4
Satania Yisasina ayevataga humaine.
1-2 Anumaya Kotina Alu Aotage Avamuamoa Yisasina aguafi hiya higeno Yisasia Yotani tina atalenoma neviana Alu Aotage Avumumoa veane omai kame kotega avaleno motegeno fotia (40) yupa mainegeno Satania Yisasina “Havi kava ho.” huno ayevataga humaine. Ayevataga huge huge nehigeno Yisasia kavela ani fotia (40) kanafina oneno afaa mainegeno tusia agatemaine.
3 Satania Yisasife mage hie “Kagaya Anumaya Koti nafanema mainenukahena ma yafana hapaigeno maya hapaeno.” huno hie. 4 Higeno Yisasia kenonaa mage huno hapaiye “Anumaya Koti avopiti kemoa mage humaineane
‘Vayamoya mayaage nesayana kanaleya huya omaigahae.’ huno humaineane.” huno hie.
5 Satania Yisasina anale avaleno viayamo aupaa mukia ma mopafi hanea ala kumayagaene afenoyamaaene avelimaine. 6 Aveliteno Satania agaifena mage hie “Mani kanale kumayaga kavama yagaisana tokiya kamigahue. Ani kava yagaisia tokiyaa nagaini ya haneanagina nagaya nahaisia kanomona afaa amigahue. 7 Kagayama nagaifema ‘Tusia ala kano mainane.’ huka naiyafi ape huka ala nagi namitesanagena ani kavama yagaisana tokiya kamigahue.” huno hie. 8 Yisasia kenonaa mage huno hie “Anumaya Koti avopi kaemalenaya kemoa mage huno humaineane
‘Anumaya Kotikamona agaiagefe ‘Tusia ala kano maine.’ huka kagesa havi havi huka agia alisaga huka agai aliyamaage alio.’ huno humaineane.” huno hapaimaine.
9 Satania Yisasina Yelusalemu avaleno ala mono nomo agotofule ateneno mage huno hapaiye “Kagaya Anumaya Koti nafanema mainenukahena ma nomo agotofuleti mopafi asaga hulavio. 10-11 Anumaya Koti avopiti kemoa mage humaineane
‘Anumaya Kotia ensole vayaahe ‘Kava hiho.’ huno humatesigeya amayateti kavalesaga hulisageka tavisanageno yafatela kaiyamona aye kofa ohugahie huno humaineane.” huno hie.
12 Higeno Yisasia kenonaa mage huno hie “Anumaya Koti avopiti kemoa mage humaineane
‘Anumaya Kotikamo tokiya ayevataga ohuo. Afa yafe ‘Tokiya kava huo.’ huka ohuo.’ huno humaineane.” huno hie.
13 Higeno Satania mukia alu ya alu ya huno ayevataga hugeteana higeno Yisasina ataleno nagoa kanale ayevataga hisia kanalefe agava maine.
Yisasia Kaliliti aliyamaa aepa hemaine.
14 Yisasia Alu Aotage Avamumo tokiyaaene Kalili kotega egeno agai avagemoa ani kotega ute ete higeya havimainae. 15 Mono noyagaamifi huge amavelige higeya mukia veamoya agai agi alisaga humainae.
Nasaleti vayamoya Yisasina amakaveno hutenae.
16 Yisasia Nasaleti maino ala humainea kumate uno Sapati yupa mukia kanale nehia kava huno mono nopi hai faleno Anumaya Koti ke hapaligahe hetimaine. 17 Hetimainegeno Anumaya Kotina aune kanoamo Aisaiya kaemalenea autama aliya amigeno vakayeno hapalino autamafiti kea mage huno hamapaimaine.
18 “Anumayamoa Alu Aotage Avamuamona nagaite hutegeno nagaiene emainegena mukia yamaa omale veamogamina agaia kanale ke hamapaisuafeene kina humainaya veane kalu hematesuafeene amaulaga asu humainaya veane aligali humatesuafeene amakaiami amaugafahe tusia kalagi aiya mai haviya humainaya veane amaugafa aligatisuafeene Anumaya Kotia tokiyaa namiteno hunategena emainoe. 19 Nagaya menia ma kanafina Anumayamoa tamakaife kalagi ailamatesia kanaa ago efalote humaine huna tamahapaisuafe nagaila hunategena emainoe.” huno hamapaiye.
20 Huteno avona alino ailileteno kava kanoa amiteno mopale mainegeya mukia mono nopi mainaya veamoya Yisasi aulagafi aulu heya mainae. 21 Mainageno aepa heno mage huno hie “Menia ma ma kaemalenea kea tamakai tamakesale ago egetama havigeno ago efalote huno tamage hie.” huno hie.
22 Higeya mukia veamoya “Tamage hane.” huya avayafitima hia ke haviteya muse haya kehe amakesa havi havi huya mage hae “Mamona Yosefe nafanefi?” huya hae. 23 Hageno Yisasia amakaife mage huno hie “Tamage, tamakaya ma ma haya kea nagaife mage hugahae ‘Tota kanomoga kagaika kaugafa hagoteka ali hilato hugeta agamano. Kapaneamu kumate ‘Naa maa kava hie.’ hageta havimainona yana male kagaika kumate hugeta agamano.’ hutama hugahae.
