10
Yisasia kanale sipi sipi afumo kava kano maine.
1 Yisasia mage huno hie “Nagaya tamage-lafa huna tamaha-nepauve nagoa vayamoya sipi sipi kegiyamo fiatetima hai ofaleya afalegatima asaga hu-maiya hai falesaya vayala musufa vaya mainae. 2 Nago kanomoma fiatetima hai nefalea kanoa sipi sipilema kava neyagaiya kano maine. 3 Fiatema yagai-mainea kanomoa ani kanoa ageteno yaki-tegeno fiateti hai falegeya sipi sipiyagamoya alenaga agea havimainaya yafe agaia sipi sipimogamina amakia hanete hanete hu-maineanagino amakia ayete ayete huno amavaleno kumatega nevie. 4 Amavalenoma kumatega neunofena uhagoteno nevigeya ani kanomona alenaga agema havimainaleti lagiya ani sipi sipimoya akave nevae. 5 Nagi oagenaya vayamogami amakavela ougahae. Nagi ani kanomona alenaga agema ohavinaya yafe faleya alulega ugahae.” huno hie. 6 Yisasia mani avame kea hama-paiyanagi amakaya havilama huya ohavinae.
7 Ohaviyanagi Yisasia nagoene eteno mage hu-maine “Tamage-lafa huna tamaha-nepauve nagaya sipi sipimoyama hai falesaya fiana nagainige mainoe. 8 Mainoanagi hagoteyama emainaya vayala vayama nehamaeya musufa yama nehaya vayalagiya sipi sipiyagamoya kema haya kea ohavinae. 9 Ma nagaya fia mainoe. Mainoanagitama nagoa veamogatama etama nagaipi ehai falesagena tamaku tamamena ali-gatisugetama hai faletama mainetama elavitetama haitetama nehutama nesaya yana aligahae. 10 Musufa kanomoa musufa yana nehuno veala nehamaeno ali haviya hu-ma-tegahe neeanagi nagaya kanalenale tamahaimu tamamigahe emainoe. Agola hano ohu tamahaimula tamamigahe emainoe.
11 Nagaya kanalenale sipi sipi kava kano mainena sipi sipiniamogamina amaku amamemaa ali-gatisua yafe faligahue. 12 Nago kanomoa yagaiteno mone nealia kanoa sipi sipimona nefaa omaine. Omaigeno afela kalamoma egenoa ani kanomoa ataleno falegeno ani afela kalamoa sipi sipimogamina akafu amanino mo hamae me hamae higeya faleya atagufeya alulega ute ete nehae. 13 Ani sipi sipilema yagaino maineno monema nealia kanomoa sipi sipiyagahena agesa ohavino amataleno faleno umaine. 14-15 Nagaya kanale sipi sipi kava kano mainoe. Nenafaa agua namigena nagaya nagua amugetaa nehue. Naa hu-mainoa kava huna sipi sipiyaganimoya amakua namigena nagaya nagua neamamue. Nagaya sipi sipiniamogami amaku amamemaa ali-gatisua yafe faligahue. 16 Nagoa sipi sipiyagania amahaote mainae. Mani sipi sipi kegiyanifina omainayanagi ani afuyaga amavalenama esuana alenaga nage nehaviya nagokeage afuyakama maisayana nagokemona ani sipi sipiyagalela kava kano maigahue.
17 Nagaya ‘Afaa faligahue.’ huna hua kehena Nenafaa tusiya huno hau ayamopafi nehaiye. Naafene? Nahaimula atalesugeno eteno namisigena he-tisuayafe nahaimula afaa atalegahue. 18 Nagoa vayamoya nahaimula naha-ofalegahae. Nagaya nagainiage nahaimula atalegahue. Nahaimuma atalesua tokiyaniaene ataletena etena alisua tokiyaniaene hane. Aniama hisua kavamo kea Nenafaa ago naha-pai-maine.” huno hie.
19 Mani kema hia kea Yuta vayamoya haviteya tolefi ali fako hu-mainae. 20 Kasagoyamoya mage hae “Kefo Avamumo agupi hai-mainegeno aifonafo nehigi naa higetama kea maitama havimainae?” huya hae. 21 Hageya nagoamoya mage hae “Kefo Avamumoa agupima maineleasina mania augafa kea ohileasine. Kefo Avamumoa aulagama asu hu-mainea kanomo aulaga aligali hu-oateleasine.” huya hae.
