Aisaia
Waeuwa uawa
Aisaia buka ema girumalen. Me God perowetawa debamawa Ierusalem bedewe wandie. Buka ema bedewe gagalo uwa natadea winei.
Nepa 1-39 bedewe tawo Asaria warerewa ita sorodiawa do Israel ita Iuda onau eneie aimoia umanau wade. Ita peroweta Aisaia Iuda apanawa wasaumodia sumanaibu mai warere ita mo sorodiau do bedeuwo itumpa, tane mo sumanaibu God os mampe itumpe ita do me aiawa ruawantompa.
Nepa 40-55 bedewe tawo Babilon warerewa bola Iuda apanawa onau enene aimone ita otamone me bolawa Babilon bedewe alena umanawa wade. Ita peroweta Iuda apanawa wasaumode God ando leumopio Ierusalemwa wimopuo me ina sanaa wanamopio wampu.
Nepa 56-66 bedewe Iuda apanawa leuntone Ierusalemwa wimoiena umanau wade ita peroweta God dima Ierusalem, bola daitada, uwa daitada ita dan daitada tawo osowe waimoia mampo dewasapia umanawa wade.
2
Apana Iawe God wadiwa osowe antoi
Iawe God ando Iuda ita Ierusalem mampo dima dewasapia umanawa Aisaia Eimos otopa benemasadio atenleide.
 
Walama iedia wisepio wadi dainea osowe,
Iawe God duwa enedia uduudu onapoidolepie enakasalepi,
wadi sa ionoidolepie isiwa nanaumopi.
Tawo uduudu apanawa esa rua memepuaubepue me wawa bumpe auwepu.
Ita apana sa wapue wapuase,
“Winleno odate antata Iawe God wadiwa osowe Israelwa Godiu duwa enediawo.
Sape me dima menasadia no waeuwanepio dewasante wainenta.
Me no waeuwanepio intawa asiasi antonta.
Iawe God wadiwa Saion osowee me anaanawa nosepie alepi,
ita me aiawa Ierusalemwae nosepie alepio apanawa etapu.* Saion ipa bola dea tontawa bola debawa Ierusalem bedewe winede. Bola sa wadi iwa osowe winede ita God duwa sape wadeiena. Iawe aiawa bola sa dea bedewe nosedie aleide.
Me bola daitada apanawa empuempuntoie waimoia kotumopio
dodomanantopue wampudewantopu.
Mo onau puraiwawa dewamopuo irai dipawa segantopu,
ita mo eu epadodomanamopuo isima segantopu iraibu simbiamompa baiwa.
Ita bola daitada onau apanawa mai osowe onau puraiwawa otamopue onantopu.
Mo mai ona baiwa imaantopu, diaida.
Iakob nosinosiwa, winleno Iawe God sapawa bedewainta antonta.”

*2:3: Saion ipa bola dea tontawa bola debawa Ierusalem bedewe winede. Bola sa wadi iwa osowe winede ita God duwa sape wadeiena. Iawe aiawa bola sa dea bedewe nosedie aleide.