Haguane Heneru
Mbuga ogoha gilibu ngarunaga nemandi ogo
Mbuga ogoha howa bi te dewa Isaraeleali tigua Kenana dindini anda ibalu dindi karulai hene ngagonaga te latagi halu ti hama pialu tininaga kini pigane hene ngagoria lairi ka. Agali haguane henedarunaga te dewa gilibu nga. Agali haguane uruni ti bibahende godi hale hagabi bi mo tiga biagabi ndo hene. Ti wai hanaga ale ho hene. Tinaga waitigirume ti mo genda ha mo ko ha bigi birangi agali urunime haru howa wai bilonaga Ngode Datagaliwabe ibunime agali haguane uruni dabalu helene. Agali haguane uruni tinaga mini uru. Odonielebi Ehudubi Samagabi Baragabi Gidionobi Abimelegebi Tolabi Yairibi Yabedabi Ibisanabi Elonobi Abadonobi Samasonobi wali mbira Deborabi uruni haga bini. Tigua binirunaga te Isaraele wali agalime wai bialu henego tebi gilibu nga.
Galone timbuniore mbira Ngode Datagaliwabehanda mbuga ogoha howa lawai hene manda bu kago ogo. Isaraele wali agali ti bayale holenaga tigua Ngode Datagaliwabenaga bi mana lowini ngago baya hangu taluwa bialu holene wini. Tigua Ngode Datagaliwabe erembira mialu tini hame layadagua bialu heangi tiniha mo ko holene yu anda ibini. Anigo mana ogoni bolangua howa bulene mende nga. Tigua Ngode Datagaliwabenaga bi mo wahalu karia genda tandagaru anda ibagago ogoni anda ibirangi Ngode Datagaliwabe ibunime ibunaga wali agali dara halu biamogo biaga ka. Tigua mana ko dewa biniru mitangi bialu mini beregedalu lone Ngode Datagaliwabe mo tene hadai biyagola ibugua ti dara howa pele minirunaga te gilibu nga. Anduane Homogonaga mbuga mbiranaga mini Mana Lo Winigo Loyane laga wini ngagoha Be 28 howa hariga mende ogoni dege tigatiga mo walia ho ngago de handabe.
Bu̱lu̱baga buwa kuni uru gilibu ngago (1.1–2.10)
Yosua homa nabi howabi ibu homayangi howabi bialu henerunaga te gilibu nga. 2.11–16.31
Isaraelealinaga haguane henerunaga te gilibu nga. 17.1–21.25
Mbirale tara tara bialu henerunaga te gilibu nga.
1
Yuda hameigini Simiono hameiginilame Kini Adoni Besege minu yania henego ogo
Yosua homayagola Isaraele wali agali tigua Anduane Homogohondo hale halu lalu, Ai Kenanaliru baba wai bule ina hameigini aiwa bamba holobadabe, lene.
Ani layagola Anduane Homogohanda ladai bialu lalu, I̱na dindi ogoni Yuda hameiginiruhondo minigo nde tinime bamba holene nga, lene.
Anidagua layagola Yuda hameigini tigua Simiono hameigini hearuhondo lamialu lalu, Tí ina baba ala mali̱ya. Ani puwa dindi ina tu wa ngini biagoria Kenanali karu baba wai bialu hami̱ya. Ani bialu mani dindi tí tu wa ngini biagoha wai bule mali̱ya, lene. Ani laya handala Simiono hameigini biaru tigua Yuda hameigini baba mandagi wai pole ma lalu pene. Pialu Yuda tinime bamba howa wai biyagola Anduane Homogo ibunime Kenanali hearubi Pereseali hearubi bibahende tinaga giha minu ya hayagola horo ogoningi dege Yudalime tinaga waitigi daosini pira (10,000) Besege tano wiagoria bo wahai hene. Yudali tigua Kini Adoni Besege halu ibunaga ami agaliru dindi ogoriani lola howa wai hongo howa bialu Yudali tigua bo poda hana hene. Ani bialu howa Adoni Besege ibida pialu hearia Yudalirume talima pugupugu bialu ibu minu yania hene. Minu yania howa tigua ibunaga gi hondone angibiyane kirabali pugu wahalu ge hondone angibiyanebi kirabali pugu wa dege hene. Ani biyagola Adoni Besegehanda lalu, Bamba i̱na kini dege pira karianaga (70) gi hondone ge hondonebi angibiyane kirabali bibahende pugu waheneru ti i̱naga tomo nalu biraga dagia andaneha tomo ibira ibira bidaru ilu nalu berelaga biruli. Ani biruligo áyu nde Ngode Datagaliwabehanda i̱na tihondo birulidagua i̱nihondo biadai biyada, lene. Anidagua bialu Yudali tigua Adoni Besege Yarusalemeha haru puwa helenego haabo halu homene.
