12
Havi vayamoya vaini hoyalema yagaimainaya vayate avame kea humaine.
1 Yisasia aepa heno avame kea mage huno hamapaiye nago kanomoa vaini nofi alaga hoya humaleteno kegiya hugove humaleneno ani alagayagamo timaa ayelatisigeno timaamoa tavino umaisia komua kafiteno yagaiyama maisaya nona anafi kimaleteno alu vayafe ke huno “Etama hoyanile me yagaitama maineho. Ani nofimo alagafitila aye fako hutama nagoa aliho.” huno humateteno alu kotega umaine. 2 Umaineno fuma nelea kanafina ani hoyamona nefaa nagola aliya kanoa hutegeno ani vaini hoyalema neyagaiya vayatega alaga aligahe umaine. 3 Vigeya hoyalema neyagaiya vayamoya ani aliya kanoamona atafa huya kayo amiteya mage hae “Okamigahunagi kagaya eteka vuo.” huya hageno eteno umaine. 4 Eteno vigeno hoyamona nefaa alu aliya kanoa hutegeno viana ania huya atafa huya anu aliteya tusia agaye hisifa kava hutenae. 5 Hutageno vigeno eteno alu aliya kanoa hutegeno ani hoyafi viana atafa huya hayageno falimaine. Falitegeno hoyamona nefaa kasagoya aliya vayayaga humategeya vageya nagoa aliya vayala amatafa huya nehamaeya nagoa kuyafa neamataleya nagoa tefa hamae falimainae. 6 Mukia vageno hau ayamopafima nehaiya nafanea agaiage maigeno nefaa mage huno hie “Nafanenimo kea havigahae.” huteno hutegeno haenagalafa ani hoyalega umaine. 7 Vigeya ani hoyafima yagaimainaya vayamoya mage huya hae “Mamona mani hoyamona nefa nafane. Nefama falisigenofena mani nafanemoa hoyaa aligahianagita ago haegetao. Haesunageno falisigeta mani hoya tagai ya hapaegahie.” huya hae. 8 Huteya atafa huya hayageno faligeya augafaa aliya hoyafinagati ai halatu huya malaga hagayu hutalenae.” huno hie.
9 Huteno Yisasia mage huno hamavige “Naa hayanagino hoyamona nefaa hanaa humategahie? Eno hoyaafima yagaimainaya vayala tavata me hamaesigeya faligahae. Fali hano hisageno alu vayafe “Tamakaya hoyalela kava me yagaiho.” huno humategahie.” huno hie.
10 Nagoene Yisasia mage huno hie “Manima Anumaya Koti avopima hanea kea ago hapalitama havimainao? Mage huno humaineane
‘Vayamoya yafa noma kiyana nago yafafena ‘Haviya humaine.’ huya atalayanagi ani yafamoa haenagaa ‘Tusia kanale yafanagino amakaseno haimainea yafane.’ huya nomo ayetagenale malenae. 11 Anumayamoa ania humaineanagita neageta tusia kanale ya hane huta nehune.’ huya kaemalenayane.” huno hie.
12 Yisasia mani kea higeya mono note kava vayamoya “Mani avame kema hiana tagaife nehie.” huya amakesa haviteya mage hae “Avaleta kina nopi ategahune.” huya hayanagi alitalu humainaya veafe koli huteya Yisasina ataleya umainae.
Sisana takisi monea amisao ifi oamigahae?
13 Nagoa Falasia vayaene nagoa Heloti vayaene humatageya Yisasima havigaya keleti ayevataga huya atafa huya haegahe Yisasi mainelega umainae. 14 Umaineya mage huya havigae “Humavenelina kanomogae tagaya ago havunana kagaya tamageage kano mainane. Amakima hanea vayaene amakima omale vayaenefena nagoke katekeya havi neamamika kelamage nehuka Anumaya Koti kea tahanepainane. Takisi monema ataleyatela Sisaa kava kanomotega kanale atalesuno ifi oatalesune? huya havigae.
