22
A alisia yupa kave talo hisia yate avame kea hu-maine.
1-2 Yisasia nagoene mukia vayafe avame kea mage huno hie Anumaya Koti kava yagai-mainea kumate maa hu-maine nagola sauve kanomoa agaia nafanemoa a aligahe higeno nefaa ala kave talo tala hugahe hie. 3 Agaia aliya vayala hu-ma-tegahe mage huno hie “Kema hu-ma-tenoa vayatega utama hama-paisageya ani imuma ki-maloa kavela me nesae.” huno hu-ma-tegeya uya mo hama-paiyana ani vayamoya imulena omesaya ke hae. 4 Hageno eteno nagoene alu aliya vayaa hu-ma-teno mage huno “Tamakaya utama kema hu-ma-toa veafe mage hutama hama-paiho Tamakaya haviho nagaya ve pulamakaene tali ovai afuniene ago hena mukia yana ago talo tala hu-malenogi tamakaya a alisia imule eho.” huno hie. 5-6 Higeya ani aliya vayala uya mani kea mo hama-paiyanagi ani veamoya ohavisaya ke huya ataleya vageya nagoa veala hoyaamilega vageya nagoa veala mone aliyaamile vageya nagoa vayamoya ani aliya vayala amatafa huya hamayageya fali-mainae. 7 Naa hageno sauve kanomo aipamoa haviya higeno agaia ati vayaa hu-ma-tegeya uya mo hamaeya hano hu-taleteya no kumaamia kaeya hano hu-talenae. 8 Hu-talageno ala sauve kanomoa aliya vayaahena mage huno hama-paiye “A alisia imua ago kina talo tala hu-malogi ‘Eho.’ hunama hu-ma-toa veala amakaiamia kanale huya omesaya avamete hu-mainae. 9 Naa hu-mainagi tamakaya kamo avayalema momakesaya veafena ‘A alisia imule eho.’ hutama hiho.” huno hie. 10 Higeya aliya vayamoya anima katega momakaya veala haviya hu-mainaya veanene kanale veanene amavaleya melitalu hageno mukia sauve kanomo nafanemoma ama alisia imulela ani nopina me hiya hae.
11 Hageno sauve kanomoa amakegahe ani nopi haino mogeana nago kanomoa ama alisia kanalema fai-nealiya augafa kena fai-oalinegeno moge-maine. 12 Mogeteno ani kenama fai-oalinea kanohena mage hie “Nenafugae naa higeka a alisia kanalema nefaiya kena ofaika ma nopina emainane?” huno havigegeno ani kanomoa kea ohuno maine. 13 Afaa maigeno sauve kanomoa agaia aliya vayafe mage huno hama-paiye “Aiya ayate nofi kitetama asaga hutama haniyapinaga malaga hagayu hu-talegeno avi-neateno avekemo nehinageno agaia augafahe kalagi aino.” huno hie.
14 Anumaya Kotia kasagoya veafe kea hianagi mukia veala omageya nagoke nagoke huyo-gi-malenea veaneage ehai-nefalae.
Sisana takisi monea amisao ifi oamigahae?
15 Falasia vayamoya neuya “Hanaa huta Yisasima hisia keletila atafa hisune?” huya hu-mainae. 16 Huteya keamima nehaviya vayaene Heloti vayaene Yisasite hu-ma-tageya ani vayamoya mage huya mo hae “Humave-nelina kanomogae tagaya havunana kagaya tamageage kano mainane. Kava vayaene afa vayaenefena kagesa ohavika nagoke kate tamagegeya nehuka Anumaya Koti kea hama-nepainane. 17 Nagi takisi he yatela kava kanoa Sisana kanale amigahuno ifi oamisune? Na kagesa nehavipi? Taha-paiyo.” huya hae. 18 Hageno Yisasia havi kavama hisaya amaku amakesa ago amaketeno “Vagala vaya mainagi amegati afa ke nehae. Naa higetama nagaila aye-navataga hutama natafa hisaya yafena nahavi-negae? 19 Nagola takisima nehaya alaga monea alitama naveliho.” huno higeya aliya ave-li-mainae. 20 Aveligeno mage huno hie “Mani alaga monelela ta augosaene ta agiene hane?” huno hie. 21 Higeya “Sisa augosaene agiene hane.” huya hae. Hageno Yisasia mage hie “Sisana agaia yanagi agaila amiho. Nagi Anumaya Kotina agaia yana agaila amiho.” huno hie. 22 Higeya anima kesi katema vaiyaya vayamoya anima hia kehena amamayo aigeya ataleya umainae.
Satiusi vayamoya fali-mainesafiti hetisaya yafe Yisasina havige-mainae.
