1 Dokopa Jisasa baanya disaipolo dupa-pipa Galilea pete omotena, Gerasamanya yuu dokonya peami. 2 Pao pyakamatala, Jisasa baa sipi doko yakinatala peamopa, akali imambu koo paleta mendeme endakali malu katenge dupanya katao ipao baa kandanyia. 3 Akali doko endakali malu katenge dupanya palenge. Endakali mendeme sene kendemepi baa anjala naengema. 4 Paa longosa baa sene kendepi, anengapupi, dupame anjeta pilyaminopa, baame dupa minao pindanya nepenge. Dopa pilyamopa, endakali mendeme kapa pao baa minao lambapenge nanjingi. 5 Kuka kotakapi, koteaka lao baa endakali malupi, yuu mandapi, dupanyaka paliu katenge. Dupanya katapala ae latae katao, baanya yonge doko tange kaname konjeta pingi.

6 Jisasa londati joo kateamopa, akali dokome kandatala, alo pyao ipupala baa kateamo dosa luma lakea. 7-8 Luma lakapeamopa, Jisasame baa lamaiyoo, “Imambu koo, embame akali dake yakinatala puu!” lea. Dopa lateamopa, baame puu lao, “Jisasa, emba Gote Etete Ketae Katenge dokonya Ikiningi. Embame namba aipa pitipi? Embame Gotenya kenge dokonya kyeto joo, namba tanda andake nanditoo lao laa” lea.

9 Dokopa Jisasame baa tipa pyoo, “Emba kenge apipi?” lea. Dopa leamopa, akali dokome yanu pyao, “Naima imambu koo longo kalyamano. Tenge dokonya, namba kenge Longo lengena” lea. 10 Dopa latala, imambu koo dupame kongo latae katao, nyakama yuu dokonya pyao watala naena lao wii lao tee leami.

11-13 Mena tausene lapomapi mende manda kili-kili dokonya nao kateami. Dokopa, imambu koo dupame Jisasa tee lao, “Naima mena dokaita-kisa landa pyalapa lapoko!” leami. Dopa leaminopa, mena dokaita-kisa kolandena leamopa, imambu koo dupame akali doko soo yakinatala, mena dupa-kisa pao landa piami. Landa pyateaminopa, mena elyambu doko pitaka alo pyao pao, endaki pete dokonya mangatala kumiami. 14 Kumateaminopa, mena setao katenge dupa taononyapi, mee akali palenge yuu dupanya paka pupala, dopa pyomona lao lamaiyami. Lamaitiaminopa, endakali dupame piamo dupa kanja epeami. 15 Dupa Jisasa kateamo dokonya ipupala kandeaminopa, wamba akali imambu koo longo paleta kateamo doko indupa yonge pee dupa petala, mona paliu peteamo kandatala, paka kaeyami. 16 Dokopa wamba kandeamino endakali dupame ene kanja epeamino dupa dopa pyomona lao lamaiyami. 17 Lamaitiaminopa, dupame kongo lao Jisasa baa nyakamanya yuu doko yakinatala, pena leami. 18 Dopa leaminopa, baa sipi dokonya pyakalyiamopa, wamba imambu koo paleta kateamo dokome baa apata buape lea. 19 Dopa leamopa, Jisasame daa latala, “Kamongome emba kondo kaeyapala, embanya pyakalamo dupa andaka pupala, emba tata dupa lamaipi” lea. 20 Dopa lamaitiamopa, akali dokome pupala, baa-kisa Jisasame piamo dupa pitaka yuu Dekapolisa dokonya panao lamaiyamopa, endakali siamino dupa pitaka walu leami.

21 Jisasa baa sipi dokonya pituu, Galilea pete dokonya yangitena pilyetala kateamopa, endakali longo mendapu ipao kambu piami. 22 Dokopa Judamanya lotuu anda mendenya isingi akali Jairusa lenge doko epea. Ipao Jisasa kandatala, baanya moko siamo dosa tombauli sepala 23 kongo lao, “Nambanya wanenge doko kumalanya pilyamona, embame baa-kisa kingi setapala, saka nyakala ipu” lao tee lea.

24 Dopa leamopa, Jisasa baa-pipa apata peambinopa, endakali longome baa watao pupala, katao tambukiniami. 25 Kateamino dupanya enda mende ee kana 12 dutupanya yuu gii dii lao angupae kandenge doko etala naeya. 26 Dopa piamosa, enda dokome dokosa longo dupa-kisa muni longo nepeamoaka doko, dupame angi nisala naeyamopa, etete koeyala pea. 27-28 Jisasame pilyamo lapae dupa sepala, enda dokome maitakaita pupala, Jisasanya yonge peenya watandato doko, baanya yaina doko mee jakalapomona lao masetala, baanya yonge pee dokonya kingimi watandea. 29 Watandalu piamopa, enda dokome baanya yaina doko etalumu lao sia. 30 Dokopa Jisasa baanya pupu lapae mendatupa puumu lao sepala, endakali kambu kateamino dupa kandapilyetala, “Apimi nambanya yonge peenya watandelyape?” lea. 31 Baanya disaipolo dupame yanu pyao, “Endakali kambu dakeme emba katao tambukinilyamino kandeleno doko, aipuma embame 'Apimi namba watandelyape?' leepe?” leami. 32 Dopa leaminopa, apimi pyape lao kanjanya, Jisasame kandayoko lea. 33 Dopa piamopa, enda dokome baa-kisa piamo dutupa pitaka masetala, paka kaeyao, walu lao ipao Jisasanya moko seteamo, dosa tombauli sepala, baame piamo dupa pitaka panao Jisasa lamaiya. 34 Dokopa Jisasame enda doko lamaiyoo, “Wanaku, embame namba tungi pyapino dokome, embanya yaina doko etelyamona, emba mona yaepatala puu” lea.

35 Dopa lao kateamopa, Judamanya lotuu anda isingi akali Jairusanya andaka katao, akali mendapuame ipupala Jairusa lamaiyoo, “Embanya wanenge doko kumatalamona, mana lenge akali doko epena laa naenya, kaeya” leami. 36 Dopa leaminopa, Jisasame soo nasili petala Jairusa lamaiyoo, “Embame paka nakaenya, Gote tungi pyatala katape” lea. 37 Dopa latala baame endakali pitaka baa watao naepena latala, Pita, Jemesa, Jemesa kaiminingi Jonepi, dutupa-pipa iki peami. 38 Pao Jairusanya andaka pyakamatala kandeaminopa, endakali dupame yako lao ee leami. 39 Dokopa Jisasame andaka kolandatala dokaita lamaiyoo, “Aipuma nyakama yako lao ee lelyamipi? Wanaku doko kumala naeyalamo. Mee luu palelyamona” lea.

40 Jisasame leamo doko sepala, endakali dupame baa kilya kandao gii kaeyami. Dopa piaminosa, baame dokaita watao kamanda pyalyetala, wanaku dokonya endangi takangepi, disaipolo tepoma apata peamino dutupa-pipa iki wanaku kumapae siamo dokonya peami. 41 Pupala wanaku dokonya kinginya minatala baa lamaiyoo, “Talita kum” lea. (Pii dokonya tenge doko, “Wanaku emba sakata.”) 42 Dopa leamopa, wanaku ee kana 12 patae doko sakatatala paeya. Paeyamo kandatala, dupame etete paka kaeyao, walu leami. 43 Dokopa Jisasame dokaita etete kyeto joo lamaiyoo, “Endakali dupame pyomo dake setamina, mende lamaiya naeyalapape” lea. Dopa latala, “Baa nee nena maiyepa” lea.