U TOXVAꞌ Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
Yol tiꞌ u uꞌ tzaꞌ
Aatz u toxvaꞌ uꞌ itzꞌibꞌa u Xhan tzaꞌ, yeꞌ ootzajibꞌe tila utz, kam chit tuul itzꞌibꞌa. Kamal aꞌ itzꞌibꞌataꞌ aas maꞌtich ipaal u yaꞌbꞌ 90 m.t.J. Aꞌ taqꞌvu bꞌen xeꞌ maꞌl u vinaj Gayo ibꞌii. Kamal ansianoich xoꞌl qꞌu niman tetz u Jesuus.
Aꞌ u jatxbꞌal tibꞌ qꞌu yol tu u uꞌ tzaꞌ.
1) v. 1-8 Aꞌ nital u Xhan te aas tiira bꞌaꞌn vaꞌl niꞌaneꞌ. Nitaqꞌ ivatbꞌal qꞌu alol tetz u yolbꞌal Tioxh nipaaleꞌ.
2) v. 9-10 Nital tu u uꞌ majte tzaꞌ aas nikꞌaxbꞌixsal tu vaꞌl niꞌan maꞌl u vinaj Diootrefes tan, jeꞌnaj iatz.
3) v. 11-12 Pek nital majte aas tiira bꞌaꞌn vibꞌanon vaꞌt u niman tetz u Jesuus Demeetrio ibꞌii.
4) v. 13-15 Ech tiyaꞌtebꞌal, nitaqꞌ bꞌen chajlichil.
1
U TOXVAꞌ Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
Viqꞌilal bꞌen u Gayo tu u uꞌ tzaꞌ
In Xhan, ansiano xoꞌl qꞌu niman tetz u Jesuus. Nunqꞌilabꞌenaxh unhermano Gayo tan, nojchit tiira tiiꞌin saiꞌ tiꞌ inimal vinujul, ayaꞌ u yolbꞌal Tioxh.
Unhermano, aꞌ unsaꞌ bꞌaꞌn koj elkꞌaxh tu qꞌu kam kajayil. Tiichaj koj axh. Echaꞌ val aanxelal aas tiira bꞌaꞌn tatin vatz Tioxh. Tiira txuqꞌtxunchitꞌin aas ul unjolol qꞌu niman tetz u Jesuus tzunxeꞌ utz, tal ve aas tiira bꞌaꞌn naꞌaneꞌ; tinujul chit niiqꞌo u yolbꞌal Tioxh. Ech tiira techal untxuqꞌtxun taqꞌo aas nivabꞌi aꞌ chit niꞌan vinujul qꞌu niman tetz u Jesuus qꞌuꞌl chusel u yolbꞌal Tioxh te vaqꞌo.
Vitxuqꞌtxun u Xhan tiꞌ vilochonu Gayo
Unhermano, tiira bꞌaꞌn vaꞌl naꞌan vatz Tioxh aas naloch qꞌu niman tetz u Jesuus qꞌuꞌl nipaal tiꞌ ipaxsal u yolbꞌal Tioxh. Bꞌaꞌn axh te kꞌuxh yeꞌ ootzaj. Utz aatz qꞌu niman tetz u Jesuus tziꞌ, nital vabꞌantu tiiꞌaxh tiꞌ tereꞌn qꞌu niman tetz u Jesuus. Ech tiira bꞌaꞌn oj saꞌtereꞌnaloch tiꞌ en itzojpil u taqꞌon vatz Tioxh. Saaqꞌ bꞌen tetz. Tan aꞌ vaꞌl bꞌaꞌn niꞌenku tu u Tioxh. Tan tiꞌ vibꞌii u Jesuus tzꞌejelku taanima, kꞌuxh nipaaleꞌ. Utz yeꞌk lochbꞌal nikꞌul tu qꞌu aanima yeꞌ tootzaj Tioxh. Ech tokeꞌ aꞌ qetz sakuloch qꞌu aanima ech tziꞌ. Ech ant oꞌ salochonoꞌ tiꞌ ipax paal vinujul taqꞌo.
Viyeꞌxtxojla txumbꞌal u Diootrefes
Vetuntzꞌibꞌa bꞌen qꞌu kam xeꞌ qꞌu niman tetz u Jesuus tzaꞌ. Pek aatz u Diootrefes, yeꞌ ninimaꞌoꞌ. Pek aꞌ bꞌaxa nitoksa vitxumbꞌal. 10 Ech untzꞌoj loꞌoponin, sunsavsa tiꞌ qꞌu kam niꞌaneꞌ tziꞌ, qꞌu yeꞌxtxojla yol nicheesa qiꞌ. Tan yitꞌ bꞌaꞌn koj ikꞌuꞌl tiꞌ qꞌu kam tzaꞌ. Aal yeꞌ nikꞌul qꞌu niman tetz u Jesuus qꞌuꞌl nixaan tiꞌ talax u yolbꞌal Tioxh. Utz nimaj unjot tiꞌ ikꞌulaxeꞌ, nitojcha el tu xoꞌl abꞌil nikꞌulun.
Vibꞌaꞌnla txumbꞌal u Demeetrio
11 Hermano, yeꞌ koꞌxh iiloꞌk eetz tiꞌ vibꞌanon qꞌu yeꞌxtxojla chaj aanima. Pek aꞌ siilvoꞌk eetz tiꞌ qꞌuꞌl bꞌaꞌn niꞌaneꞌ. Tan abꞌiste vaꞌl bꞌaꞌn niꞌaneꞌ, tetz Tioxh. Pek abꞌiste vaꞌl maalo niꞌaneꞌ, yeꞌsaj tootzajit u Tioxh. 12 Sibꞌal aanima bꞌaꞌn iyolon tiꞌ u Demeetrio. Utz nimnaꞌl kꞌatza aas vinujul niꞌaneꞌ. Ech ant oꞌ, bꞌaꞌn kuyol tiꞌ majte. Utz ootzajle aas inujul niqaleꞌ.
Vitzojpu u uꞌ tzaꞌ
13 Sibꞌal tereꞌn koꞌxh kam saval see, pek yeꞌk suntzꞌibꞌa bꞌen tu uꞌ. 14 Tan nivitzꞌa aas oora texh savil aatz. Ech sayolonoꞌ aas laqil qibꞌ.
15 Atoj u paas sakꞌatza. Nitaqꞌ opon echajlichil qꞌu niman tetz u Jesuus latzaꞌ. Utz aqꞌ ichajlichil qꞌu niman tetz u Jesuus sijununil.