1 Nagrama vahe zmagerupintiro, ankero vahe'mokizimi zmagerura rugahuanagi, vahe'ma avesinte'zama omne'nenke'na, bero'mo ra ageru riankna nehu'na, zavena ahageno ageru riankna hugahue. 2 Hagi kasnampa ke hu muse'zane mika e'neri'na, Anumzamofo oku antahizama'a e'neri'na, mika knare antahi'zana e'neri'na, nagra mika hanave namentintia hanugeno agona retufega hugahianagi, avesinte'zama omne'nenigeno'a ana miko'za hanua zamo'a amnezankna hugahie. 3 Hagi nagrama maka'zani'a atre'na, zamunte omne vahe ne'za nezami'na, atresugeno tevefi navufa krefnane hugahianagi, nagripima vahe'ma avesinte'zama omne'nesigeno'a, ana miko'zamo'a amnezankna hugahie.

4 Avesinte'zana, agazone huno mni'zane, avesinte'zana so'e avu'ava hu'zane, avesinte'zana kenunu hu'za omneno, ra agi eri'zana omne'ne, avesinte'zana avufga ra hu avu'ava hu'zana omne'ne, 5 veganokno'zana omne'ne, agraguke antahi'zana omne'ne, agra ame'ama huno asi ovazi'zane, rumo haviza hunte'nea zanku nontahino agekanino mani'zane. 6 Avesinte'zamo'a havi avu'ava'zankura musena nosie. Hagi tamagezanku musena nehie. 7 Avesinte'zamo'a, agazone huno mni'neno maka knazana e'nerino, amentinti nehuno, maka'za fore hugahie huno nentahino, maka knazana erino vu'za me'ne.

8 Avesinte'zamo'a vgaoregahie. Ana hu'neanagi kasnampa ke hu'zamo ene, ru vahe zmageru ru'zamo ene, knare antahintahizamo'a vgaregahie. 9 Na'ankure tagra osi'a antahi'none. Anama antahi'nona avamente kasnampa kea huama nehune. 10 Hu'neanagi ana miko'zamofo fatgozama esigeno'a, osi'a zama nentahuna zamo'a fnane hugahie. 11 Ko'ma mofavre'ma mni'norera, mofavremo nehiaza hu'na nanekea nehu'na, antahintahia nehu'na, nagesa antahi'na refko'ma hu'noana mofavremo'za nehazaza hu'noe. Hu'neanagi rama nese'na, mofavre avu'ava'zana atre'noe. 12 E'ina hu'negu kapopima avugosa ke so'e osiankna menina nehunanki, henka'a Anumzamofo avufi oge age hugahune. Menina Agrira osi'a ke'na antahi'na hu'noanagi, henka'a kena antahi'na hugahue. Agrama nagri'ma maka nageno antahini hu'neankna hugahue. 13 Hagi ama'i tagufa'azamo mevava hugahie, amentintihu zane, fore hugahie huno antahi amuha hu'zane, avesinte zane me'ne. Hu'neanagi ana tagufa zampintira, avesinte'zamo agatereno tusi'a zana me'ne.