ARUKU AOGI KAMANA KAEMARANTIYE
1
Aruku esa kaemagina ka tabe yagara amintiye
1 Teyopiro, tabe yagarare, abakatepi Koti kao'ena puratama mono yuga punti kamanapa uwoma kina'mi aogima arabama kaentawe. 2 Pi kamanapa Isu nkagora mintanta kina'mi agama abintini, piya mayaenama nkagowapa abinta kina'mi nkuraminta kamana kaentawe. 3 Pigoya, naeba pabiyama nabegi, agorasa a'ya'waemaena aboraurite kananti, pika pasema aisuma a'ya uritegi, kau'nana kamana uma kaeyuwe. 4 Pigoya, pipa aisuma mayama abibebe po. Mono ugamintapa taga au'wantaga'ena, ka'isa kina'mi nkugaminta kamanapa kaeba aogima aisumagina, abibebe po.
Yoniba aborakiyema, enisorewama Sekaraya omintiye
5 Pigoya, Erotiba Yuta kina'mi nkwa'ega yagara mintome kanabi, mono kiye yagara ka mintantiye. Agewapa Sekaraya, aeba Abaisa ae mono yuga aruyenabisa yagarawe. Waya'wapa Eroni mpono yuga aruyenabisa pi nkatutasa, agewapa Erisabeti mintantiye. 6 Pigoya, isigeba Koti nkaobi isigupa aogima atamaginisi mima, a'ya'ma Wa'egawama unti kamanape arupu kamana'wape aogima wasima mintantase. 7 Piya, Erisabeti anamo wae mintika, isigeba yagarawaisi kampa minta mima, karena aenta tantase.
8 Pigoya, Sekarayage aokina'mige Koti mpono yugawai pikenagana aboraogini, 9 irosa'magini Koti ntuga uwaitantemi ntuga iyota iyota puma maentini, Sekarayapa kunka aguntaena kaeyanema otauguna, Koti ntamankama nkagupinti uma pasintiye. 10 Piya pogini, wa waya uwa kinapa abe'i kumati aki puma mima, Wa'ega esotama mintuguna, 11 kunka aguntaena kaeyogana, Wa'egawamatisa enisore aboramagina, kunka aguntaena kaekenaenara ayatakantisa auka'i asima mintantiye. 12 Asima mintogana, Sekaraya agate pami pumagina aekuru puntiye.
13 Piya pogana, enisorewama maya omintiye: Sekaraya, kaeba a-kaekuru po. Wa'egawamaba esotakanaba abintika, wayakampaba aga'e puma, yagara ka yakari pekanaba, kaeba ae ageba Yoniwe omo. 14 Pigoya, kae kantawamaba aogi puma, asoya pekana ka'mu pikibene. Piyama aborakiniba, uwoma kina'mi abigina iga pukiye. 15 Pi ntagara Wa'egawama nkaobi tabe kina'ena puma mikiye. 16 Aeba esegi wanipa a'a-o uma miyekana, Aota Awamusa'amaba inamugantora agupi tumima pumaekiye. Pumaeyakana, Isureyo kina uwoma kina igu a'wae pekini, Wa'egawama, tabe Kotiwaimpa agorasaena pikibewe. 17 Piya, poropete yagara Iraiyati aumabe esegiyenabe waintanti, pabiyama waintantakana paitamagina, wama Wa'egawama nkawaga kamana ikena kina'ena puma mikiye. Pigoya, abawampabe yagarawampabe ige igu maema paru puma kayone puwaitakini, ka'masa puma mikiye. Piya, ikeri pakibe kinapa uwaitakini, to a'wae puma aegaranta kina'mi nkaruyenaba uma mikibewe. Piya pekini, wasanamiba a'ya'waema Wa'egawamaka aseyo puma mikibewe, untiye.
18 Pigoya, enisorewama piya yogana abintana, Sekarayaba kamana mayama a'wae pomintiye: Naebe waya'nepe tasigeba ago karena aenta tause. Pikaga kamanakapa ayama abibebe pukuwe, yogana, 19 enisorewama maya omintiye: Abeno. Nagenepa Kebariyo, naeba Koti nkaobi miyo'nana, nagarubagi kaeti tumima aogi awaga kamana ugamoganapa, 20 kampa abibebe pene. Pi'na antotapa aibo'ena puma, kamana kampa unta kina'ena puma mintagana, kamana ugamo kamana'amaba au'wantaga'ena pikiye, piya omintiye.
21 Pigoya, Sekaraya aeba tabe mono namapinti e'erota mintogini, wa wayapa igeba agawa puma mimagini, uwoma nkigi napintawe. 22 Piya puguna, ainti igeti tumimagina, kamana uwaimikena igiga puntiye. Aibogini igeba maya untawe: Aeba tabe mono namapinti to ka aoso'ena agai'nawe, yuguna, pigo aeba ayatasa awame puwaiyakintiye. Awamupisa kamanapa kampa untiye.
