23
Pailati aulagale Yisasina kaiyeke hutenae.
1 Mukia kanisolefi metalu huya mainaya vayamoya hetiya Yisasina avaleya ala kava kanoa, Pailatite umainae. 2 Avaleya umaineya aepa heya “Ma kava huno kefo kavala humaine. Tagaya agonana mani kanomoa tagai nofi vayafena mage hie ‘Kamani vayamogami kea neataletama havi kava hiho.’ huno nehuno tagaifena ‘Takisi neamamiya yana Sisana oamiho.’ huno nehuno ‘Nagaya nagainia Kalaisina, Sauve kano mainoe.’ huno humaine.” huya hae.
3 Hageno Pailatia Yisasifena mage huno havige “Kagaya Yuta nofi vayamogami Sauveami mainano?” huno havigegeno Yisasia mage hie “Kagaikaa mani kea hai nehane.” huno hie. 4 Higeno Pailatia mono note kava vayafeene mukia alitalu huya mainaya vayafeene mage huno hamapaiye “Kefo kavama hu-mainesiafene huna atiyoana nago yamaa omale.” huno hamapaiye. 5 Higeya tokiyaage kefiti mage huya hae “Mukia Yutia kotega ute ete nehuno veafena mage humaine ‘Kamani vayamogami kea neataletama ma kava hiho.’ huno humaveligeya veamoya ‘Ani kava humategahune.’ huya hae. Kaliliti ani kavala aepa heno hulino hulino menia male nee.” huya hae.
Yisasina Heloti aulagale kaiyekea hutenae.
6 Pailatia ani kea haviteno mage huno hamavige “Ani kanoa Kalili kano maineo?” huno hamavige. 7 Hamavigegeya “E, ani kumateti kanoe.” huya hageno “Heloti kava yagaimainea kotegati kanoe.” huya hageno haviteno hutegeno Helotite umaine. Ani kanafina Helotia Yelusalemu nemaiyane.
8 Helotia Yisasina ageteno tusia muse hie. Avagema haviana “Tokiyaage avameya yana nagoa hinagena agesue.” huno nehuno ayaaya kanale Yisasina agesia agesa havianagi noageane. 9 Yisasina ageteno mukia kehena havige havige hugeteana Yisasia nagola osi ke kanoa ohune.
10 Ke ohuno maigeya mono note kava vayaene kahegi kema havilinaya anagaene anile hetiya maineya tusia ke nehuya “Na kava ma kava huno kefo kavala humaine.” huya hae. 11 Hageno Helotiene ati vayaamoyaene Yisasina huhaviya huteteya kigi huteya kamuge hatageya vaineateya nagola kanale kena aliya me faitetageno Helotia Yisasifena “Pailatite etetama avaletama viho.” huno humatene. 12 Helotiene Pailatiene kame kanolata mainaaleti ani yupa anakaya ali konaga ayemainae.
Pailatia Yisasina “Yafaga yosale hetama asaigeno falino.” huno humaine.
13-14 Pailatia mono note kava vayafeene Yuta vayamogami kava vayafeene vayayagamogamifeene ke higeya melitalu hageno mage huno hamapaiye “Tamakaya ma kanomofena ‘Kefo kava huno veafena ‘Kamani vayamogami kea neataletama havi kava hiho.’ huno hamapai-maine.’ hutama nehutama nagaifena kaiyeke hutesane hutama avaletama ayanagi nagaya tamakai tamaulagafima havigoana ‘Kefo kavama humaine.’ hutama haya kavala tamage huno kefo kavala ohune huna nehue. 15-17 Aguafina agoanagino Helotia ania huno ageana tagaitefe ‘Eteka vuo.’ huno hutegeno eanagi ageho mani kanoa falisia augafa kefo kavala ohuneafe afaa kayo amina aumono maletena atalesugeno visie.” huno hie.
18 Hianagi mukia alitalu humainaya veamoya ailulupeya mage hae “Yisasina haegeno falino. Tagaya Palapasife nofipiti hano hisie huta nehune.” huya hae. 19 Ani Palapasia ala kumate vayayagamofe mage hie “Kava vayaene tu higetao.” huno huteno nago kanoa haegeno falimainea yateti avaleya kina hutenaya kanogiya agaife ani kea hae.
