1 Timodi
Polohanda Timodihondo beba mbira ogo gilibu wia hene
Mbuga ogoha gilibu ngarunaga nemandi ogo
Timodi ai̱ya ibu Keriso hamewane howa Yu wali berene. Ibu aba Girigi agali hene. Timodi ibu Keriso hameigini bayaleore hearia hondowa Polohanda Bi Mana Debene lo yogo lama pole ibu Timodihondo, Biamogo bule mba, lene. Puwa mani Polohanda Timodihondo lalu, Keriso hameigini Ebesani karu biamogo bialu ti heba habe, lene.
Polohanda Timodihondo beba mbira ogo gili bu wia henedagoni galone dunini tebiranaga gilibu wia hene.
Mbira
Ngode Datagaliwabe mana henene ngadagua ndo lawai haga karume Keriso hameigini mo hondo holigo de hondo habe, lalu lenego.
Mende
Keriso hameigini tigua agua bialu holene nga lalubi agua bialu Ngode Datagaliwabe mini yaraga holene nga lalubi wali agali haru hagame ogodagua bulene nga lalubi lamini.
Tebone
Polohanda Timodihondo lalu, Timodi í̠ Keriso Yasunaga biabe bia hagane agali bayale hole ogobi holene nga, lalubi, Keriso hameigini dindi tara tarani karu ti í̠na hondo habelo hondo haganaga biabe ngiyago bayuwaore hondo howa bialu habe, lalu lamaro bini.
Bu̱lu̱ baga buwa kuni gili bu ngago
1.1-2
Polohanda bi ala lenego 1.3–3.16
Keriso hameiginimebi tinaga haru hagamebi ogobi bialu holene nga lenego 4.1–6.21
Timodihondo, Agua bibe agua habe, lalu laminigo
1
1 I̱ Polo Keriso Yasunaga abosolo kogoni. Inanaga Pele Ngiaga Ngode Datagaliwabehandabi Keriso Yasu ina mini dunubia ho hagane tene kago ibuguabi i̱ abosolo helayagome kogoni.✡ Kl 1.27
2 Timodi-o í̠ mini mbiraore henene wu kegome i̱ igini ale kegoni. Aba Ngode Datagaliwabebi inanaga Anduane Homogo Keriso Yasubi libunaga biamogo bia holenebi dara holenebi mo palia holenebi í̠hondo ngilo hamelo ko.✡ Ab 16.1, Ta 1.4
Ngode Datagaliwabe mana henene ngadagua ndo mbira lawai halu kago de hondo habe lenego ogo
3 Masedonia pole pialu howa i̱na í̠ Ebesani hondo habe larudagua hondo habelo hame ledo. Ebesali marume Ngode Datagaliwabe mana henene ngadagua ndo mbira lawai halu kago í̠na tihondo, Ogonidagua lawai nahalimu, lalu lamulene nga.✡ Ga 1.6, Pb 2.24 4 Tigua mamali te lalubi mamali mini dewa lo bila halubi tigua ogonidagua lalu kago bi ogoni aleme tini mo ko hagane nga. Bi ogoni ale laragome wali agalime Ngode Datagaliwabehondo mini mbiraore wilo biamogo nabiaga.✡ 1 Ti 4.7, 2 Ti 2.14-16, Ta 1.14 5 Bi larogo irane ogonaga laro. Bu mini gahenge holenebi miniha ko mbira do nahe holenebi Ngode Datagaliwabehondo mini mbiraore henemane wulenebi yu tigabu haramagome mana uruniha howa gubalini holeneore walia hatagi holebira.✡ Lm 13.8-10, Ga 5.14, 2 Ti 2.22 6 Wali agali marume mana bayale ogoni wahalu bi galone nawini bi anda halu lulu yu ibaga bu ka. 7 Tigua Ngode Datagaliwabe mana lowinigo lawai haga hoa howa mine halu ogo ale larama lowa tene bayuwa manda nabi howa lawai haga ka.✡ 1 Ti 6.4, 6.20, Ta 1.10