24 Tamagelafa huna tamahanepauve nagola Anumaya Koti ke hamanepaiya kanomoa agaia vayaamogami amunopi mainegeya veaamoya ‘Ala kanomo kegi havigetao.’ huya ohugahae. 25-26 Nagaya tamage huna tamahanepauve nayona Ilaiyama mainea kanafina tagufa (3) kafugi sikisia (6) ikanagi huno kola oaigeya ani Isaleli kotega mainaya veamoya tusia amakateno kaveamia omalene. Ani kanafina mukia megusa aneyaga Isaleli kotega mainayanagi Anumaya Kotia agaia aune kanomona, Ilaiyana, ani megusa anele hu oatenegi nago Salefati kumate mainea megusa amote hutegeno umaine. Ani kumala Saitoni kotega hane.
27 Nayona Ilaisama mainea kanafina mukia fugitaya amakemainea veala Isaleli kotega mainayanagi ani veanefitila nagoa veala kanale hu oamatenegi alulega mainea kanoa, Nemanie, Silia mainea kanomona agaiage fugitayama agemainea yana kanale huteneane.” huno hie.
28 Higeya ani kea haviteya mukia mono nopi mainaya vayamoya tusiya huya ke vaiya hamai vaitenae. 29 Hamai vaiteteya hetiya Yisasina atafa huya kumapiti avayu huya avaleya ani kumama kimalenaya agoyale haiteya ani agoyafiti aye lakatiya hagayu hutalegahe humainae. 30 Hayanagi Yisasia mukia veane mainaya amunopiti afaa amataleno ago alu kotega umaine.
Yisasia Kefo Avamula nago kanomo agusafiti anatitalene.
31 Yisasia nagola Kalili hanea kumate Kapaneamu taviteno Sapati yupa Anumaya Koti ke hamapaimaine. 32 Hamapaigeya agai kemoa tokiya yamaa hanea kanomo ke kana hia yafe tusia amamayo aimainae.
33 Anile nago kanoa Kefo Avamumoa aguafi mainea kanoa mono nopi maineno “Avovo.” huno alakenake humaine. 34 Mage huno hie “Avo Yisasiga Nasaleti nafanemoga na ya hulategane? Tagaila tahaeka falilategahe emainano? Nagaya kagaila ago kagemainoe kagaya kanale alu aotage kanoa Anumaya Kotia hugatenea kano mainane.” huno hie.
35 Higeno Yisasia Kefo Avamufe tokiyaage ke huno mage hie “Ke ohuka afaa maiyo. Mani kanoa ataleka agusafinagatila hatilavio.” huno higeno ani Kefo Avamumoa mukia veane mainaya amunopi ani kanomona mopafi ayelakatino agoya fai neateno agusafitila hatilavino vianagi ani kanomona ali haviya hu oatene. 36 Hatilavigeya mukia veamoya tusi amamayo aigeya huge havige huya mage hae “Naane ke hie? Tusi tokiyaaleti tokiyaage ke higeya Kefo Avamuyagamoya agai ke hipoya huya hatilavie.” huya hae. 37 Hageno Yisasima hia kavamo avagemoa mukia ani kumayagalega ute ete higeya mukia veamoya havimainae.
Yisasia Pitana aamona itaamo alekanoa alino kanale hutene.
38-39 Yisasia hetino mono nona ataleno Saimonina nomaafinaga umainegeno Saimonina aamona itaamo alekanoa tusia amukonako kali alino mainegeya Yisasife “Melika kanale huto.” huya havigageno avate uno ani kaliahe ke amakigeno ani kaliamoa ataleno vigeno aupaa ani alekanomoa hetino kavela amine.
Yisasia mukia kali nealiya veala alino kanale humatene.
40 Ani unena yagemoa tavi falegahe higeya mukia ani kumate veamoya vayaamima alu kali alu kali alimainaya veala amavaleya Yisasite ageno mukia nagoke nagokemogamina amaugafale aya maleno kaliamia alino kanale humatene.
41 Alino kanale humatetegeya nagoa veala amakusafiti Kefo Avamumoya amataleya neuya ala kefiti mage huya hae “Kagaya Anumaya Kotina neamoga mainane.” huya hageno Yisasia ke neamamakigeya agaife Anumaya Kotia “Amaugafa aligatigahie huno hutenea kanoa ma maine.” huya havilinayafe Yisasia “Nagoene osi kea ohiho.” huno hamapaimaine.
Yisasia nagoa kumate vaiyemaine.
42 Natena tani ko tigeno Yisasia amataleno veane omai kotega umainegeya mukia veamoya agaifena atiyeya ayeya agaite uvayi huya mage huya hae “Tataleka ouka tagaiene maisane.” huya hae. 43 Hayanagi Yisasia mage huno hamapaiye “Nagaila Anumaya Kotia kava yagaisia kanale kea alu kumate kumate ute ete huna hamapaigahue. Anumaya Kotia ani aliyatefe hunategena emainoe.” huno hie. 44 Yisasia mukia Yutia kumayagalega ute ete huno mono nopi Anumaya Koti kea hamapaimaine.