U Uꞌ ITZꞌIBꞌA BꞌEN U PABLOXEꞌ U FILEMOON
Yol tiꞌ u uꞌ tzaꞌ
Aatz u uꞌ tzaꞌ, u Pablo tzꞌibꞌan aas atich tu tzeꞌ tu Roma tu u yaꞌbꞌ 60 m.t.J. Tu yolbꞌal griego itzꞌibꞌava. Aꞌ taqꞌvu bꞌen xeꞌ u niman tetz u Jesuus Filemoon tu u tenam Colosa tan, tamiigoich. Echtzixeꞌt aꞌ bꞌenku vibꞌii u uꞌ tiꞌ vibꞌii u vinaj Filemoon tziꞌ. Til nabꞌ tootzajiv tibꞌ u Pablo tuchꞌ u Filemoon tziꞌ bꞌa. Tan yeꞌich tootzaj Colosa u Pablo. Ech nital Qꞌu Niman Tetz U Jesuus Tu Colosa 2.1. Kamal tu Eefeso tootzajiv tibꞌ tan, sibꞌal tiempo iꞌan u Pablo tziꞌ. Utz inajaꞌch koꞌn tibꞌ u Eefeso tuchꞌ u Colosa; maꞌl koꞌn 175 kiloometro ixoꞌl. Aatz u uꞌ tzaꞌ, aꞌ ex aqꞌon u Tiiquico. Aꞌich imol u Oneesimo bꞌeni. Choktaj Qꞌu Niman Tetz U Jesuus Tu Colosa 4.7-9.
Aatz vibꞌoꞌqꞌol viyol u Pablo tu u Filemoon utz, ayaꞌ vaꞌl aas saqꞌaavikꞌul u Oneesimo, vaꞌl aqꞌonomich xeꞌ u Filemoon. Tan kꞌayimich tibꞌ tu aqꞌon tzixeꞌ; esclavoich u Oneesimo xeꞌ u Filemoon niyolonka. Pek ooj bꞌen u Oneesimo xeꞌ u Filemoon tziꞌ. Yeꞌ ootzajibꞌe kantuꞌ. Kamal elqꞌi. Utz tiira mam paav vatz vimantaar qꞌu aa Roma aas ech siꞌan maꞌj aanima tziꞌ, saooj bꞌen kꞌatz ipatroon. Aal siꞌchveeti saꞌalax ikam u Oneesimo tiꞌ vaꞌl iꞌana tziꞌ. Pek ex chokaxoj u Pablo tu tzeꞌ tu u Oneesimo tziꞌ utz, ok tiꞌ u yolbꞌal Tioxh.
Uncheeꞌ ok tiviꞌ u Oneesimo tziꞌ aas saqꞌaavbꞌen xeꞌ u Filemoon. Ech itxakbꞌaꞌ tek tibꞌ u Pablo tiꞌ vatz u Filemoon. Qꞌaavopon u Oneesimo xeꞌ u Filemoon. Aꞌ imol u uꞌ itzꞌibꞌa u Pablo. A nijaj u Pablo tuul aas sikuy u Oneesimo tiꞌ vaꞌl vetiꞌana; saok ibꞌaꞌn tibꞌilaj niyolonka. Tan niman tek tetz u Jesuus topon xeꞌ u Filemoon. Ech tiꞌ itzꞌibꞌal u uꞌ Filemoon tzaꞌ.
Aatz tokebꞌal u bꞌii Oneesimo utz, “atil itxaꞌk” chu tu yolbꞌal griego. Aatz paj u bꞌii Filemoon utz, “bꞌanol tii tiꞌ imol” chu u tokebꞌal tu griego.
Aꞌ u jatxbꞌal tibꞌ qꞌu yol tu u uꞌ tzaꞌ.
1) v. 1-3 Nital bꞌen ichajlichil unjolol qꞌu niman tetz u Jesuus tu Colosa.
2) v. 4-7 Nital tiꞌ vikꞌujeꞌ ikꞌuꞌl u Filemoon tiꞌ u Tioxh utz, u tel taanima tiꞌ qꞌu niman tetz u Jesuus.
