Bumpaida
Waeuwa uawa
Buka ema bedewe ambi dewa uduudu bumpeido segalena, ita ambi apana segalena, tane do Israel apanawa ambi segantona umanau wade. Giruma ema bedewe dewa nata debamau winei:
Buka nepa 1-11 ambi God tawo uduudu ita apana bumpe dewamona umanawa wade. Buka ema bedewe Adam ita Iwi, Kein ita Abel, Noa ita abaia ita do du iwa daumawa bola debama Babel bedewe wadeiena dudunau wisiaitana.
Buka nepa 12-50 bedewe ambi Israel apanawa segantone odeiena umanawa wade. Nepa ema bedewe Abraam ita me otopa Aisak, atawa Iakob, ita Iakob obampa uduudu 12 ita nosinosiwa Israel damba uduudu 12 umanau wadia wisiaitana.
Apana mida buka ema girumalena ebowa mai atentepona tane aten apanawa uara waia Moses duduna ema girumamon Israel apanawa atentopua baiwa, ambi God mo sonabamona me apanawa wanantopu ita dima mo baibu dewasana umanawa atentopu.
1
Bumpeido God uba ita tawo dewamona gagalowa
Bumpeido God uba ita tawo segamon. Tane walama sawo tawo mai segalepe wineipe, dia, sala iwimpaia winedie ita God Aleupa os esa osowe tepaleidie. Ita God badowa wanase, “Sapa waa” 2 Korint 4.6 ita sapa segalen. Ita God sapa sa ewena ipa euda ita sapa iwimpa nata empuiamone nambenambemon. Ita God sapa ebowa wane ituna walama, tane iwimpa ebowa wane ituna tadina. Ita rawi rialene aleno walama sapawa wisen. Sa ipa walama dea.
Ita God badowa wanase, “Bela badowa iono segaite esa enapundepio nata segantopu.” 2 Pita 3.5 Ema epe inta God wano bela badowa esa einpue awopa itun, da atowe ita da iono, ita rua segalen. Ita me bela badowa ionoa ebowa wane ituna uba. Ita rawi rialene aleno ita walama sapawa wisen. Sa ipa walama natawa.
Ita God badowa wanase, “Esa uba atowe enapune inta dea enaa ita dogo makowa segaita.” Ita wana rua segalen. 10 Ita God tawo makowa ebowa wane ituna dogo, tane esa auwene enena ebowa wane ituna owa. Ita God ewena ipa euda. 11 Tane God badowa wanase, “Dogo osowe nitu uduudu initane segaitana, isiwa ipawa os ita isiwa ipawa naumpaa bedewe naumba dola. Ita naumba naumompa iawa inainambu rua.” Ita wana rua segalen. 12 Ita tawo osowe nitu uduudu wana rua seganton, isiwa ipawa os ita isiwa naumompa bedewe naumba dola. Ita naumba isiwa naumompa bedewe iawa inainamba rua. Ita God ewena ipa euda. 13 Ita rawi rialene aleno ita walama sapawa wisen. Sa ipa walama natadeawa.
14 Ita God badowa wanase, “Sapa siwa rua uba tampe segaitane walama ita tadina enapundepio awoantopu. Tane eueuwa baiwa walama ita ena intaweintawe nolantompa ita do oda walamawa insempaa baiwa empuempusapi. 15 Ita sapa siwa rua uba tampe walama oniempe nolalempa baiwa.” Ita wana rua segalen. 16 God sapa siwa rua debamau nata dewamon, sapa debamawa walamo sapa wampaa baiwa, ita sapa kerauda tadino sapa wampaa baiwa. Ita kipora do dewamon. 17 God sapa siwa rua uba tampe teamona tawo sapasampaa baiwa, 18 ita sapa sa walamo ita tadino nolantompa baiwa ita do sapa iwimpa nata empuempumopia baiwa. Ita God ewena ipa euda. 19 Ita rawi rialene aleno walama sapawa wisen. Sa ipa walama 4.
20 God badowa wanase, “Esa bedewe moia uaraitane wanlempa, ita do nene uaraitane uba tampe leununa.” 21 Ita me owa moiawa debamau ita kerakera ewaewau daitada uduudu dewamon, moia owa bedewe wanwanlala ita nene ewaewau daitada mo muba uarantopu muba inainambu rua. Ita God ewena ipa euda. 22 Ita God sau euda osouwo itune wanase, “Moia esa bedewea otootoitana ita uaraitane esa bedewa nopesana, do nene tawo osowe otootoitane uaraitana.” 23 Ita rawi rialene aleno walama sapawa wisen. Sa ipa walama 5.
24 God badowa wanase, “Tawo ema osowe pue daitada segaitana. Pue manasau duwa wanwanlala ita pue dobinoa, do pue dogo osowe tetelala eba otootoitane inainala rua segaitana.” Ita rua segalen. 25 God pue inainambu daitada dewamon ita isiwa otootontone muba inainambu rua seganton. Ita God ewena ipa euda.
26 Tane God wanase, “Tauma no apana dewasata, no inainanimba rua. 1 Korint 11.7 Ita mo moia esa bedewe wanwanlala, ita do nene uduudu uba tampe lalala do pue daitada tawo osowe wanwanlala ita isiwa tetelala do oniamopu.”
27 God apana dewamona meba inainamba rua.
Meba ruaida dewamon.
Me apana ita i dewamon. Matiu 19.4; Mak 10.6
28 God sau euda mo osouwo itune wanase, “E tawo ema osowe otootoitane uaraitane ita e os uduuduitana. Moia owa bedewe wanwanlala, nene iono lalala ita do pue uduudu tawo osowe wanwanlala oniamona.” 29 God wanase, “Tawo osowe nana uduudu enalena, nana isiwa bedewe naumba dola. Tane nana ipawa naumoie wineia ipa e baila nanuna baiwa. 30 Tane pue dobino wanwanlala ita nene iono lalala ita do pue tawo osowe tetelala inawaa waimoia mo baibu ne ina wasiipa wanamodina mo nampaa baiwa.” Ita me wana rua segalen. 31 Tane God dewa uduudu dewamona ewamona ipa eudida. Tane rawi rialene aleno ita walama sapawa wisen. Sa ipa walama 6.

1:3: 2 Korint 4.6

1:6: 2 Pita 3.5

1:26: 1 Korint 11.7

1:27: Matiu 19.4; Mak 10.6