1-2 Nago yupa kasagoya veamoya alitalu huya maiyana nesaya yana omalegeno Yisasia agaiaenema tokaeya nemaiya anagafe ke higeya ageno mage hie “Mani veala tagufa (3) yupa nagaiene mainageno nesaya kaveamia omalea yafe nahau huneamatoe. 3 Nagoa veala ayaaya kotegati emainagi havigu amatalesugeya katega nevisageno amakatesigeya amaugetunatu huya takatiyafena nonahaiye.” huno hamapaiye. 4 Yisasienema tokaeya nemaiya anagamoya mage huya hapaiye “Mauna kola vaya omai kolagi hanateti maya alita ani veanea amamisune?” huya havigae. 5 Hageno Yisasia mage huno hamavige “Tamakaya namagia maya hane?” huno higeya mage hae “Tagaipina sevenia (7) mayaage hane.” huya hapaiye.

6 Hageno Yisasia muki veafena “Mopale maiho.” huno higeya mopale mainageno Yisasia ani sevenia (7) maya alino Anumayamotega muse huno havigeteno aposite aposite huteno agaiaenema tokaeya nemaiya anagala amamigeya mukia veapina vaya kaimainae. 7 Nagoke okasi noyame kanoa hanegeno Yisasia Anumayamotega ani noyamehe muse huteno “Amamite amamite hiho.” huno higeya vaya kaimainae. 8 Kaigeya mukia veanea nageno amamu higeya atalaya maya atupayaga Yisasienema tokaeya nemaiya anagamoya alitalu huteya sevenia (7) kupi aihavatemainae. 9 Ani kavema naya venenea fo tausenia (4,000) vayamoya nemainae. Netageno Yisasia humategeya umainae. 10 Utageno Yisasia agaiaenema tokaeya nemaiya anagaene tipi kalefi haisaga humaiya Talamanuta kumatega umainae.

11 Falasia vayamoya Yisasite eya agaiene ke vaiya ayevataga hisaya yafe mage huya hae “Kagaya ikapinagati tokiyaage avame yana hugeta agamano.” huya hae. 12 Hageno Yisasia aipa havino kanaage huteno mage huno hie “Naa higetama meni kanafima mainaya veamogatama tokiyaage avame yafena nahavinegae? Tamage tamahapaisua kea haviho meni kanafima mainaya veamogatamina tokiyaage avame yana tamaveotigahue.” huno hie. 13 Huteno neamataleno tipi kalefi haisaga humaino atu faliga ugahe umaine.

14 Yisasienema tokaeya nemaiya anagamoya tima lakaeya vayana amakekaniya nagoke maya kanoa aliya umainae. 15 Aliya vayanagino Yisasia mage huno hamapaiye “Tamakaya Falasia vayaene Helotiene amakupima hanea yana agelama ohuneya amavayaleti havigema nehaya yamoa kaihamemo halenegia avamete huno halegino alakefa hisia yafena kaye ho.” huno hie. 16 Higeya ani vayamoya amakaiamia huge havige nehuya mage hae “Tagaya maya oalita emainona yafe nehie.” huya amakaiamia hae. 17 Hageno Yisasia ani vayamoya haya kea ago haviteno mage hie “Naa higetama ‘Kavetia alita omenone.’ hutama tamakaitamia huge havige nehae. Tamakesa havilama hutama ohavinao? Tamakuamoa tilemainegetama nohavio? 18-19 Tamaulaga haneanagi agelama nohao? Tamakesa haneanagi havilama nohao? Faefua (5) maya alina apositena faefu tausenia (5,000) veyagama amaminoa yafena tamakekanitama mainao? Namagi kupi atupatapa aimalageno havatemaine?” huno hamavigegeya “Tuelufua (12) kule.” huya hapaiye. 20 Hageno mage huno hie “Sevenia (7) maya alina apositena fo tausenia (4,000) vaya amamugeya neteya namagi kupi atupatapa aigeno havatemaine?” huno hamavigegeya “Sevenia (7) kule” huya hapaiye.” 21 Hageno mage huno hie “Naa higetama nohaviye?” huno hamavige.