15 Hageno Yisasia amakupinagama haviya kea ago haviteno “Vagala vaya mainetama amegati ke nehae. Naa higetama nagaila ayenavataga hutama natafa hisaya yafena nahavinegae? Nagola alaga monea alitama me namigena agano.” huno hie. 16 Higeya nagola alaga monea aliya memigeno ageteno mage huno hamavige “Mani alaga monelela ta augosaene ta agiene hane?” huno hamavigegeya “Sisa augosaene agiene hane.” huya hae. 17 Hageno Yisasia mage hie “Sisana agaia yana agaila amiho. Nagi Anumaya Kotina agaia yana agaila amiho.” huno higeya ani kehena amamayo aimaine.
Satiusi vayamoya falimainesafiti hetisaya yafe Yisasina havigemainae.
18 Nagoa Satiusi vayamoya Yisasitega emainae. Ani vayamoya mage nehaya vayale “Falimainaya vayala eteya heotigahae.” huya nehaya vayale. 19 Vayalegiya Yisasina me havigeya mage huya hae “Humavenelina kanomogae Mosesea tagaifena mage huno kaemaleneane ‘Nago kanomona nepuamoa nafanea oate kanoa aama ataleno falinagenoa aganaamoa ani aala aliteneno agoma falimainea kanomofe anonaa nafane atesie.’ huno kaemaleneane. 20 Nago kanafina sevenia (7) konaga mainayanagino nepuamimoa aala aliteneanagino nafanea oate kano maineno falimaine. 21 Falitegeno anile aganaamoa ani aala aliteana nafanea ania huno oatenea kano falitegeno anile aganaamoa ania humaine. 22 Mukia sevenia (7) konagamoya aliteme aliteme ayana nafanea oateya fali hano hageno haenagalafa ani aala falimaine. 23 Sevenia (7) konagamoya ani aala alitenayanagi falimainesafitima hetisaya kanafina hana kanomo ani aala aligahie?” huya havigae.
24 Havigageno Yisasia mage huno hamapaiye “Anumaya Koti kefima kaemalenea kene tokiya yamaaenefena havilama hutama ohaviya yafe tamakaya havi tamakesageya nehaviye. 25 Veama falimainesafiti hetisaya kanafina ensole vaya kana huya vemoya aala oaligahae. Amoyaenena vea oaligahae.
26 Falimainaya veama eteya hetisaya yafe nahavinegao? Mosese kaemalenea avopima ohapalinao? Nagola osi yosalema ala ata anefela leanagi ani osi yosa otene.” huno kaemalenea kea ohavinao?
Anumaya Kotia ani kanafina Mosesefena mage huno humaineane “Nagaya Apalahamunagi Aisakinagi Yekopugami Anumaya mainoe.” huno humaineane.
27 Ani anagala falimainayanagi “Nagaya Anumaya Kotiamimona mainoe.” huno humainea yafena amaku amamemoa ofalinegi afaa mainaya yafe ani kea humaine. Tamakaya veamoya heotigahae hutama nehaya kea havige nehae.” huno hamapaimaine.
Anumaya Kotina hagoteno tokiyaage kahegi keae.
28 Nago kanoa kahegi kema havilinea kanomoa anile eno huge havige haya kea haviana Yisasia kanale kema huhaleno hamapaiya kea me haviteno Yisasifena mage huno havige “Anumaya Koti kahegi kefitila hana kemo mukia kemona agaseno uhagoteno tokiyaage kea hane?” huno havige. 29-30 Havige-geno Yisasia mage huno hie “Uhagoteno tokiyaagema humainea kemoa mage huno humaine
‘Isaleli vayala haviho Anumayamoa tagaiti Anumaya Kotia agaiage mainegi nagoa Anumaya omaine. Kagaya Anumaya Kotikamofena kahau kayamopafina tokiyaage huno kahaino. Mukia kagesama havisana yaene kagu kamema havisana yaene aliya nealina kayamufaene tokiyaage huka Anumaya Kotina amio.’
31 Anile nago kea mage huno humaineane
‘Mukia vayafena tusiya huno kahau kayamopafi kahaino. Kagaika kaugafahema kahaisia avamete ania huno alu veamogami amaugafahena kahaino.’
Menima tole kema kahapauva kemoa mukia Anumaya Koti kahegi kemona ago amakasemainea ke hane.” huno hie.