23 Piyama mintogana, yoga pikena kana'wapa a'ya pogana, atate kumati wantiye. 24 Pigoya, ainti waya'wampa Erisabeti aga'e puntana, opa nayaka'mu kakama mintantiye. Piya puntana maya untiye: 25 Wa'egawama aeba kana atanti, pipa aborakanaba aogi punatamagina anamo nanintanaba asu'a punagaintiye, untiye.
Enisorewama: Isu aborakiye, Mariya omintiye
26 Pigoya, tonaentisa ka'umaema upa Erisabeti aga'e pogana, Koti nkenisore yagara Kebariyo agarubaogana, Karariya mari Nasareti kumati tumimagina, 27 aragawae'mati tumintiye. Kana aragawae'ma nkagewapa Mariyawe. Pigoya, kiya yagara Tebiti nkayabama, agewapa Yosepe mintana, kana aragawaepa maekiyema ika potantiye. 28 Aibuguna, kana enisorewama Mariyati wama maya omintiye: Aya pene. Wa'ega Yagara kagora mima, kaeka a'mu pugatama abegina aogi piye, yogana, 29 Mariya kana enisore yagarama yome kamana abite aekuru pumagina: Kamana agowapa ayabayawema, napintiye.
30 Piyama napiyogana, enisore yagarama maya omintiye: Mariya, kaeba a-kaekuruba po. Koti antawamaba kaeka abegina aogi piye. 31 Kaeba kaga'e puma masinto yakari potamagina, agewapa Isuwe omo, untiye. 32 Piya untana to maya untiye: Aeba ae age Inatisa Wa'ega Yagarama Ntagarawe omikibewe. Piya puma, ayabama Tebiti kabintemisa puma tabe yagara mima, 33 a'ya'ma yaga Yekobu nkaokinatapa kabiwaitama, a'ya'ma yaga Tabe Yagara miyaba miyaba mikiye, piya omintiye.
34 Piya yogana, Mariya enisore yagaraga maya omintiye: Naeba kampa nawaeba mintiye. Yempe kamanapa aya pikiye, untiye.
35 Piya yogana, enisore yagarama maya omintiye: Aota Awamusa'ama kantabaipinti tumekana, Inatisa Yagarama esegiyenawampa aogi pugatakana, yagaragampa aota yagara, age Koti Ntagarawe ukibewe. 36 Kaeba abo. Kanogae Erisabetigaba, aeba anamo aentawe ye wae'ma aga'e pumagina, togana kakaga u migaitegina, masinto yakari potakiye. 37 Piya, Koti ka'ena pikenaba kampa igiga pukiye, untiye.
38 Piya yogana Mariya maya omintiye: Abo. Naeba Wa'ega Yagarama kayokaya araganagana, pabi yempesa punatakiye, untiye. Yogana, enisore yagaraba atate wagaintiye.
Mariya Erisabeti uma agantiye
39 Enisorewama kamana omigaite wagasogana, pabi ntaga Mariya ka'isaenawapa aogi purite, Yutiya mari karu'ena wamagina, amu wainti mari ima, kuma ka waintiti imagina, 40 Sekaraya ntamapinti ima Erisabetika: Aya pene, asu untiye. 41 Aya pene asu yogana, Erisabeti ntagara antabaipinti patagi pogana, Aota Awamusa'ama Erisabeti nkantabinti pumaeyogana, 42 Erisabeti Mariyaka maya omintiye: Koti a'mu pugataye. Kaeba aogi waekagana, taberasa Kotiba aogi pugatakana, kantabaipinti aborama mintemi ntagara aogi yagara aborama miye. 43-44 Pigoya abo. Kae kamana yeka aboganaba, nantabaipintisa yagaranempa ago a'mu puma patagi piye. Naeba na'mu pugatauwe. Kaeba nae Wa'ega Yagarama nkanogawe. Ayabaya naeti kanama ampa nagane. 45 Pipa Wa'ega Yagarama kamana ugaminta, kaeba abekana tagantana pemika, tabera ka'mu potane, piya omintiye.
Mariya a'mu kamana untiye
46 Piya omogana, Mariyaba abite a'mu kamana maya untiye:
Naeba nagu namankamaba Wa'egaga na'mu potauwe, iye.
47 Piya, naumawamaba Koti aogi punatakenaenanempa na'mu potauwe, iye.
48 Abo. Ae kayokaya araga nae uwa miyogana nababuma aogi punatakini, ibabe aintibe Koti a'mu punatami kamana a'ya'ma kina'mi abimagini, naeka i'mu punatakibewe, iye.
49 Piya, Koti tabera aogi punatami, esegi yagara miye, iye.
Piya, agewapa aota puma waintiye, iye.
50 Aeka abemi kinapa igepa agu kao'ena puwaitamagina, ago paipe ibabe abemi kinapa igepa aogi puwaitaye, iye.
51 Aeba esegiyenawampa nkagowapa aboramagina, i maete iye kina igepa igarubantiye, iye.
52 Aeba kiya kinapa maema merunkaba puwaitaogini tumi wantawe, iye.
Piya, tumima mintanta kina ababuma mesuba puwaitantiye, iye.
