1 Nafu naganaheta Ramofo Jisasimpi mani'naza nagamota, rempima huraminona kante antetma manihogu tagra tutu huneramanteta, tamazeri hanavenetunanki, tamagrama nehazaza hutma, mago'ane hanavetita ana avu'avara hiho. 2 Na'ankure tagrama kasegema, Ramofo Jisasi hanavefima tamasamunketma ketma antahitma hu'naze. 3 Na'ankure ama'i Anumzamofo avesizane, mani agru hutma maka monko avu'avazampina maniho. 4 Tamagra mago magomotma tamavufga kegva nehutma, tamazeri agru nehutma, ruotge hutma maniho. 5 Tamagra havi tamagu tamagesamofona kazokzo vahe'agnara nosutma, Anumzamofo keno antahino osu vahe'mo'za nehaza zana osiho. 6 Tamagra Ramofo amagema nentesamokizmia, rezmatga hutma mono Neramafu a'nea zmazeri savri osiho. Antahiho, ko tamavumro tamantenone. Iza'o e'inahu avu'avazama hanimofona, ana hazenke'arera, Ramo'a azeri haviza hugahie hu'none. 7 Na'ankure Anumzamo'ma tagrima tagima hu'nea agafa'a, agru osu avu'avaza avaririhogu tagi osu'neanki, mani ruotge hanunegu tagi hu'ne. 8 E'ina hunegu iza'o ama kema amefima hunentemo'a, vahe'mofo ke amagena hunonteanki, Anumzamo Ruotge Avamuma tamaminemofo naneke amagena hunemie.

9 Nenfugta avesintezamofona mago'ene avona kreta, ovesinte avesinte hiho huta osugahunanki, Anumzamo ovesinte avesinte hu'zana ko rempi huramine. 10 Na'ankure tamage, maka Masedonia kumate mani'naza tafuhegata, makamotma ovesinte avesinte ko hu'naze. Hianagi tafuhegata huhanavetike tamasamita, mago'ene ovesinte avesinte hiho huta neramasamune. 11 Tamagra fruma huno manizankura hanavetitma maninetma, tamagra'a erizana eriho. Koma hihoma hu'na tamasami'nonaza hutma, tamagratami tamazanu eri'zana erigahaze. 12 E'inahukna nehutma, megi'ama mani'naza vahetera, knare tmavutmava nehutma, mago'a zankura atupara osugahaze.

13 Nafuhegta, mono nerafuza koma fri'namo'za nankna hugahazafi, tamagra ketma antahitma nehutma, Jisasi'ma esigu amuhama nosaza vahe'mo'za zavimanetaza zana osugahaze. 14 Na'ankure tagrama tamentintima hunana Jisasi'a friteno oti'neankino, anahukna huno Anumzamo'a zmentintine vahe'ma fri'naza vahera zmazeri otisige'za, Jisasi'ma esiankna zupa magoka egahaze. 15 Na'ankure amanahu kante Ramofonkea neramasamune, mani'nona vahe'mota ovunenukeno, fri'naza vahe'mo'za otiza ugota hu'za marerigahaze. 16 Ramo'a Agra'a monafinti eneramino, hanavege huno kezanke nehanigeno, ugota ankeromo'a ageru nerinkeno, Anumzamofo ufemo krafa nehanigeno, vahe'mo'za Kraisinte zamentinti hute'za frinesaza vahe'mo'za kote'za kerifintira otigahaze. 17 Anantera tagrama ofritama maninesuna vahe'mota, tavresigeta mrerita hampompi omeri mago huteta, magoka anagamu Ramofona ome tutagiha hunenteta, maka kna Agrane manivava hugahune. 18 E'ina hu'negu ama nanekenu, magoke magokemofona ozmazeri hanaveti azmezeri hanaveti hiho.