Aposel nolau
Aposel Aleu kakaiwa mukawa mampe nolantoiena benemawa Luk girumalena
1
1-2  Luk 1.1-4Niapo Teopilas, ne auwaedina! Ne bukana bautaa bedewe Iesu nolawa uwaalene no bedembo nolaleidie dewa uduudu dewasana do waeuwalena ita nolawa ompa osowe wisene me wadenposie uboo odene alena umanawa uduudu girumanten. Me aposel sonabamona Aleu kakaiwa mampe gagalomone aupe mo emone uboo odene alen. Iesu poka etaidasane ita bolen, tane bo bedewe enenwisene walama 40 bedewe aposel mampo sabamolen. Ita me eueuwawa daitada mampe ipawanasadie me ipa inawaa wande. Ita do me God gonaawa umanawa mo mampo benemaleno eteiena.
Luk 24.49Walama dea Iesu mo do nana naie waimoie me diamone wanase, “Ierusalem mai ene aitana, dia. Tane amona ne Mamana God sauawalena umanawa ne benemawanteno etalana anuwa wanlempa. Matiu 3.11; Mak 1.8; Luk 3.16; Ion 1.33Ion esa mampe babatutulen, tane walama isiwa diantopuo aupe e Aleu kakaiwa mampe babatutuitana.”
Iesu wadenposie uboo odene aleide
Sape aposel auwene waimoie Iesu waitarasane waienase, “Tatamba, walama ema bedewe e dewasawo Rom gabemaniwa no bolamba Israel onieia epue antopu ita e no bolamba leusae nenawo nuba onieta, ba?”
Iesu sipoamone wanase, “Walama ba omo dainea Mamamba me meba mukawa mampe ituna e mai ateitana rua, dia. Matiu 28.19; Mak 16.15; Luk 24.47,48Tane walamaipa Aleu kakaiwa e osolawo iepio e muka wadane ne benemana apanawa wanaitane Ierusalem ita Iudia bolawa uduudu bedeuwointa, do Samaria ita do tawo moawa daitada bedeuwointa ne umanana benemanaitane aitana.” Mak 16.19; Luk 24.50,51Iesu gagalo ema wane diasano mo emauwo God me wadenposideno uboo odene aleidio giou me taunbodeno ewanasudeiena.
10 Iesu alenawo mo uba emosaie eneio tauwadea apana nata garau sapusapua tautaula do wimone tampo enane 11 wane waienase, “Galili apanawa, dima baiwa mape eneile emala odedio uba emosailana? Iesu sa e manlawoe wadenposie uboo odene aleidio ewalana rua ewaewawa deawaa leulepie wisepi.”
Mataias Iudas aupawa wadede
12 Ema aupe mo wadi Olib ene leuntone inta maidana Ierusalemwa antoiena. 13  Matiu 10.2-4; Mak 3.16-19; Luk 6.14-16Mo sape wimone du onapea naepe mo kainokaino auweiawo odane anton. Tane du sawo auwene waimoia ebou ipa ema: Pita, Ion, Iems ita Endru, Pilip, Tomas, Batolomiu, Matiu, Alpias otopa Iems, ita Saimon, me ona apanawa ebou Selot sou dea, ita Iems otopa Iudas. 14  Mo uduudu ioto isiwa do walama ituia rua auweitue rauparintoi. Tane Iesu inawa Meri ita Iesu wanwambaida mo do sape awodeantoie.
15 Mo epe dewantoie waimoio walama dea bedewe sumanai apanawa 120 rua auweiena ita Pita mo bedeuwo gagalo baiwa enenwisene 16 wane wanase, “Sosona, dima uduudu mapo buka bedewe Iudas, mida Iesu onawa apanawa me wadapua baiwa banlamona, umanawa girumalena God insaisawa rua ipawanalen. Dima Aleu kakaiwa warere Dawid moawe Iudas umanawa gagalolena ruaida segalentuwan. 17 Iudas ipa no nola somba dea, no do wanwanlala. 18  Matiu 27.3-8Me dewa kadiwaida dewasane Iesu onawa apanawa mamposan. Ita me dewa sa dewasane unewa mane wadena mampe dogo moawa gimaralen. Tane dogo sa osowe me uwaweuwawe omene bupa tuwano me sinaemba nosenauben. 19 Ierusalem apanawa uduudu dewa ema umanawa etane ita dogo moawa sa mo muba aiau mampe ebowa itune waienase, ‘Akeldama,’ aia ema ipawaida ipa osina dogowa.”
20 Ita Pita gagaloleidie wane wanase, “Sam bukawa bedewe Iudas umanawa girumalene wadiase,
‘Me duwa aupawa di enompa, mai mida da bedewe wampi, dia.’
Tane do girumalena wadiase,
‘Me nolawa ena aupawa apana da wadepie oniepi.’
21-22  Matiu 3.16; Mak 1.9; Luk 3.21; Mak 16.19; Luk 24.51Ema girumalena rua Iudas aupawa apana da wadepie no aposel bedembolepie Tatamba Iesu enawisawa benemawa apanawa wanalepi. Ne menanedia no bedembo somba dea, mida Iesu no do wainitana walamawe awodea leite Iesu dima dewasano ewentue atenlena, sonabeto Iudas aupawa wadepi. No somba dea mida Ion apana babatutumodiawo ita Iesu no enene wadenposie odene uboo alena walamawe no do wankasantena apanawa sonabeta.”
23 Pita epe wana baiwa sumanailala sosou nata, Iosep ita Mataias, enitumoiena. Iosep sa ebowa da waia Basabas ita Iastas. 24 Mo God sonabawa atentopua baiwa rauparintone waienase, “Tatamba, e apana uduudu nuau eweiana atena. No euwanea apana ema nata bedeuwo dainea e sonabeiana 25 me aposel nolawa bedewelepie Iudas aupawa wadepi. Tane Iudas nola sa ene me bolawaida kadiwa bedewe alen.”
26 Mo rauparintoieno dialeno aupe mida God sonabena atentopua baiwa mo dewau rua eueuwa dewasane nitu da dogo osowe aubeiena. Ita eueuwa sa mampe ewane atentoiena God Mataias sonabena aposel 11 bedeuwolepi. Ita mo eueuwa eweiena rua Mataias sonabeieno Iudas aupawa waden.

1:1-2: Luk 1.1-4

1:4: Luk 24.49

1:5: Matiu 3.11; Mak 1.8; Luk 3.16; Ion 1.33

1:8: Matiu 28.19; Mak 16.15; Luk 24.47,48

1:9: Mak 16.19; Luk 24.50,51

1:13: Matiu 10.2-4; Mak 3.16-19; Luk 6.14-16

1:18: Matiu 27.3-8

1:21-22: Matiu 3.16; Mak 1.9; Luk 3.21; Mak 16.19; Luk 24.51