1 E'ina hu'negu Kraisi'ma avufafima atazama eri'neankna nehutma, tamagra anahukna antahintahi erita maniho, na'ankure tamagrama anahu knazama erinutma kumi'ma huzana atregahaze. 2 Anahukna huno ama avufganema mni'nenuno'a, vahe'mofo havi avesizampina ovugahianki, Anumzamofo avesizampi vugahie. 3 Tamagra Anumzamofoma keno antahino osu vahekna hutma, zaza kna ama mopafina mni'neta, havi tamagu tamagesa nentahitma, havizamofo avesizampi nemanitma, negi tina nenetma, ranke huta vano nehuta, neza kretma nenetma, havi anumzamofo mono hunte'naze. 4 Menina korapa arone timimo'za havi tamavutamavara nosazage'za neramage'za, nahige'za tagranena vano nosaze hu'za antri nehu'za, tmazeri haviza huke nehaze. 5 Hianagi zamagra keagama refkoma hu Jasi nemofonte oti'za, nankna zmavu'zmava hu'nenazana nesamisage'za, fri vahe ene kasefa hu'za mni'naza vahe'enena refko huno keaga huzmantegahie. 6 E'i ana agafare knare musenkea fri'naza vahete'enena huama hazage'za antahi'naze. Nazano ama zamufare mni'ne'za hu'nesaza zante refko huzmantegahie. Hianagi avamu'zmimo'a, Anumzamofo avesite manigahie.

7 Makazama vgaresia knamo'a, hago kofta hie, e'ina hu'negu antahintahia hu so'e nehutma, nunamuma hu tamavutamavamofo azeri hanavenetita, kazigazi hutma viho. 8 Makazama agatere'neazama hanazana, vaheku'ma ovesinte avesinte hu avu'avazana otretfa hiho, na'ankure avesinte avu'avazamo'a, rama'a kumi refinete. 9 Mono tamafu tamagnazama esageta, so'e tamavutamavaza hunezmantetma, antahi havizana hutma ke hakarea huozmanteho. 10 Magoke magokemotma Anumzamo'a so'e musezama'a taminegu, ana musezanteti rumokizmia so'e tamavutamavaza hunezmantenkeno Anumzamofo so'e avu'avazamo'a, tamagripina aviteno vino. 11 Magomo'ma Anumzamofo nanekema huamahu musezama eri'nenimo'a, huama nehina, mago'mo'ma vahe'ma azahu musezama eri'nenimo'a, Anumzamo'ma ami'nea hanavereti vahera aza nehinketa, makazama hanazana Anumzamofoma ra agima amizanke hiho. Na'ankure Jisas Kraisi'a masnentake huno hanave'ane mni'ne. Tamage.

12 Ronenimota tamagra reramahe zampima nevazazamo'a, tevefi viaza nehazagu kasefaza fore nehie hutma antria osiho. 13 Hianangi ana tamatazama e'neriza zankura muse huvava hiho. E'i anazamo'a Kraisi'ma atama eri'neaza nehazankino, Agrama hanavenentake masa'ane eama hanigetma, magokama muse hanaza zamofo retro huneramante. 14 Hanki Kraisi agi tamagripi me'nenige'za, tamazeri haviza hanazana, asomu erigahazanki muse hiho. Na'ankure hanavenentake msa'ane Avamu'ene Anumzamo'enena tamagrane mani'ne. 15 Tamagra vahe ahefrizantero, kumazafa sezantero, mago'a hazenkerero, vahe'mokizmi zante tamagena vazigevazige nehutma, tamata erizanku kegva hiho. 16 Hianagi iza'o mono vahe'ma mni'nenigeno, atama amisaza zankura agazegura osino. Hianagi e'i ana mono agima eri'neazankura, Anumzamofo agi erisaga hino. 17 Na'ankure Anumzamo'ma vahe'ma refko hania kna hago neankino, esera Anumzamo'a Agri'a nagamota refko hugahie. Hanki tagritema agafama huno refkoma hanuno'a, knare musenkerema zamentintima nosaza vahetera, inankna hugahie. 18 Anumzamofo avontafemo'a anage hu'ne, fatgo vahe zmaguma'vazizamo'ma amuhoma hanigeno'a, Anumzamofoma atrezama kumima nehaza vahetera, inanknaza fore hugahie? (Pro-Knr 11:31)

19 E'ina hu'negu tamagrama Anumzamofo avesizama amage'ma nentenageno, vahe'mo'za tamatazama tamisageta, tamagri'ma tro'ma hurmante'nemofonte tamentintia nehutma, fatgo tamavutamava huta maniho.