Ɓataaki Yuhanna arano
1
Haala Konngol dokkoowol yimɓe nguurndam
Miɗen mbinndana on haala neɗɗo gooduɗo gila puɗɗooɗe.* Gooduɗo gila puɗɗooɗe oo yo Iisaa. (Ƴeew Linjiila ngeɗu Yuhanna 1.1-18 duu.) Min nanii haala makko, min njiirii mo gite amen, min taykike mo, min memirii mo juuɗe amen. Kanko woni Konngol dokkoowol yimɓe nguurndam. Nguurndam ɗam ɓannginaama min njii ɗam, ɗum saabii so miɗen kaalana on haala majjam. Ɗam nguurndam nduumiiɗam ngonɗam ɗo Baabiraaɗo ɗam min ɓannginanaa, ɗam min kaalanta on haala mum jooni. Ndennoo, ko min njii e ko min nani min kaalanta on onon duu, yalla oɗon ndeentira e amen hono no min ndeentiri e Baabiraaɗo e Ɓiyum Iisaa Almasiihu nii. Ɗum min mbinndanta on, yalla seyo men ana hiɓɓa.
No Laamɗo holliri yo fooyre
Kabaaru mo min narri Almasiihu, mo min kaalanta on haala mum oo, annii: Laamɗo yo fooyre, nimre fuu walaa e mum. So en mbii eɗen ndeentii e makko, kaa tawee e nimre ngon-ɗen, en penii, goonga walaa e golle men. Kaa so e fooyre nguur-ɗen no o worri e fooyre kanko e hoore makko nii, nden en ndeentii enen e ko'e men, kasen duu ƴiiƴam Ɓiyiiko Iisaa laɓɓinan en e tuundi fuu.
So en mbii en luuttaali, en njaayrii ko'e men, en ngalaa e goonga. Kaa so en njaadiranii Laamɗo luutti men, o yaafoto en, o laɓɓina en e tuundi fuu. Sabi kanko, o koolniiɗo, o pooccitiiɗo. 10 So en mbii en luuttaali, en njogorike Laamɗo yo penoowo, konngol makko naataali e men.

*1:1 Gooduɗo gila puɗɗooɗe oo yo Iisaa. (Ƴeew Linjiila ngeɗu Yuhanna 1.1-18 duu.)