Yudali tigua Yarusaleme Heberonobi wai bialu karulenego ogo
Yudali tigua Yarusaleme anda puwa wai bialu bo poda hana halu dindi ti karulene. Wali agali bu hearu bo hilo wahai halu tinaga dindi anda wiaruni bibahende bo heda hai hene. Ani biai halu mani Kenanali hari barebareha hearu bababi ni paliragohayagi hari bare emene wima pearuha hearu baba wai bialu unurayagi Negebe dindi wiagoha hearu bababi wai bia dege bini. 10 Ani buwa mani Kenanali maru Heberono tano bamba Kiriada Araba laga winigoria hearu baba wai bule pene. Anidagua bialu Yudali tigua wai bialu Sesai hameiginibi Ahimana hameigini palearubi Talamai hameigini palearu baba wai bialu bo poda hana hai hene.
Odonielehanda Debiri tano karulenego ogo
(Yosua 15.13-19)
11 Yudali biarume Heberono biaru bo poda hana hai halu ai Debiri hameigini hearu baba wai bule pene. Bamba tano ogoni Kiriada Sebe tano laga wini. 12 Yudali mbira mini Kalebe ibugua lalu, Agali mbirame Kiriada Sebe tano bo poda hana hayagua agali ogoni i̱ wane Agasa bedago ibu dabu bilo mulebero, lene. 13 Ani laya handala pialu agali mbira Kenasa igini Odoniele henegome tano ogoni bo poda hana haga bima anda pialu karulene. Kenasa ogoni ibu Kalebe hamene heyogone hene. Kalebehanda ibu wane Agasa Odoniele dabu bilo miyagola ibu dabu bu hene. 14 Agasa ibu Odoniele andaga ibiyagola Odonielehanda ibuhondo lalu, Í̠na í̠ aba Kalebehondo dindi mbira tu wa ngi labe, lalu hongo howa lene. Ani layagola Agasa ibu Kalebe hearia puwa ibu nogo dongini biralu penego daliape hayagola Kalebehanda hale halu lalu, Í̠ agi hamelalu ibiribe, lene. 15 Ani hale hayagola Agasahanda ibu abahondo ladai bialu lalu, Í̠na mbirale mbira i̱ ngibelo hameledo. Í̠na dindi mbira abene unurayagi tu wa ngirigoniha iba nabereyago ai iba hambiaga uliwi mbira ngibelo hameledo, lene. Ani layagola Kalebehanda dindi iba duguaga liyagi niyagi wiagobi kirabali ibu wane mini.
Yuda Beniyamini hameiginilame wai bialu wayali henego ogo
16 Mosese imane Keniali mbira henego ibunaga aguaneneru tibi Yuda agalibi ti haru Yarigo tano mini mende Ira Dedi Tano laga wiago wahalu Yuda dindihayagi dindi ko iba dalu naibaga wiagohayagi pene. Dindi ogoni abene unurayagi Arada tano wiagoha pialu ti Amelegeali bu hearu baba ogoniha ho hene. 17 Ani bialu Yuda hameigini Simiono hameiginiru tigua Kenanali Sebada tanoha bu hearu baba wai bialu bo poda hana halu dindi andaru bo haeala baga biai hene. Ani buwa tigua tano ogoni mini gahenge wia aribia halu mini Homa wini. 18 Ani bialu maru Gasabi Asagelonobi Egeronobi tano uruni dindi emene maru tano uruniha wia parapara bu wima pearubi heba ti karulai hene.
