14
Kava vayamoya Yisasina haesaya ke hu haya kimainae.
1 Ani kanafina tole yupa maiteya kafuahe kafuahe Anumaya Kotima amakinagomo amaugafama aligatimainea yafe alitalu huya hale oki kaihamena nenaya imu kigahe nehageya mono note kava vayamoyaene kahegi kema havilinaya anagaene Yisasina haesaya kea kesi ako huya atafa hisaya yafe ke huge havige humainae. 2 Mage huya hae “Mukia veala imulema alitalu huya maisafima Yisasina atafama hisunageya mukia veamoya ageteya ke huya atile male huya tu hugahae.” huya hae.
Nago amoa Yisasina anupi masave takino faletene.
3 Yisasia Petani umaineno nayona fugitaya agemainea kanomo agia Saimonie kanomo nopi umaine. Mopale umaineno kave nenegeno nago amoa anile eno manaage masavena havatemai yafa keayola alilino emaine. Ani keayopina nagola tusia monele hanea masavena manaage tina hane. Ani limo agia natie. Ani keayoma taloma hia yafamo agia alapasata yafane. Ani amoa masave keayola alino aitagino Yisasi anupi takino faletene. 4 Faletegeya nagoa anile mainaya vayamoya ageteya ke vaiya mohu mehu nehuya mage huya hae “Naa higeno mani amoa manaage masavena afaa neatale? 5 Nago kanomoma miya hileasina tali hataleti kina (K300) aluteasine. Aliteta ani masavete monea alita afenoamima omalenea veanea amamuteasine.” huya ani amofena “Kefo kava talo hane.” huya kemakimainae. 6 Ke neamakigeno Yisasia mage huno hie “Agaila afaa ataleho. Naa higetama kea neamakiye? Ani amona aipamoa haviya hisia kava nehagi nagaila tusia kanale kava hunenate. 7 Afenoamima omalenea veamoya mukia kanafina tamakaiene maigahayanagitama amaya hisaya tamakesama havisayana amaya hugahayanagi nagaya tamakaienena mukia kanafina omaigahue. 8 Ani amoa amukoa hanegeno ani kavala hagoteno afaa ofalina mainogeno masavema faleya hevainatesaya masavena agola fale nenate. 9 Tamage huna tamahanepauve mukia ma mopafi veapima Yisasifena kanale mono kema hamapaisayana ani amoma hia kavafeenena hamapaisageya mukia veamoya agaife amakesa havi havi huya maigahae.” huno hie.
Yutasia hulamake huno kava vayafe “Yisasina avalena tamamigahue.” huno hamapaimaine.
10 Ani kanafina Yutasi Isakaliotia tuelufua (12) anagaaene nemaiya kanomoa viaamo Yisasina agesi huno momavalesigeya metafa hisaya yafe mono note kava vayatega umaine. 11 Viaamo mo hamapaigeya ani kea haviteya tusia muse huteya ‘Mone kamigahune.’ huya hapaitageno Yutasia vaya kuluta oai yate kesi kateti momavaleno esigeya Yisasina haesaya kafe atiyemaine.
Yisasia agaiaenema tokaeya nemaiya anagaaene kavela nemainae.
12 Hale oki kaihame kana maya nenaya kanamoa ehe kanale Anumaya Kotia Yuta vaya amaugafama aligatimainea kanahe amakesa nehaviya imuma kigahena sipi sipi heya kiya nenaya kanamoa falote higeya Yisasiene tokaeya nemaiya anagamoya Yisasina mage huya havigae “Hanatega kahaisia kumatela Anumaya Kotia amaugafama aligatimainea kanahe kagesa havisana kavela mo lalo tala hisune?” huya hae. 13 Hageno Yisasia tole kanolatana hunateno mage huno hanapaiye “Ala kumate neviageno ti keayoma alino esia kanoene fotu hutetana akave vio. 14 Akave neviageno haino mo falesia nopi haitana ani nomona nefafe mage hutana havigeo ‘Hulavenelia kanomoa mage hie ‘Hanate ayenalagimalenana nona hane? Yoka namisanagena nagaiene tokaeya nemaiya anaganiene Anumaya Kotia amaugafama aligatimainea kanahe tagesa havisuna kavela nesune?’ huno hie.’ hutana havigeo. 15 Hisaagenoa folamo huno anale kimalenea nona ago alino hilato humaleneanagino ala nona tanavelisigetana kavetia talo tala hio.” huno hanapaiye. 16 Higeana ala kumate vaana Yisasima hia kemoa mukia falote higeana ageteana Anumaya Kotia amaugafa aligatimainea kanahe amakesa havi havi hisaya kavela talo tala humainae.