22 Petesaita kumate uvayi hageya veamoya nagola aulaga asu humainea kanoa avaleya Yisasite neeya mage huya hae “Musekaa nehunagi augafale avate huo.” huya hae. 23 Hageno Yisasia aulagama asu humai kanoa ayate alino kumala ataleno avaleno malaga viaamo aulagafi avetuna heteno aya nemaleno mage huno havige “Nago yana neagano?” huno havige. 24 Higeno agesaga huno ageana higeno mage huno hie “Veala neagogeya yosa kana huya vaiyatete nehae.” huno hie. 25 Higeno Yisasia nagoene ania huno ayana aulagale malegeno aulagamoa kanale higeno agemaine. Aulaga age haleno muki yana kanaleya huno agemaine. 26 Agegeno Yisasia mage huno hie “Ma kumatela ouka eteka nokalega vuo.” huno hie.

27 Yisasia agaiaenema tokaeya nemaiya anagaene Sisalia Filipai kotega hanea kumate ugahe katega neuno mage huno hamavige “Veamoya nagaifena tae huya nehae?” huno hamavige. 28 Hamavigegeya kenonaa mage huya hae “Nagoa veamoya kagaifena ‘Tima fale neamatea Yonie.’ huya hageya nagoa veamoya ‘Ilaiya maine.’ huya hageya nagoa veamoya ‘Anumaya Kotina aune kanoa maine.’ huya nehae.” huya hapaiye. 29 Hapaigeno Yisasia mage huno hamavige “Tamakaya nagaifena tae hutama nehae?” huno hamavigegeno Pitaa kenonaa mage huno hie “Kagaya Kalaisigae Anumaya Kotia taugafa aligatigane huno hugatenea kano mainane.” huno hie. 30 Higeno Yisasia amaumono maleno mage huno hie “Mani kea nagoa veala hamaopaiho.” huno humaine.

31 Ani yupa Yisasia agaiaenema tokaeya nemaiya anagafena haenagama falote hisia yafe aepa heno hamapaino mage huno hie “Nagaya ikapinagati emainoa kanoa vayamo natenea kanomona tusiya huna nagata yana alisugeno Yuta vayatamaene mono note kava vayaene kahegi kema havilinaya anagaene amakaveno hunateya nahaesagena falisugeya komufi hevainatesageno naugafamoa tole yupa maitenagena tagufa kanale falimainesufitila etena hetigahue.” huno hamapaiye. 32 Hufalote huno hamapaigeno Pitaa Yisasina faitega avaleno mage huno mo hapaiye “Kagaya ani kea ohuo.” huno hie. 33 Higeno Yisasia maiyahae huno nagoa agaiaenema tokaeya nemaiya anagala amaketeno Pitafe keamakino mage huno hie “Sataniga mai halenato kagaya Anumaya Koti havimainea aguagesa kanaleya huka nohavinagi vayamoya kahapaiya amaku amakesa nehavine.” huno hie.

34 Huteno kasagoya alitalu haya veanene agaiaenema tokaeya nemaiya anagafeene ke higeya ageno mage huno hamapaiye “Nagoa veamoya nakave visaya amakesa havinuyahena amaugafama aliya hai yana amakaveno huteteya nagaima nagata aisigenama falisua avamete amakesa haviteya yafaga yosa kofiya nakave visae. 35 Nagoa veamoya hamaimuma hanesigeya mai yaamima atafa hutalako hisagenoa ani yamoa fanane hugahianagi nagoa veamoya nagaife huya nagai kanale mono kema hamapaisaya yafema mai yaamiene hamaimuamiene atalesagenoa ani mai yaami aligatisigeya agola maigahae. 36 Nago kanomoa mukia ma mopafi afeno yama alisia yafe faliteno agola maige maige hisia haimua atalesiana alimainea mone afeno yamoa hanaa huno hamaegahie? Aao haomaegahie 37 Falitesigenofena agola maige maige hisia haimula eteno alisia yafe mukia ma mopafi mone fenoyana afaa atalegahianagi aya ohugahie. 38 Nagoa veamoya meni kanafina kefo yama nehaya veanene, Anumaya Koti kema ataleteya alu kate nevaya veanene, maineya nagai kene nagainienefema huya ‘Aoteyamaae.’ hunatesagena nagaya ikapinagati emainoa kanoa vayamo natenea kanomona esua yupa Nenafana tokiya hale yamaaene alu aotage ensole anagamoyaene etena esuana ania huna ani veanehena nagaye huna ‘Tamahaoteyatamie.’ huna humategahue.” huno humaine.