19 Anduane Homogohanda ti biamogo biyagola Yudali biarume dindi hari barebareha wiarubi heba karulai hene. Anigo waitigi maru iba angeha palearume tinaga wai biaga garo ale mini karisi aeaneme wabini wiago Yudalirume ti baba wai bialu ti bo podabe nahe hene. 20 Ani bialu Heberono tano ogoni bamba Mosesehanda lo winidagua Kalebe mini. Ani biyagola Kalebehanda Anaga aguanene hameigini tebira Heberono tanoha hearu bibahende bo batagi hai hene. Yos 15.13-14 21 Anigo Beniyamini hameigini tigua Yabusu hameigini Yarusalemeha hearu bo batagi habe naheyagola Yabusu hameigini biaru ti Beniyamini hameigini baba mandagi Yarusalemeni haabo hene. Yos 15.63, 2 Sml 5.6, 1 Bit 11.4
Yosebe aguanene hearume Bedele tano karulo henego ogo
22-23 Ani howa Yosebe aguanene tigua Bedele tanoha hearu baba wai bule pene. Ogoningi tano ogoni mini Lusu laga wini. Tigua wai bu piyagola Anduane Homogohanda ti biamogo bialu hene. Ani bialu heagola Yosebe aguanene maru tigua tano ogoniha diri hondole pene. 24 Ani pialu hearia tigua agali mbira tano ogoniha howa tagira ibalu hearia hondowa ibuhondo lalu, Ina tínaga tanoha diri hondo ibuluma̱ya haru anda piriyagua iname í̠ naboleberema, lene. 25 Ani laya handala agali biagome ti tanoha anda pelo hariga walia hene. Ani walia hayagola tigua tano biagoha anda puwa wali agali bu hearu dewaore homelo bo wahai halu agali hariga walia hayago ibu damene bu hearu dege bo wa nahe helo wahene. 26 Ani biya handala agali ogoni ibu Hidi dindi wiagoha puwa tano mbira mo wialu tano ogoni mini Lusu wini. Tano ogoni áyubi wiaabo ka.
Isaraeleali hearume hameigini maru bo batagi nahe henego ogo
27 Manase hameigini bu hearume wali agali tara tara Bedesana tanohabi Tanaga tanohabi Do tanohabi Ibileama tanohabi Megido tanohabi tano uruniha tano emene wia parapara bu wiaruha hearu baba wai buwa Kenanali biaru wai hongo howa biyagola bo batagi nahe helo wahene. Yos 17.11-13 28 Ani helowa Isaraeleali ti dewa hongohe howa tigua Kenana wali agali dindi anduane hearu tinaga garabaya biabe ale bialu helo helaga bini. Anigo Isaraeleali tigua Kenana wali agali uruni bo batagi hai nahe maru helene.
29 Eberaimi hameigini tigua nde Kenana wali agali Gese tanoha hearubi bo batagi habe naheyagola Kenana wali agali uruni ti Isaraeleali hearu baba mandagi hene. Yos 16.10
30 Sebulunu hameigini tiguabi nde Kenanali dindi anduane Kidirono tanoha hearubi Nahalala tanoha hearubi bo batagi hai nahe helo ha dege bini. Ani binigo Kenana wali agali uruni ti tano ogoniha mandagi hene. Ani helowa Sebulunu hameigini tigua Kenana wali agali uruni tinaga garabaya biabe ale biahelo helene.
31 Ase hameigini tiguabi nde wali agali Ago tanohabi Saidono tanohabi Alaba tanohabi Agasibi tanohabi Heleba tanohabi Abege tanohabi Lehobo tanohabi dindi anduane bibahende bo batagi hai nahe helene. 32 Ani helowa Ase hameigini tigua Kenana wali agali uruni tini heba mandagi hamagamaga bu hene.
33 Nabadali hameigini tibi nde dindi anduane Bedesemese tanoha hearubi Bedanada tanoha hearubi bo batagi hai nahe ti baba mandagi hene. Ani helowa Nabadali hameigini tigua Kenana wali agali urunime tinaga garabaya biabe ale bialu helo helene.
34 Amorali hearu ti hongohe howa tigua Dana hameigini hearu uyura hari barebare dindi emene wiaruha helo warabagi ho helene. Tigua Dana hameigini dindi bayale ulini wiagoha ibulilono handaya hene.
35-36 Amorali hearu ti Ayalono tanohabi Salabimi tanohabi biralu Hari Herese heagoha dindi wiaruhabi tini dege haabo halu bini. Tinaga dindi tubari Agarabimi polene hariga hari nene wiagoha iraga halu peagoria howa pialu dindi mini Sela wiagoria bolangua halu uyura puabo hene. Anigo Yosebe aguanene biaru tigua handayaho howa tinaga garabaya biabe ale bialu helo helaga bini.

1:20: Yos 15.13-14

1:21: Yos 15.63, 2 Sml 5.6, 1 Bit 11.4

1:27: Yos 17.11-13

1:29: Yos 16.10