20 Hageno Pailatia “Yisasina atalesugeno afaa visie.” huno agesa havia yafe nagoene ke huno hamavige. 21 Hamavigegeya ala kefiti mage hae “Yafaga yosale nili hetama asaigeno falino. Yafaga yosale nili hetama asaigeno falino.” huya humainae. 22 Hageno Pailatia nagoene eteno mage hie “Naa higetama ani kea nehae? Hanaa kefo ya humaine? Nagaya atiyoana falisia kefo augafa kavala ohuneafe afaa kayo amina aumono maletena atalesugeno visie.” huno hie.
23 Ani kea hianagi amakaya tusi tokiyaage kefiti mage huya hae “Yafaga yosale nili hetama asaigeno falino.” huya tokiyaage kegeya hageno Pailatima hia kemona amakai kemoa hefalaki-maine. 24 Keamona hefalakigeno Pailatia haya ke haviteno Yisasifena “Yafaga yosale nili hetama asaigeno falino.” huno ati vayala hamapaimaine. 25 Palapasia vayafe “Kava vayaene tu higetao.” huteno nago kanoa haegeno falimainea yateti avaleya kina hutenaya kanoa tutu haya yafe Pailatia “Hano hanagi vuo.” huno huteanagi mukia vayamoya Yisasifena “Yafaga yosale nili hetama asaigeno falino.” huya haya kemo akave malene.
Yisasina yafaga yosale nili heya asaimainae.
26 Yisasina avaleya katega neuya Sailini Saimoniene mo fotu humainae. Saimonia hoyafinagati kate enevigeya ati vayamoya motafa huya yafaga yosa aliya ayonale kofiteteya “Yisasi akave kofika vuo.” huya hutenae. 27 Mukia veamoya akave nevageno anemoya avi neateya hamau hume hume akave umainae. 28 Nevageno Yisasia maiyahae huno amaketeno mage hie “Yelusalemu mainaya anemogatama nagaifene hutama avia oateho. Avima ategahena tamakaitamihe neatetama nafaneyagatamimofeene avia atemateho. 29 Haviho haenagaa nago kana falote hisigeya mage huya hugahae ‘Namo anemogatama nafane oatetama numa noamisaya yafena tusia muse hutama maiho.’ huya hugahae. 30 Ani kanafina aepa heya ala agoyamofena mage huya hugahae ‘Kolilavika aiso hulato.’ huya hugahae. Osi agoyahena ‘Mehi alika aiso hulato.’ huya hugahae. 31 Nagaya haegafa ata kana huna mainoa kanoe. Kefo yana tamage huna ohunoa kano mainogeya mani kavala hunenatayanagi tamakaya avaifa ata kana hutama kefo kava nehaya veane mainayafe na kava hulamategahae?” huno humaine.
32 Yisasina haegahe avaleya neuya tolea kefo yama humainaa kanolataene hanaegahe anavaleya umainae. 33 Anu ayamufae huya nehaya kumate avaleya uteya yafaga yosale nili haeya asaimainae. Tole kefo yama humainaa kanolatane nago kanoa Yisasina tamaga kaiyagaa haeya asaimaleya nago kanoa haoga kaiyagaa haeya asaimaleya humainae.
34 Yisasia Anumayamotega ke huno mage huno hie “Nenafagae mani vayamoya kefo yama haya kavala ‘Naa kava nehune.’ huya havilama ohaya yafe aigeamateka kefo yaamia atalemato.” huno humaine. Higeya ati vayamoya kenaa aligahe musufayama nehaya yokalo lageno amakaseno haiya kanomo alimaine.
35 Aligeya veala alitalu huya hetiya aulu heya mainageya kava vayamoya kamuge hatageya vaineateya mage hae “Nagoa veala amaugafa aligatimainea kanogi Anumaya Kotima hau ayamopafi nehaiya kanoa taugafa aligatigahie huno hutenea kanoma mainesiana agaia augafa aligatino.” huya hae.