3) v. 8-22 Nijaj u Pablo tu u Filemoon aas sikuy u Oneesimo tan, niman tek tetz u Jesuus.
4) v. 23-25 Nikaasa qꞌu niman tetz u Jesuus tiꞌ itzojpu viyol.
1
U Uꞌ ITZꞌIBꞌA BꞌEN U PABLOXEꞌ U FILEMOON
Ichajlichil u Filemoon
1 In Pablo, aꞌ unmol u niman tetz u Jesuus Timoteo, nunqꞌilabꞌenaxh hermano Filemoon, axh vaꞌl tiiꞌoꞌ saiꞌ, lochol qetz tiꞌ ipaxsal u yolbꞌal Tioxh. Tu tzeꞌ atilkꞌin tiꞌ u Jesucristo. 2 Nunqꞌila bꞌen qꞌu niman tetz u Jesuus majte qꞌuꞌl nimol tibꞌ tu val aatibꞌal. Antu u niman tetz u Jesuus Apia vaꞌl tiiꞌoꞌ tiꞌ tuchꞌ u Arquipo, u kumol vaꞌl ela oꞌ sol tuchꞌ tu u aqꞌon tiꞌ u Tioxh.+. 2 Choktaj Qꞌu Niman Tetz U Jesuus Tu Colosa 4.17. 3 Taqꞌ koj vibꞌaꞌnil u Tioxh, u kuTat tuchꞌ u kuBꞌaal Jesucristo sete. Utz taqꞌ koj paas tetaanima.
Vikꞌujeꞌ ikꞌuꞌl u Filemoontiꞌ u Jesuus
4 Nunkꞌama u kuTioxh saiꞌ chajpaj nuul sunkꞌuꞌl. Utz nunnachpixsaꞌaxh te tu vunqꞌilat unsikꞌletaꞌ. 5 Tan nivabꞌi aas tiira tzꞌejel avaanima tiꞌ u kuBꞌaal Jesuus. Utz kꞌujlel akꞌuꞌl tiꞌ. Echat chituꞌ naꞌan tiꞌ qꞌu niman tetz u Jesuus. 6 Ech nunjaj tu u Tioxh aas saꞌxhootzaji kajay qꞌu bꞌaꞌnil qꞌuꞌl qetz nital tu viYolbꞌal tiqꞌaqꞌal u Cristo Jesuus utz, ech sapaxsa itziiul vaꞌl nikunima. 7 Ech tiira niꞌxhuntxuqꞌtxun saiꞌ. Utz naaqꞌ nimal unkꞌuꞌl tan, tiiꞌaxh tiꞌ qꞌu niman tetz u Jesuus. Ech taꞌntioxh see hermano aas nitxuqꞌtxun taanima qꞌu niman tetz u Jesuus saaqꞌo.
Vikꞌulax u Oneesimosiꞌan u Filemoon
8 Filemoon, aatz in, atil vijleꞌm tu u Tioxh utz, saveeti aas taꞌxhtzii saval opon see saꞌaneꞌ kam vaꞌl savaleꞌ. 9 Pek yitꞌ ech koj sunbꞌaneꞌ. Echixeꞌat nunjaj maꞌl bꞌaꞌnil see, in Pablo. Tan vootzajle aas ninalaꞌan tiiꞌaxh tiꞌ aanima. Nunjaj see in qꞌesla vinaj utz, aal atilkuꞌin tu tzeꞌ tiꞌ u Jesucristo. 10 Nunjaj bꞌaꞌnil see tiꞌ u Oneesimo, vaꞌl ech tatineꞌ maꞌl unkꞌaol tiꞌ u Cristo. Tan in vetꞌoksan tiꞌ inimal u Jesuus tuul atilin tu preexhuil tzaꞌ. 11 Tan kamal maꞌlich koꞌn aaqꞌonom yeꞌk itxaꞌk vetiꞌanka. Pek aatz cheel, atil tek itxaꞌk sunvatz utz, saatz majte. 12 Ech nunchaj opon tzaxeꞌ cheel. Utz kꞌul tikaꞌpaj. Ech ikꞌulax saꞌaneꞌ echaꞌ akꞌultꞌin naꞌaneꞌ. 13 Tan aal vatz unkꞌuꞌl aas maꞌkojkaa tzunxeꞌ. Silochꞌin tu u tzeꞌ tzaꞌ tiꞌ ipaxsal itziiul u bꞌaꞌnla chusbꞌal, echaꞌ nichaꞌan tiꞌ unlochleꞌ. 14 Pek yeꞌn val ikaaeꞌ tan, yuꞌnsaꞌ sunbꞌan maꞌj kam aas yeꞌk saatz. Ech aatz u bꞌaꞌnil vaꞌl saꞌaneꞌ, yitꞌ bꞌanel koj yaꞌlaxh tiꞌ, pek tiira see chit saelka.
