HIBRU
1
GODNA NYAN NDƗNA NYAEK TƗGA ANGWA VAK NƗN KAT VƗSƗMOGWINDƗ
Tamba God nɨma sakwt njambɨ nɨma sakwat vapmba tamba la profet kat wandɨ maa ndi nɨna walanga kat mbutɨndi. Mbambala Godna nyan yalaa ndɨna nyaekna nyaangɨt nɨn kat mbutɨndɨ. God wandɨ. Wuna nyan njambwi nyana. Nat nɨmba nat nɨmbundawi nywaa ndɨna kwupmba lɨgandɨ waa wandɨ God. God wandɨ maa ndɨna nyan kɨpma nyɨnangwut kwanda kwanda aywaa kwutndɨ. Godna nyan kat vɨga God apma vat yetɨnda vak vɨnɨn. Godna angwa vat nɨn kat vɨsɨmogwindɨ. Kɨpma, nyɨnangwut, nya, mbak, mwuk, meik Godna nyan waa nyaangɨpmba ndɨna kwundimba wuka aywaa kwanda kwanda njɨvwa kwuka yi yaga lɨgandɨ. Nɨna kavle vak kat tɨga lɨmbwivat kiyalaa nyɨnangwutnat wokelaa njambwi nyana yaaginda taambamba ndalɨgandɨ. Nɨn kat kwunatɨnda njɨvwa ngɨlɨndɨ, God ndɨ kat wandɨ. Mɨn apma nyan mɨn. Ngi kat tɨga wuna yaaginda naangɨmba nsaalɨ waa wandɨ ma ndaa lɨgandɨ.
GODNA NYAN ENSEL KAT KWULATƗGANDƗ
God wandɨ maa ndɨna nyan ensel kat kwulatɨgandɨ. God ndɨna sɨ kwutaa katsonda vak vla ensel kat wupma ana katosndɨ. Tamba God ndɨna nyan kat wandɨ.
Mbambala tɨga ngɨni wuna nyanat tɨgiyamɨn.
Nat njambɨ god ndɨ kat wandɨ.
Wun mɨna nyaek vla lɨgowun. Mɨn wuna nyan vla lɨgamɨn waa wandɨ God.
Wan ndɨna nyan kat wanda nyaangɨt ensel kat wupma ana wandɨ. Tamba God ndɨna ngɨma nyan kat kɨpmat ay mɨla wanda njɨmbla wandɨ.
Wuna ensel aywaa wuna nyana sɨ kwutaa katso ngwula god ndɨ ensel kat wandɨ.
Mwukno vlapm lakna wuna nyaangɨt wuka lɨgandɨ. Wuna ensel ndinonɨmbun wunai waa vapmba yi ya wuna njɨvwa kwuka lɨgandi waa wandɨ God. 8-9 Ndina nyan kat wupma ana wandɨ. Kapma vatna wandɨ. Ndi kat wandɨ.
Njambwi nyan, njɨmbla njɨmbla kɨpma nyɨnangwut kat
vɨga lɨgiyamɨn. Apma vak tɨvak mɨna yelavɨka
lɨgamɨn. Kavle vak tɨvak kat kai walɨgamɨn. Ngi
kat tɨga mɨn kat nɨma sɨ kwiwun, njambwi nyanat
lɨgiyandi waa wandɨ, God.
10-12 Nat njɨmbla god ndɨna nyan kat wandɨ.
Njambwi nyan, tamba kɨpma nyɨnangwut kwupmɨn.
Ngɨni kɨpma nyɨnangwut ngɨlɨgiyandɨ. Kavle waavwi
vla ngɨlɨkiyandɨ. Mɨn ana ngɨlɨgiyamɨn. Njɨmbla
njɨmbla tɨgiyamɨn. Kɨta nyan waavwi klalaa
mbaatnda vak vla wupma kɨpma nyɨnangwut
mbaakiyamɨn. Mbaapmɨn maa mandɨt kupi nyɨnangwut
kɨpma tɨgiyandɨ. Mɨn wupma ana ngɨlɨgiyamɨn waa
wandɨ God.
13 Nat njambɨ ndɨna nyan kat wandɨ
Wuna yaagindan naangɨmba mɨn kwo ndaalɨ. Mɨn kat
kao yilɨga nɨmba kat mɨn kat tɨga kwulakiyowun.
Mɨn njɨvwa kai. Kwo lɨgiyamɨn waa wandɨ God.
Ensel kat wupma God ana wandɨ. 14 Ensel ndi Godna njɨvwa kwutɨga nɨmba ndi. God ndi kat aywandɨ maa ndɨna mbbapma wuleigiya nɨmba kat ndi kat kwunatɨgandi.