Yuta vayamoya Yisasina kame hu-tenae.
22-23 Nayona mono no kimaleteya fita yaki-mainaya kanahe muse nehaya imu Yelusalemu ki-mainae. Ani imua yasi nealia kanale negiyanagino ani kanalela Yisasia Anumaya Koti nopi umaineno Solomoni yasi nealea nona aye-nagali-malenea kaiyaga nevie. 24 Mukia Yuta veamoya meliya amuno huteya maineya mage hae “Tagu tagesamoa tole-lole nehuno taipamoa kanaage nehigi. Menia hu-falote huka taha-paiyo kagaya Anumaya Koti hu-ga-tegeka emainana kano mainano?” huya hae. 25-26 Havigageno Yisasia mage huno hie “Nagaya agoma tamaha-pai-mainogi nagaifena havitama tamakupi maletama tamametiti nohae. Nenafa naminea tokiya yateti aliyana alugetama agayana ani yana nagaya Anumaya Koti hu-na-tegena emainoa kano mainoa yafe tama-ve-lianagi nagai sipi sipima omaiya yafe havitama tamakupina nomalae.
27 Nomalayanagi nagai sipi sipiyagamoya nagaila alenaga mage haviteya nakave malagena nagaya amakaila ago amake-mainoe. 28 Amaketena maige maige hisaya hamaimula ago amaminoanagiya ofaligahae. Nagaila ago nayapi mainayanagino nago kanomoa memavayu ohugahie. 29 Nenafaa ani sipi sipiyaga naminea kanogino mukia yana amakase-mainea kano mainea yafe alu kanomoa Nenafa ayapitila haofalegahie. 30 Nenafaene nagainiene nagoke mainoe.” huno hie.
31 Higeya Yuta vayamoya nagoene yafa kayo aliya haesaya kava nehae. 32 Nehageno Yisasia mage huno hama-paiye “Nagaya mukia Nenafa naminea tokiya avame yana tamakai tamaulagafina ago hu-mainogi nagoke avameyana hana avameya hua yamo notamahaigetama nagaila yafatetila nahaegahena nehae?” huno hama-vige. 33 Hama-vi-gegeya “Tokiya avame yama hu-mainana yafene huta yafatetila okahaegahunagi kagaya ma mopafi afa kano mainekagi ‘Anumaya Kotiene nagoke mainoe.’ hukama hanana Anumaya Kotina kalana ategana kema hana yateti kagaila yafa kayotetila kahaegahena nehune.” huya hae.
34 Hageno Yisasia mage hie tamakaitami mono kema kae-malenaya kemoa mage hu-maineane
“Anumaya Kotia mage hie ‘Tamakaitami Anumaya Kotigatama mainae.’ huno hie.” huya kae-malenayane.
35-36 Ani Anumaya Koti kea kae-malenaya ke hanege hanege huno tamageage hugahie. Anumaya Koti kema agoma hama-paiya vayafena “Anumaya Kotigatama mainae.” huno hu-maineana nagaya Nenafafena “Nenahaiya kano mainane huno hu-na-tegena ma mopafina emainoema.” huna nehuana naa higetama “Nagaya Anumaya Kotina neamonae.” hunama hua kehena “Anumaya Kotina hu-haviya hu-neatane.” hutama hu-nena-tae? 37-38 “Nagaya Nenafa aliyama oaluleasina nagaifena havitama tamakupi maletama tamametiti ohaleasinagi kanale kava haleasine. Nagaya kema hu-mainoa kehema havitama tamakupima omalenutamahena aliyama ali-mainoa aliyafena havitama tamakupi maletama tamametiti hiho. Naa hisayana Nenafaa nagaiene maigena nagaya ania huna agaiene mainoema huna hua kea havilama hutama havigahae.” huno nehie.
39 Higeya nagoene atafa huya nofi hu-tegahe hayanagi amakaseno ago umaine. 40 Uteno Yisasia eteno Yotani lina mo lakaeno Yonima lima fale-ma-tenea kumate mo maine. 41 Mo mainegeya mukia veamoya melitalu huya maineya mage hae “Yonia keama alino lokiya vaisia yana nagola malegeta oagenonagi ma kanomofena mukia kema hu-mainea kemoa tamage-lafa hu-maine.” huya hae. 42 Mukia ani kumate veamoya Yisasifena haviya amakupi maleya amametiti hu-mainae.