36-38 Anutema kaeya malaya avomoa mage huno hie “Mani kanoa Yuta veate ala Sauve kanoe.” huya kaeya malenae. Malenageya ati vayamoya ania huya kamuge hatageya vaineateya atuage nofi alagafiti tina neamiya mage hae “Kagaya Yuta vayate sauve kanoamima mainesanana kagaikaa kaugafa aligatio.” huya hae.
Kefo yama humainea kanomoa Yisasina aipa amine.
39 Nagola kefo yama humainea kanoa yafaga yosale nili heya asaimalaya kanomoa Yisasifena hu-haviya huteno mage huno hie “Anumaya Kotima taugafa aligatigane huno hugatenesia kanoma mainenuka kagaikaene taagaiene yosaleti ali hakao hugeta tavimano.” huno hie. 40 Higeno nagola kefo yama higeya yafaga yosale nili heya asaimalaya kanomoa ani kea haviteno kemakino mage huno hie “Vae kagaya Anumaya Kotifena kolia nohuka ani kea nehano? Kefo yama humainoa anonaa nagopi taagaila nilia laahaeya asailaa-tenayanagitaa faligahue. 41 Taagaya kefo yatiamo anonaa fatago kava hayanagi ma kanoa nagola osi kefo yamaa omalene.” huno hie. 42 Nehuno ani kanomoa Yisasifena mage huno hie “Yisasiga kava yagaigahema esana kanafina nagaifena kagesa havi namio.” huno hie. 43 Higeno Yisasia kenonaa mage huno hie “Tamagelafa huna kahanepauve meni kanoa nagaiene kanale maige maige hisaya kumatela tokaetaa umaigahue.” huno hapaiye.
Yisasia falimaine.
44 Anile yagemoa euno amunokano higeno halemainea yamoa hano higeno mukia kotega tusia hanikino viayamo une kanalega eteno ali halemaine. 45 Ani hanimo aguafinaga ala mono nopima asaimalenaya kenagefamoa amunopiti aipa hulole humaine.
46 Aipa hulole higeno Yisasia ala kefiti mage huno hie “Nenafagae nagu nafanea kagai kayapi nemaloe” huno nehuno haimula atalegeno vigeno falimaine. 47 Faligeno ati vayate kava kanomoa anile maineleti mukia yama hia kavala ageteno Anumaya Koti agi alisaga nehuno mage huno hie “Tamage mani kanoa kefo yana nohia kanoe.” huno humaine.
48 “Na kava hutesafi agetetae.” huya melitalu humainaya veamoya mukia humainea kavala ageteya tusia hamau huneateya havi kafa yogime yogime noamilega ataleya umainae. 49 Vayanagi mukia veamoyaene Kaliliti akave emainaya aneyagaene aluale hetiya maineya hutaya kavala agemainae.
Yisasina yafa kapi hevaitenae.
50-51 Nagola fatago kanoa Yosefee, Yuta vayamogami Kanisolefi maineanagi “Yisasina haegahune.” huya haya kehena “E, kanalele.” huno ohunea kanoa Yuta veamogami kotega Alimatiyae huya nehaya kumate nemaiya kanogino Anumaya Kotima kava yagaisia kanahe muse huno agava nemaiya kanoe.
52 Ani kanomoa Pailatite viayamo mage huno havige “Yisasina augafaa aligahe nehue.” huno havige. 53 Havigegeno Pailatia “E” higeno yafaga yosaleti haino ali hakao hulino elavino memaleneno kenaleti augafalela aigalaki kalaki huno haya kiteno alino viayamo he falageya kafimalenaya yafa kane, anifina vayala hevai oamatenaya yafakapima alino mo hevaitene. 54 Ani yupa Sapatihe haviya talo tala hisaya kanagino Sapatia ago evayi hugahe higeno Yosefea ani kavala humaine.
55 Higeya Kaliliti Yisasiene tokaeya emainaya aneyaga Yosefe akave uya yafakapima hevaitea yana mogemainae. 56 Mogeteya ayaamoya augafalema faletesaya yana manaage tiene masaveene talo tala nehageno Sapati kanamoa evayi higeya kahegi kemo akave maleya maifalu huya mainae.