8 Mana lowini ngago bulene ngadagua birimayagua bayale ogoni.✡ Lm 7.12, 7.16, 7.22 9 Mana bulene nabuleneru wabu wiagago wali agali bayale biaga karunaga ndo wabu wiaga. Wali agali mana puguagabi ko biagabi Ngode Datagaliwabe mitangi nabiagabi mini kowibi Ngode Datagaliwabe mana hame nalagabi dindi mana dege mitangi biagabi aba ai̱yala homelo bo wahagabi wali agali maru homelo bo wahagabi✡ Ga 3.19, 5.23 10 wali agali kayu biagabi mana ko ngubi taraore biagabi yolo yalu damu ibilo lowa wali agali waneiginibi minu yalu piagabi ke̱ hagabi ke̱ howa henene laro lagabi mana henene ngago hame nale howa ko bulene ngago bia dege biagabi mana uruni ale biaga karunaga bulene nabuleneru wabu nga.✡ Pig 19.4-5, 1 Ti 6.3, 2 Ti 4.3, Ta 1.9
11 Mana henene larugoni bi mana debeneha ngago Ngode Datagaliwabe ibunaga turu holenebi wá taraore holenebi Bi Mana Debene ogoni i̱na lawai holiya ngiya.✡ Ga 2.7, Kl 1.25, 1 Te 2.4, 1 Ti 6.15
Ngode Datagaliwabehanda i̱ dara hayago mitangi bialu ka̱i̱ lalu ko, lenego ogo
12 Inanaga Anduane Homogo Keriso ibugua i̱ mini bilinahe ka manda bialu ibunaga biabe bia holiya i̱hondo hongo ngiya. Ibugua ani biyago i̱na ibuhondo turu howa ka̱i̱ lalu ko.✡ Ab 9.15, Ga 1.15-16
13 Ala i̱na ibu mini mege bialubi mo tandaga halubi bi ko marubi lalu harugoni. I̱na Keriso Yasuhondo mini mbiraore nawi howa ko bero manda nabi bialu hewago hondowa Ngode Datagaliwabehanda i̱ dara howa biamogo biya.✡ Ab 3.17, 8.3, 9.4-5, 1 Ko 15.9-10, Ga 1.13
14 Ani bialu Anduane Homogohanda biamogo bia holene timbuni gibiore ngialu mini mbiraore wulenebi gubalini holenebi ina Keriso Yasuha ho gimbu bu kamagonaga ngago i̱hondo ngiya.✡ Lg 7.47, Lm 5.20, 1 Ko 15.10, 2 Ti 1.13
15 Iname bi henene hale halu yu tiga buluma̱ya ngago ogo. Wali agali bibahende mini kowi kamaru pele ngule Keriso Yasu dindini dalu hene. Ko biaga maru karubi ndo i̱ ko timbuniore biaga harugo kogoni.✡ Lg 15.2, 19.10, Lm 5.8, 1 Ti 3.1, 4.9, 2 Ti 2.11, 1 Yo 3.5
16 Ani bialu hewagola wali agalime i̱ handalu maha Keriso Yasuhondo mini mbiraore wialu haabobo holene yu holebiraru tihondo Keriso Yasuhanda ibunaga keba ala awane naholene i̱ha howa walia haya. Ani walia holiya Ngode Datagaliwabehanda i̱ dara howa biamogo timbuni biya.
17 Handame Haga Kini haluhe nahomagabi iname de nahandabehebi ibuni dege Ngode Datagaliwabe ka lowa ibuhondo ka̱i̱ lolenebi ibu mini mo yaraga holenebi wiaabo halu holene nga. Aniore bilo laro.✡ Dan 7.14, Yo 1.18, Lm 16.27, Hi 11.27, 1 Yo 4.12
18-19 I̱ igini Timodi-o ala í̠ mitangi bu howa iname mbiwia halu bi lo wirimaru ngago manda buwa í̠na bibelonaga laro. Mini mbiraore wiaabo halu howa miniha ko do nahe Ngode Datagaliwabenaga wai bayuwa hongo howa bialu habe laro. Agali marume tinaga miniha ko biyago mitangi bialu bayale lamiyago hale halu bia nabi hayagome Ngode Datagaliwabehondo mini mbiraore wu hayaru wahai haya.✡ 1 Ti 6.12, Yu 3✡ 1 Ti 3.9, 6.9
20 Ani bialu hayaru aria agali kira Haimeniasa Alegandala kagoni. Libugua maha Ngode Datagaliwabe mege nabilonaga i̱na agali ogoni labo dama Heyolabenaga giha ya helaru.✡ 1 Ko 5.5
✡1:4: 1 Ti 4.7, 2 Ti 2.14-16, Ta 1.14
✡1:5: Lm 13.8-10, Ga 5.14, 2 Ti 2.22
✡1:10: Pig 19.4-5, 1 Ti 6.3, 2 Ti 4.3, Ta 1.9
✡1:11: Ga 2.7, Kl 1.25, 1 Te 2.4, 1 Ti 6.15
✡1:13: Ab 3.17, 8.3, 9.4-5, 1 Ko 15.9-10, Ga 1.13
✡1:14: Lg 7.47, Lm 5.20, 1 Ko 15.10, 2 Ti 1.13
✡1:15: Lg 15.2, 19.10, Lm 5.8, 1 Ti 3.1, 4.9, 2 Ti 2.11, 1 Yo 3.5
✡1:17: Dan 7.14, Yo 1.18, Lm 16.27, Hi 11.27, 1 Yo 4.12
✡1:18-19: 1 Ti 6.12, Yu 3