ogii meti fu a sabana be de ape tu. Ma den Basiya fu Masaa Gadu Kondee*f1* be de anga Masaa Jesesi, e yeepi en.
Masaa Jesesi kai den fosi
bakaman fi en
Mt 4:12-22; Lk 4:14,15; 5:1-11
14 Da di den sooto Johanisi a Dopuman ne Masaa Jesesi daai go a Galileya, go e gi den sama a Bun Nyunsu. 15 A taki: “A yuu doo, di a Nyun Tii fu Masaa Gadu kon de koosube. Da daai libi, fu biibi a Bun Nyunsu fu Masaa Gadu.”
16 Da wan dei di Masaa Jesesi e waka pasa na a sikin liba fu a ze fu Galileya, ne a si tu man e towe seepi. Wan fu den man ya na Simon. Da a taawan ne en baala Andeleyasi. Da na sete seepi kisi fisi, na den wooko di den be e du kaba. 17 Ne Masaa Jesesi taigi den taki: “U kon waka a mi baka! Mi sa leli u fa fu kisi libisama pe fu kisi fisi.” 18 Ne wanten wanten, den fika den seepi, ne den bigin waka a Masaa Jesesi baka.
19 Ne, di Masaa Jesesi waka go pikinso moo faawe, ne a si ete tu fisiman, Jakowbesi anga Johanisi, den tu manpikin fu Da Sebedi. Den be de a ini wan boto e seeka den seepi. 20 Ne Masaa Jesesi kai den wanten fu den kon waka ne en baka. Ne den fika den dda, Da Sebedi anga den wookoman a ini a boto, ne den waka a Masaa Jesesi baka.
Fa Masaa Jesesi makiti bigi
Lk 4:31-37
21 Ne den gwe a Kafalnayemu. Ma namo, di a kina dei fu den Dyu doo, ne Masaa Jesesi go a ini wan fu den Dyu keliki. Ne a bigin leli den sama Gadu wowtu. 22 Da den sama foondoo, fu a fasi fa ai gi leli fu Masaa Gadu. Bika a á be e leli den enke fa den leliman fu Dyuweiti gwenti leli den. Ma a be e leli den, enke wan sama di sa sidon taki a Masaa Gadu peesi.
23 Da a yuu de, da wan man be de a ini a keliki osu de anga wan takuu jeje ne en tapu. Ne a bali taki: 24 “San wi anga yu abi, Jesesi fu Nasaleti? A kon i kon fu poli wi kaba a soso? Mi sabi sama a yu! Yu na a Apaiti Sama fu Masaa Gadu.”
25 Ma Masaa Jesesi kaasi en taki: “Tapu mofu! Komoto ne en tapu wanten!” 26 Ne a takuu jeje subi te en sikin e dansi. Ne a bali taanga komoto gwe.
27 Ala sama fiya foondoo. Taawan e akisi taawan taki: “San a disi? Disi na wan nyun leli anga makiti fu Masaa Gadu! Ai kaasi den takuu jeje, da den e gwe tuu.” 28 Da a sani di Masaa Jesesi du ya, paati na a hii pisiwataa fu Galileya.
Masaa Jesesi deesi somen sama
Mt 8:14-17; Lk 4:38-41
29 Da, baka di den komoto na a keliki osu, ne den go wanten na a osu fu Simon anga Andeleyasi. Da Jakowbesi anga Johanisi go anga den tu. 30 Da a main fu Simon de a bedi anga feba. Da di den doo na a osu, ne den taigi Masaa Jesesi fu a siki fi en. 31 Ne Masaa Jesesi waka go ne en. Ne a oli en ana yeepi en fu a opo sidon. Ne wanten wanten a mma kon bun kelle fu a feba. Ne a seeka sani gi den fu den nyan. 32 Ne di sapaten, di san go a ondoo, ne den tyai somen sikisama anga sama di be abi takuu jeje a den tapu, kon a Masaa Jesesi. 33 Da a hii foto ali kon na a osu doo mofu pe Jesesi be de. 34 Ne Masaa Jesesi deesi somen sama di be abi ala sowtu siki. Da soseefi a yaki somen takuu jeje puu a sama tapu. Ma Masaa Jesesi á gi den pasi fu taki, bika den sabi sama ne en.
San Masaa Jesesi leli wantu sama?
Lk 4:42-44
35 Mamanten fuuku, fosi san opo, ne Masaa Jesesi go a wan koo peesi, pe en wawan be sa de fu begi taki anga Masaa Gadu. 36 Simon anga den taa bakaman e suku pe a de. 37 Ne, di den fende en, ne den taigi en taki: “Ala sama e suku yu.”
38 Ne Masaa Jesesi piki den taki: “Meke u go a den taa kondee di de koosube ya. Mi mu paati a Bun Nyunsu fu Masaa Gadu anda tu. Bika na fu dati ede mi kon a goontapu.” 39 Da na so Masaa Jesesi go paati a Bun Nyunsu fu Gadu a ini den keliki fu a hii pisiwataa fu Galileya. Da soseefi a yaki takuu jeje puu a sama tapu.
Masaa Jesesi deesi wan gwasiman
Mt 8:1-4; Lk 5:12-14
40 Ne wan gwasiman kon a Masaa Jesesi. Ne a kai ne en kini tapu e begi Masaa Jesesi taki: “Masaa Jesesi! Mi sabi taki efi i wani i sa deesi, baa.”
41 Ne tyali fu a man kisi Masaa Jesesi. Ne a langa ana, ne a oli en. Ne a taigi en taki: “Mi wani! Kon bun!” 42 Ne wanten wanten, ne a man kon bun kelle. A gwasi siki komoto ne en sikin gwe fiyaa. 43 Ne Masaa Jesesi sende a man ya gwe. Ne a bali en taanga taanga taki: 44 “Yu á mu taigi ná wan sama a sani di pasa ya, ye! Ma pe fu dati, go a den hei apaiti begiman fu keliki, meke a si yu taki, i kon bun tuutuu. Tyai a paiman fu Gadu enke fa a weiti fu Mosesi e taki. Da den sama anda sa si taki i kon bun tuutuu.”
45 Ma, di a man gwe, ne ai taki fa Masaa Jesesi deesi en. A paati a bosikopu na ala peesi te, Masaa Jesesi nen bali na ala peesi. Da winsi pe fu a kondee di Masaa Jesesi be go, sama be e kon ne en tyaipi. A dati meke a be e tan a peesi pe sama á be ipi. Ma toku seefi sama be e komoto na ala se e kon ne en.