2 Tesalonaiga
Polohanda Keriso hameigini Tesalonaigani hearuhondo beba mende ogo gilibu wia hene
Mbuga ogoha gilibu ngarunaga nemandi ogo
Polohanda Keriso hameigini Tesalonaigani hearuhondo beba mende gilibu wia henedagoni irane agali marume, Keriso dai bulene horo abale tagira ibiya, lalu lawai halu ka layagola ti mo tiga bule beba ogo gilibu wia hene. Keriso dai nabidaha mbira bulene wulebira layago ogo. Mbirali mana mo yo handagane kagome ibuwa ibuni haru haga bu hinalu mana koorebi ko bulene tara tarabi anda hatagi halu Keriso baba waitigi holebira. Ani bulebirago manda buwa Kerisohondo mini mbiraore wu karume genda holene ngangibi tandaga nolene ngangibi ema nabi howa hibu lalu biabe bayale bialu holene nga, lalu gilibu wia hene.
Bu̱lu̱ baga buwa kuni gilibu ngago
1.1-2
Polohanda bi ala lenego 1.3-12
Mini yaraga halu ka̱i̱ lenego 2.1-17
Keriso dai nabidaha ogodagua bulebiragonaga lenego 3.1-15
Keriso hameiginime bayale dege bialu holenenaga ngago 3.16-18
Lamaro bialu lenego
1
1 Polo Sailasa Timodi iname Keriso hameigini Tesalonaigani kamiru tíhondo beba ogo gilibu wia harama. Tí ina Aba Ngode Datagaliwabenagabi Anduane Homogo Yasu Kerisonagabi kamigoni.✡ Ab 17.1, 1 Te 1.1
2 Ngode Datagaliwabe ina Ababi Anduane Homogo Yasu Kerisobi libugua tíhondo dara howa biamogo bia holenebi mo palia holenebi ngilo hamelo kama.✡ Lm 1.7
Polohanda Ngode Datagaliwabehondo ka̱i̱ lenego ogo
3 Ina hamene mbaliniru-o tí mitangi bialu iname Ngode Datagaliwabehondo ka̱i̱ lalu haabo holeneore nga. Ogonidaguaore bulene irane tígua mini mbiraore wu kamigo anda ho yangaore lalubi tíni gubalini ho hagahaga bialu kamigo ogoni timbuni anda ho yanga lalu kamigoni.✡ 1 Te 1.2-3, 2 Te 2.13 4 Irane ogoninaga Keriso hameigini dindi tara tarani karuhondo iname tínaga mini mo yaraga haramali. Waitigime tíhondo gendabi tandagabi ngiragola tígua manga nahe donge howa hibu lalu kamigonagabi Ngode Datagaliwabehondo mini mbiraore wiaabo halu kamigonagabi ogoninaga iname tínaga mini mo yaraga halu kamagoni.✡ 2 Ko 7.4, 7.14, 1 Te 2.19, Mo 1.9
Ngode Datagaliwabe ibu tigabi howa ina daba ki bulebirago ogo
5 Ngode Datagaliwabehanda tigabi hangu dabaga kagonaga walia halu wáleore ogo. Ibugua Handame Ho Kagoria ho yanga lelo tígua tandaga uruninaga genda yu haramigola ogoni tí Ngode Datagaliwabehanda Handame Ho Kagoria anda polene karulape holeberami.✡ Pb 1.28
6 Ngode Datagaliwabehanda tiga tiga hangu bulebira. Marume tí mo tandaga haragola ibugua nde ti mo tandaga holebira.✡ Lm 12.19, Mo 18.6-7 7 Ani buwa tíbi inabi tandaga nalu kamagola ibugua tandaga mo ereba holebira. Anduane Homogo Yasu ibunaga dahuliyali hongo gibiorehe karu heba dahuliya andaga howa dai birangi ani bulebira.✡ Md 25.31, 1 Te 3.13, 4.16 8 Ani bulebirago wali agali maru Ngode Datagaliwabehondo erembira mialu karubi inanaga Anduane Homogo Yasunaga Bi Mana Debene ngaru mo tene nahaga karubi pani mule lowa ira hungu bima bima ibulebira.✡ Iba 79.6, Ais 66.15, Yar 10.25, Lm 2.8, 1 Pi 4.17 9 Ibiragola uruni ti koni haabo helo Anduane Homogo haganehayagi nahelobi ibunaga wá taraore holene ngago nahendelobi ibugua ti talebu ki howa pani tandaga nalu haabo helolebira.✡ Ais 2.10, 2.19-21, Pb 3.19, 2 Pi 3.7 10 Ani bule Anduane Homogo ibu Horo Mbira pongo bo winigo ogoni lola harangi ibiragola wali agali ibuhondo mini mbiraore wiyarume ti turu tara howa ibu mini yaraga halu ibu daligaore hai helolebira. Tíguabi nde Anduane Homogonaga mana tigabi langirimago yu tigabu kamigo wali agali uruni heba bimaga ho holeberami.✡ Iba 68.35, 89.7, Kl 3.4, 1 Te 3.13
Polohanda Ngode Datagaliwabehondo bi la henego ogo
11 Ani manda buwa iname horo bibahendengi Ngode Datagaliwabehondo tínaga bi la haabo haramali. Ngode Datagaliwabehanda tí dindini howa bialu halimulo olayago holene ogoninaga tí bayale karulapeore halimulo iname ibuhondo bi la halu kama. Ibugua tígua bayale bulene bibahende bua kamigo ibunaga hongome mo bia helonagabi mini mbiraore wu howa biabe bibahende bialu kamigo bumaro bilonagabi iname bi la ho wiaabo halu kama.✡ Kl 1.9, 1 Te 1.2-3
12 Biamogo bibe, lalu harimagome biamogo biragola tígua inanaga Anduane Homogo Yasu mini mo yaraga holeberami. Ibuguabi tínaga mini mo yaraga holebira. Inanaga Ngode Datagaliwabebi Anduane Homogo Yasu Kerisobi libunaga biamogo bia holeneme ani bulebira.✡ Ais 24.15, Mal 1.11, 1 Pi 1.7, 4.14
Mo Yo Handagane ibulebira lenego ogo