Yobo
Mbuga ogoha gilibu ngarunaga nemandi ogo
Yobonaga mbuga ogoniha agali mbira ibu mana bayale tigabi bialu heagola genda timbuni anda ibini. Ibu waneigini bibahende homai halu ibunaga nogo bulumagabi mbirale bibahende wiarubi ereba hai hene. Ani biagola mani ibuni warago timbuni bo wini. Yobo ibu ani genda timbuni yu wiagola ibunaga nenege agali tebirali Yobo heba dara hagabu birama lama ibini. Ai ti biruwa Yobo genda timbuni anda ibiyadagonaga bi luore lalu berene.
Yobonaga nenege tebirali biarume Isaraele wali agalime mana abale laga winigodagua mandabu berene. Tigua manda bialu hearia agali bayale dege bialu haga kagoha genda tandagaru anda naibaga. Mana ko mbira biyagua agali ogoni Ngode Datagaliwabehanda mo tiga bulenaga genda anda ibilaga lo manda bini. Ani manda buwa tigua Yobohondo lalu, Ngode Datagaliwabehanda í̠ abale bayale hariligobi hodaibi lelo áyu ko biridaruni latagiha, lene. Anigo ai Yobo ibunime mitangi bialu Ngode Datagaliwabenaga deni ko mbira nabi dege hewane ai ibuni genda áyu ogoni bameore ibileda lo manda bini.
Ainde Yobo ibugua Ngode Datagaliwabehanda ibuhondo o biyadaruninaga ogodagua hale hene. Ngode Datagaliwabehanda mana agobi biaga kabe. Ibugua mana tigabi hangu biaga kabe. Wali agali ibunaga tuha howa ibu yutiga bialu heagua ogoni ibuha lini abiale daga ngabe. Yobo ibu ko mbira nabiaga howa ibugua Ngode Datagaliwabehondo bi hale holenego gi nahe hene. Yobo ibu Ngode Datagaliwabenaga deni ibu agali tigabiore ka lalu mini lene henegobi dege holene hamelo howa ani lene. Ani layagola Ngode Datagaliwabehanda bi layaruni baya hangu ladai nabi howa ibunaga manda hongola timbuni wiago Yobo walia hene. Ani layuago hale howa Yobo ibugua keba halu Ngode Datagaliwabehondo bi ko layagonaga daraho dai bini.
Lamaro bidagohayagi Ngode Datagaliwabehanda Yobo mo bayale halu Yobonaga nenege tebirali biaru talinigonaga gilibu nga. Agali uruni tigua Yoboha genda ibiyadagoni tene agoalemeda lowa bi larimidaruni tiga nabida lowa Ngode Datagaliwabehanda ti talini. Mbuga ogo ibugua Ngode Datagaliwabenaga mini ngaru bibahendebi mana ibugua biagaru bibahendebi agalime manda biai habe nahe lowa mo walia halu gilibu nga. Ngode Datagaliwabe ibu timbuniore howa agalinaga mini ngaru manda bidaru dindihaore lowa ibu bolangua hai howa ibu daligaore ka lalu mo walia howa gilibu nga.
Bu̱lu̱ baga buwa kuni gilibu ngago (1.1–2.13)
Pigane binigo 3.1–31.40
Yobobi ibunaga nenege tebirarubi bi lenego
3.1-26
Yobohanda kiabu dugu binigo
4.1–14.22
Elibasa Bilidada Soba emaru tigua bi lenego
15.1–21.34
Tigua bi halu mende lalu henego
22.1–27.23
Tigua bi halu tebone lalu henego
28.1-28
Mana bayale gigabi lolene lenego
29.1–31.40
Yobohanda lamaro binigo 32.1–37.24
Elihuhanda bi lenego 38.1–42.6
Ngode Datagaliwabehanda Yobohondo ladai binigo 42.7-17
Lamaronaga bi lenego
1
Yoboha mo ko holene anda ibinigo ogo
Dindi Usu mbira winigoha agali mbira ibu mini Yobo hene. Yobo ibu agali bayale tigabi howa Ngode Datagaliwabenaga deni ibuha ko mbira nawi hene. Ibugua Ngode Datagaliwabe mitangi bialu lotu lalu ibunaga tuha haabo howa bibe laradaguaore bialu haga hene. Ani howa ko mbira ibugua bini nawi hene. Pig 22.12, Ese 14.14, 14.20, Ya 5.11 Ibu oneme igiri karia wandari tebira lowa taba henene. Ibunaga nogo sibi daosini karia (7,000) nogo kamele daosini tebira (3,000) bulumaga daosini mbira (1,000) nogo dongi angibuni handari duria (500) laga buwa hinu hene. Ani bialu ibunaga biabe biahaga wali agali dewaore halu bini. Ani heagola ni tagira ibiragohayagi wali agali bu hearume ibunaga mini yaraga halu haga howa ibu agali mini lene timbuniore hene.
Yobo igini uruni tigua tini andaga mbira mbira hayagoria horo mbirungi tomo nole bibahende anda mbiragoria ala ngoai howa tomo naga biaga wini. Mbirago ibugua tomo dawa howa tini hamenerubi ti mbalini tebira biarubi olo ngoai howa tomo mandagi naga wini. Ti tomo nai kagola Yobo ibugua lalu, Ngode Datagaliwabenaga deni ko mbira tíha nawi halimulo tínaga loma bo delalu bi la holiya i̱ andagani ibalimu, laga wini. Ai horo mendengi egerebagiore Yobo ibugua abale ega bi naleha heyuwa nogo mbira lomabu mialu irani dai helo bo delaga biaga wini. Waneiginiore bibahende dagalai howa bibahendenaga loma bo delaga biaga. Ibugua waneigini mbiragome Ngode Datagaliwabehondo bi ko mbira lo heagua ogoni Ngode Datagaliwabenaga deni mana ko biyadago lowa ani biaga wini.