53 Aeba kusi kina ige piyamaenaba asaema imintana, pi tabe kutantaga kinapa igasogini, imu kampa wainta kina'ena puma mintantawe, iye.
54-55 Piya, tayabamagi Abara'amupe aga'nugipe utawaitantiye. Pabi nkawameta piya purataika, kamana'wapa uwa waita ikiye, iye.
Pi kamana'waka napimagina, Isureyo kina, Koti kayokaya kina'wa, agu kao'enaga uma tabaibuntiye, Mariya piya untiye.
56 Piya ugaite, Mariya aeba Erisabetige kakaga u migaitegina, kuma'wati a'wae puma wantiye.
Erisabeti Yoni yakari potantiye
57 Pigoya, Erisabeti yakari pikena yaga aboraogana masinto yakari potantiye. 58 Piya, Erisabeti nkaotumpibe wa'ewatasa kina'mibe abite, Wa'egawama aogima ao'maeyogini ampa agate, igeba a'ya'ma i'mu potantawe.
59 Pigoya, Yoniba ka sonta migasogini, paisa mono kamanapi waintome kamana wasiyu'ma au kasantawe. Au kasagasimagini, agewapa abawampa aukantana Sekarayawe omikena puntini, 60 abigauguna anowampa: Kampaye. Agewapa Yoniwe omiyo, untiye. 61 Piya yogini: We, kae kaokina'mi piya igiba piyamaba kampa waintiya, aya pukune, ugategini, 62 a'wae pumagini abawampaka iyatasa posenta pumagini: Agewapa kewe omusune, untawe. 63 Piya yuguna, Sekaraya esaka ibigaogini me nkamuguna: Agewapa Yoniwema, kaentiye. Piyama kaeyogini, wasanamiba agate pami pumagini: I-e, a-e, untawe. 64 Piya puguna, Sekarayaba pi ntaga kamana iro'ma untana, Kotigaba tabera a'mupa puntiye. 65 Piya pogini, wa'ewatasa kina'miba pintanaga agate iyekuru puntawe. Piya pumagini, Yutiya amu waintome mpari nasima mare-u me-u puta nasintawe. 66 Piya umagini, abume kina'mi: Aya yagarantobaya mikiyema, napimagini: Wa'egawama nkesegiyenawampa aepipa waintiye, uma: Ayabaya pukiye, untawe.
Sekaraya a'mu kamana untiye
67 Piya yuguna, abawampa Sekaraya Aota Awamusa'ama pumaeyogana, maya untiye:
68 Isureyo kina, tae Wa'egare Kotika ta'mu potaune, iye.
Ataenabisa aokina'wa ampa taba puma aogi purataye, iye.
69 Piya, kayokaya yagara'wa Tebiti nkayabamapisa ka esegi yagara asitakana aogi puratakiye, iye.
70 Pai poropete kina'wa uwaitaogini, waiyaba mikena kamana umarantapa, iba aboraye, iye.
71 Pigoya, kama kinatempi nkiyapisa tababumagina, aeba abima ata purata kina'mi nkiyapisa iyoba tatakiye, iye.
72 Piya, tayabamagi kao'ena puwaitama iyo'maekuwe, Koti piya untiye, iye.
Pika maema ka aga'naena puratama, agu kao'ena ibaba purataye, iye.
73 Piyaba Koti tayabama Abara'amupa uma esegi potantika, 74 kama kinatempi igetisa iyoba tataka, aogima mpima kayokaya kina'wa mpimagina, 75 a'ya'ma yaga taeba ae aobi aota puma mima, aogi ki'i aegarakubompeka Kotiba ka esegi yagara asitakana aogi puratakiye, Sekaraya piya untiye.
76 Piya untana, Sekaraya a'wae puma yagarawaka maya omintiye:
Pigoya, ma ntagaranto, kaeba Inatisa Wa'ega Yagarama poropete yagaragawe, ugamikibewe, iye.
Piya, kaeba paitama Wa'egawama ki'i atakibene, iye.
77 Piya, kaeba aogi puratakena kamana uwaimegini, a'ya'ma aokinapa abikibewe, iye.
Piya, aeba aru'enawaipa agaruba igasima ibabuntiye, iye.
78 Pigoya, tabe kao'ena Kotiba puratama, piya aogi puratamika, pi aeba mantarisa e'wasaena otakana taeti arakiye, iye.
79 Tununtanabi purikena kanta puma miye kina e'wasaena tamima aogi puratakiye, iye.
Piya, paruyenama ki aboraka agama, kanara tanta paruyenabisa aegarakune, Sekaraya Yonika piya untiye.
80 Aiyogana, ainti kana yagarantoba anosama tabe pogana, aumawampaba esegi potantiye. Piya, aeba ka'me mpari umintogana, kana'wapa aboraogana, Isureyo kina'mi nkiyobipa aborantiye.