15 Tan kamal vetchittelabꞌeka maꞌj tiempo axh u Oneesimo. Loqꞌ at tokeꞌ. Tan taꞌn tek saꞌatin tzaxeꞌ cheel. 16 Utz yitꞌeꞌch tereꞌn koꞌnkoxh tatineꞌ aꞌ maꞌj aqꞌonom siꞌaneꞌ, pek paalchu viꞌ maꞌl aqꞌonom. Ech kꞌula, echaꞌ ikꞌulax maꞌl niman tetz u Jesuus saꞌaneꞌ aas tiiꞌoꞌ tiꞌ. Tan tiiꞌin tiꞌ. Utz aal maas tiiꞌaxh tiꞌ saꞌaneꞌ. Yitꞌ tiꞌ koꞌn koj aas aaqꞌonom, pek tan, bꞌaꞌnla tek niman tetz u kuBꞌaal.
17 Ech oj nojchit in amol tiꞌ inimal u Jesuus naaleꞌ, kꞌula. Ech ikꞌulax saꞌaneꞌ akꞌultꞌin. 18 Tan oj kam maꞌj tiꞌ vetiyuchꞌvaxh utz, oj atil itxꞌoj tzaxeꞌ, aꞌ tek sajajvu ve. 19-20 Utz in sachoon see, in Pablo. Nivaqꞌ unqul tuul tu u uꞌ vaꞌl tuchꞌ unqꞌabꞌ nuntzꞌibꞌa tzaꞌ. Kꞌuxh aal atil atxꞌoj tzunxeꞌ tiꞌ vaꞌl bꞌanel see vaqꞌo vatz u kuBꞌaal. Ech txuqꞌtxunsaꞌin hermano utz, chiꞌbꞌixsa u vaanima tiꞌ u kuBꞌaal tu u bꞌaꞌnil vaꞌl nunjaj see tzaꞌ. 21 Nuntzꞌibꞌa bꞌen qꞌu kam see tzaꞌ tan, kꞌujlel unkꞌuꞌl tiꞌ vanimaneꞌ. Utz vootzajle aas aal paalchu koꞌxh saꞌan viꞌ vaꞌl nivaleꞌ tzaꞌ.
22 Utz nival bꞌen see majte aas nal aꞌan tuch vatibꞌal. Tan kꞌujlel unkꞌuꞌl aas sataqꞌ tzii u Tioxh soꞌoponin tzaxeꞌ. Vootzajle sitzaqꞌbꞌeꞌaxh tiꞌ vaqꞌilat asikꞌlet tiꞌ ajajtu vel tu tzeꞌ.
Ichajlichil qꞌu niman tetz u Jesuus
23 Nitaqꞌ bꞌen echajlichil u Epafras majte, vaꞌl ela atilin tu tzeꞌ tuchꞌ tiꞌ u Cristo Jesuus. 24 Utz nitaqꞌ opon echajlichil qꞌu lochol vetz majte tzaꞌ: u Kuxh, u Aristarco, u Demas, tuchꞌ u Lucas.+. 24 Aatz kajay qꞌu aanima atil ibꞌii tzaꞌ tziꞌ, jolol lochol tetz u Pablo. 25 Utz atin koj vibꞌaꞌnil u kuBꞌaal Jesucristo tetaanxelal. Aꞌi.