Horo mbirungi dahuliyaliru Anduane Homogonaga wanakuini íbu ngoai ho heagola dama Heyolabe ibubi nde íbu ha dege bini. Pig 6.2 Ani íbu heagola Anduane Homogohanda ibuhondo hale halu lalu, Í̠ agoha howa íbu kebe, lene. Ani layagola dama Heyolabe ibugua ladai bialu lalu, I̱ dindi mbiraoreni halu ndo ebero. Dindi bibahende ngaruha ibaga bu halu ebero, lene. Ani layagola Anduane Homogohanda lalu, Agali i̱naga biabe bia haga Yobo heago handaribe nahendebe. Yobo ibu agali tigabi bayaleore howa ko mbira i̱naga deni ibuha nawiore ka. Bibahendengi ibugua i̱ninaga tuha haabo howa i̱ni mitangi bialu lotu lalu bi ledogo bibahende talialu biaore biaga ka. Dindi bibahende ngaruha mana tigabiore biaga agali ogonibi mende naheore ibu hangu kagoni, lene. Dag 12.7, Yos 1.2, 1.7, Yob 2.3, 42.7-8 Ani layagola dama Heyolabe ibugua lalu, Í̠na manda bialu keria Yobo ibu í̠na mbirale mbira nami kegola ibugua í̠ mitangi bialu lotu lalu holebirabe. Ndoyago. Mo 12.10 10 Horo bibahendengi í̠na ibunibi ibunaga damene one waneiginirubi ibunaga dabudabu ngarubi bibahende baya hanguore de handayaho haabo kegoni. Ani bialu nogo bulumaga dewaore mirigola dindi timbuni wiaruha ho karulapedagoni. Ani bialu kegome ibu bayale kagoni. 11 Ai mbirale áyu yu howa homogo karuni mo wahai hariyagua ibugua í̠hondo keba howa erembira ngialu polebirago hondolebere, lene. Yob 2.5, 19.21
12 Ani layagola Anduane Homogohanda dama Heyolabehondo lalu, Hale harene. Ibunaga mbirale bibahende áyu wu karuni mo ko hai habelo í̠naga giha ya harogo. Ai ibuni dege mo ko naholebere, lene. Anduane Homogohanda ani laya handala ibu helalu dama Heyolabe ibu pene.
Damame Yobo halu mbira ba hendenego ogo
13 Horo mbirungi Yobo waneiginiru bibahende igiri wahene biago andaga tomo timbuniore dawenego nole mo ngoaiho berene. 14 Ai biabe biahaga agali mbirame Yobo berearia bi yalu ibuwa lalu, Í̠naga nogo bulumagame dindi tombalu harima. Ai nogo dongi ti nogo pabe mendeha ogoriani dege tani nalu helo harima. 15 Ani helo hemaria Sabealirume abaleore ibalu nogo dongirubi bulumagarubi page haru halu agali í̠naga biabe biahaga biaruni bibahende bo wahai halu piyagola i̱ hangu pora bialu ibida puwa í̠ni langule ibirudagoni, lene. 16 Agali ogoni ibunaga bi lai naheaore dege agali biabe biahaga mende ibuwa lalu, Hari daba timbuni biyagome í̠naga nogo sibi bibahendebi agali nogo haru haga bibahendebi bo wahai hayago. Mbiraoreli i̱ hangu nabe puwa í̠ni langule ibirudagoni, lene. 17 Ani lowa wene lalu bereaore dege agali tebone anda ibuwa lalu, Kaladia dindiha howa hameigini tebira bibahende ibuwa nogo kamele haru hai halu agali biabe biahaga bibahende bo wahai hayagola i̱ hangu pora bialu puwa í̠ni langule ibiru, lene. 18 Ani lalu berearia dege agali mane ogoria anda ibuwa lalu, Í̠ waneigini bibahende í̠ igini wahene biago andagaha hangu mo ngoai howa tomo timbuni dawa nalu berearia 19 puyabu timbuni mbira amu wali agali nahe mbirale mbira anda nahaga dindi ko wiagoha howa abale aube tobane ibuwa anda podo dambi halu í̠ waneigini biaru bibahende bo dambi hayagola homai haya handala i̱ hangu pora bialu puwa í̠ni langule ibiru, lene.
20 Bi uruni laga biyago hale howa Yobo ibunaga bu miniha genda timbuni tagira ibalu mini burugu layagola ibugua dara holene walia halu ibunaga agaru minu lerelalu mandari angariru pundu lalu bini. Ani buwa ibugua ge duli hangaho biruwa ma bulu palialu handa dindiho biruwa Ngode Datagaliwabehondo bi lene. 21 Ibugua lalu, I̱ ai̱yahanda taba hanayangi mbirale mbira nayi ibirugo mani homalu nde ogonibi dege poleberogoni. Anduane Homogo ibunime mbirale uruni bibahendeore ngiai hayago ai áyu ibuni mo yalu dai biyadagoni. Ani biyadago nde i̱na ibunaga mini yaraga holene ngagoni, lene. Yob 2.10, Aga 5.15, 1 Ti 6.7 22 Genda timbuni urunime Yobo mo tandaga hayagola ibugua tandaga howa Ngode Datagaliwabehondo bi ko mbira nale hene.

1:1: Pig 22.12, Ese 14.14, 14.20, Ya 5.11

1:6: Pig 6.2

1:8: Dag 12.7, Yos 1.2, 1.7, Yob 2.3, 42.7-8

1:9: Mo 12.10

1:11: Yob 2.5, 19.21

1:21: Yob 2.10, Aga 5.15, 1 Ti 6.7