23 Ani kanafina nagoa Satiusi vayamoya Yisasitega emainae. Ani Satiusi vayamoya mage nehaya vayale “Fali-mainaya vayala eteya he-otigahae.” huya nehaya vayale. 24 Vayalegiya Yisasina mage huya me havigae “Humave-nelina kanomogae Mosesea mage huno hu-maineane ‘Nago kanomoa nafanema oate kanomoa aama ataleno falisigenoa aganaamoa ani aala ali-tesigeno fali-mainea kanomofe huno anonaa nafanea atesie.’ huno kae-maleneane. 25 Sevenia (7) koganamoya tagaipina mainayanagino nepuamimoa aala ali-teneanagino nafanea oate kano maineno faligeno anile aganaamoa aamona ali-tene. 26 Ali-teanagi nafanea oate kano maineno faligeno anile aganaamoa eteno ali-tene. Ania hute hute hayanagi mukia sevenia (7) konagamoya ani aala ali-tayanagi nafaneamia oateya afaa fali-mainae. 27 Faltageno haenagalafa ani aala fali-maine. 28 Sevenia (7) konagamoya ani aala ali-tenayanagiya fali-mainesafitima hetisaya kanafina hana kanomo ani aala alikahie?” huya havigae.
29 Havigageno Yisasia mage huno hama-paiye Anumaya Koti kema kae-malenaya kene tokiya yamaaenefena havilama hutama ohaviya yafe tamakaya havi lamakesageya nehaviye. 30 Veamoya fali-mainesafitima hetisaya kanafina nago vemoa anea oaligahianagi amoa venena oaligahie. Ensole vaya kana huya maigahae. 31 Fali-mainaya veama he-ti-saya kea Anumaya Kotia tamakaifema hu-mainea kea avopina mage huno hu-mainea kea hapalitama ohavinao? 32 Mage huno hu-maine
“Nagaya Anumaya Kotina Apalahamunagi Aisakinagi Yekopugami Anumaya Kotiami mainoe.” huno hu-maineane.
Ani anagala fali-mainayanagi “Anumaya Kotiamimona mainoe.” huno hu-maineafe amaku amamemoa ofalinegi afaa mainae huno mani kea hu-maine. 33 Higeya melitalu hu-mainaya veamoya haviteya anima hia kehena amamayo ai-mainae.
Anumaya Kotina hagoteno tokiyaage kahegi keae.
34 Yisasima hia kehena Satiusi vayamoya kea ohuya maiya yafe Falasia vayamoya haviteya Yisasite melitalu huya mainae. 35 Maiya vayamogami amunopina nagola kahegi kema havilinea kanomoa Yisasina aye-vataga hugahe mage huno havige. 36 “Hu-lave-nelina kanomogae hana kahegi kemo mukia kahegi kemona amakaseno uhagoteno tokiyaage kea hane?” huno havige. 37 Havigegeno Yisasia mage hie “Anumaya Kotia alakamofena tusiya huno kahaino. Kaguafinagatiene kagu kametetiene kahaino. Aliyama nealina himamukaene kagesama nehavina yaenena ami hano huka amio. 38 Mani kemoa uhagoteno amakase-mainea ke hane. 39 Anilema molia kemoa ani kemoma hia avamete hu-mainea kemoa mage huno hu-maine ‘Kagaikaa kaugafahema kahaisia avamete mukia veamogami amaugafahena kahaino.’ huno hu-maine. 40 Mukia Anumaya Koti amaune vayamogami kene Mosese kemoenena ani tole kefi aepaa hane.” huno hie.
Yisasia Anumaya Kotima hu-tenea kanohe Falasia vayafe hama-vi-ge.
41-42 Falasia vayala melitalu hageno Yisasia mage huno hama-vige “Kalaisifena naane tamakesa nehaviye? Ta nafane maine?” huno higeya “Teviti nafane maine.” huya hae. 43 Hageno “Naa higeno Tevitia Avamumo hapaiya ke huno Kalaisifena ‘Anumayanimogae.’ hunoma hu-maineana ani kemo aepaahena naane hutama nehae? Tevitia mage huno hu-maineane
44 Anumaya Kotia Anumayanimofena mage huno hie ‘Tamaga nayatega, ala vaya mainalega hanea siale emainesanagena kame vayakaa kaiyafinaga ama-tesugeya kagaifena ‘Ago tagasane.’ huya hugahae.’ huno kae-maleneane.
45 Tevitia Kalaisifena ‘Anumayania mainane.’ huno hu-maineanagi naa higeno Tevitia haenagama atesia aginagomofena ‘Anumayania mainane.’ huno hu-maineane?” huno hama-vi-ge. 46 Hama-vi-geanagi nago kanomoa kenonaa nago kea ohunegi ani kanaleti aepa heya kolia huya nago yafena haviokenae.