32 Higeno ani kahegi kema havilinea kanomoa Yisasifena mage huno hie “Humavenelina kanomogae tamage nehane. Nagoke Anumaya Koti mainegi nagoa Anumaya Koti omaiye. 33 Omaigi tagaya mukia tahau tayamopafi tokiyaage huno tahaisigeta mukia tagesama havisuna yaene tagu tamema havisuna yaene aliya nealuna tayamufaene tokiyaage huta mukia Anumaya Kotina amisune. Amiteta mukia veafena tahau tayamopafi tahainageno tagaiti laugafahema tahaisia avamete ania huta alu veamogami amaugafahena tahaisie. Naama hisuna yamoa mukia alu kavala amakasemaine. Nayona veamoya ‘Anumaya Kotina muse yana neamune.’ huya nagola sipi sipi heya neamiya nago sipi sipia atafi kae salamana aineataleya nehaya yamona menima kahapauva kemoa ani kavala ago agasemaine.” huno hie.
34 Yisasia anima huhalenoma hia kea haviteno “Haviyamaaene kano maineafenagino nahapaiye.” huno agesafinaga haviteno kenonaa mage huno hie “Ani kema hana kemoga aupaa Anumaya Kotife ‘Kava yagainato.’ huka hugane.” huno hie. Higeya vayayagamoya haviteya koli huya Yisasina nagoene haviokenae.
Yisasia Anumaya Kotima hutenea kanohe veamogami hamavige.
35 Yisasia ala mono nopi mo humavenelino mage huno hamavige “Kahegi kema havilinaya anagamoya naa higeya Kalaisifena, ‘Anumaya Kotia hutenea kanomofena Tevitina aginagomoa mopale kano maine?’ huya nehae.” huno hamavige. 36 Hamavinegeno mage hie “Tevitia Anumaya Kotina Alu Aotage Avamumo hapaiya kea mage huno humaineane
‘Anumaya Kotia Anumaya-niamofena mage huno humaine ‘Tamaga nayatega, ala vaya mainalega hanea siale emainesanagena kame vayakaa kaiyafinaga amatesugeya kagaife ‘Ago tagasane.’ huya hugahae.’ huno kaemaleneane.
37 Tevitia Kalaisife ‘Anumayania mainane.’ huno humainegi naa higeno Tevitia haenagama atesia aginagomofena ‘Anumayaniamoga mainane.’ huno humaineane?” huno hamavige. Higeya mukia alitalu humainaya veamoya Yisasi kea haviteya tusia muse hae.
Kahegi kema havilinaya anagamoya kefo yaene nehaya vayale.
38 Yisasia hamapaiya kefiti mage huno hamapaiye “Kahegi kema havilinaya anagafena kayeho. Ani vayamoya ayaaya kena failiya yafena ‘Nelagafi notagafi?’ huyama haya yafena tusiya huno nehamaiye. Vaya atagu nefaya kumapi mo vaiyatete nehuya ‘Naa vaya mainae.’ huya ‘Ali falu fala hulatesae.’ huya nehae. 39 Mono nopiene imuleene ‘Ala vayaagema nemaiya sialekeya maigahune.’ huya nehae. 40 Ani vayamoya keto aneyagahena ‘Mono nopima atalesaya monea tamiho.’ huya nehuya noamifima hanea yayaga musufaya huya moneamia ali hano nehaya vayalagiya. Vayayaga ayemavataga huya ‘Kanale vaya mainae.’ huya hisae huya ayaaya nunamu nehayane. Aniama nehaya vayamoya havi miyana tusiya huno amaugafa amagata aisia yaene aligahae.” huno hie.
Monea omale amoa Anumaya Kotitega muse yamaa atalene.
41 Yisasia mono nopi mone neatalaya kaiyaga maineno monema atalaya veala amakeana moneamima hanea veamoya “Monetia Anumaya Kotina amigahune.” huya ala mone pokisifina atalenae. 42 Atalageno nagola monea omale keto amoa tole osi haesa monea metalene. Ani haesa yafatalamogania tokayaagenoa vani toya kana humaine. 43 Yisasia ani yana ageteno agaiaenema tokaeya nemaiya anagafe ke higeya ageno mage huno hamapaiye “Nagaya tamagelafa huna tamahanepauve ma ma monea omale keto amoa hagoteyama metalaya veamogamina amakaseno ala mone metale. 44 Metaleneanagi moneamima hanea veamoya aliyamaa omalenea monegiya havigu malenaya monegiya afaa metalayanagi ani amoa mukia yamaa ali hano huno metale. Mukia kaveama alino nesia monea mukia alino metale.” huno hie.