17 Talo humalenaageya yagemoma tavi faleamaa Yisasia tuelufua (12) anagaamoyaene emainae. 18 Mopale emaineya kavela nenageno Yisasia mage huno hie “Tamage huna tamahanepauve nagaienema kavema nenaya anagamogatama tamakaipiti kesi nahaesaya yatela nago kanomoa vaineaye.” huno hie. 19 Higeya ani anagamoya amaipa haviya huteya agaifena amahaote amahaote mage huya hae “Nagaife nehano?” higeya “Nagaife nehano?” higeya huya havigae. 20 Havigageno Yisasia mage huno hie “Tamakaya tuelufua (12) anaganimogatama tamakaipiti nagokemoga kesi nahaesaya katela vaineayane. Ani kanomoa nagaiene nagoke yopafiti kaihame kana maya ali vayagofino nene. 21 Nagaya ikapinagati emainoa kanoa vayamo natenea nafanemonihena Anumaya Koti autamafima kaemalenaya avamete kava hugahuanagi vayamoya havisagi huno nagesi hunatesia kanomofena ‘Avonio nahau hanagi kagaya maigayeka mainekao.’ huna nehue. Ani kanomoga itakamoa okateneleasina tusia kanale kava hileasine.” huno hie.
Yisasia kaihame kana mayaene nofi alagamo tiene amamine.
22 Ani kavela nenageno Yisasia kaihame kana maya alino nunamu huteno muse huno havigeno kolite kolite huno neamamino mage huno hie “Aliho. Mamona nagaini naugafae.” huno hie. 23 Nagola vaini nofi alagamo ti hanea keayola aliteno nunamu huno muse huno havigeno alino amamite amamite higeya nemainae. 24 Nenageno Yisasia mage huno hie “Mamona nagaini kolane. Vayamoya nahaesagena falisugeno kolaniamoa takilavino mukia veafene huno takilavisia yafe Anumaya Kotia hulokiya vaino alino halegafilamatenea kemo aepamoa alino fatago hugahie. 25 Tamage huna tamahanepauve menia nagaya vaini nofi alagamo timaa nagoene onegahuanagina Anumaya Kotima kava yagaimainea kumate umainena haegafa nofi alagamo tina etena negahue.” huno hie. 26 Higeya yagamea nagola huteya Olivi yosa hanea agoyafi haimainae.
Yisasia Pitafe “Kakaveno hunategane.” huno hie.
27 Yisasia mage huno hamapaiye “Tamakaya mukiamogatama nagaife havitama tamakupi maletama tamametiti nehaya yana ataletama asaga hulavisagi nayona ani yafe kaemaleneane
‘Nagaya sipi sipi kava kanoa haesugeya sipi sipiyaga atagufeya falegahae.’ huno kaemaleneane.
28 Kaemaleneanagi falimainesufiti Anumaya Kotia alino hetinatesigena Kalili uhagotelamatena visugetama nakave egahae.” huno hie. 29 Higeno Pitaa kenonaa mage huno hie “Mukia anagala kagaifema haviya amakupi maleya amametiti nehaya yama ataleya falesagenahena nagaya ania ohugahue.” huno hie. 30 Higeno Yisasia mage huno hie “Tamage huna kahanepauve meni kegela kokolemoa tole kanale agea oainesigeka kagaya tagufa (3) kanale mage hugane ‘Nagaya oagenoa kanoe.’ huka avane hunategane.” huno hie. 31 Higeno Pitaa tokiyaage ke huno hie “Kagaiene nahaesagena faligahuanagina kagai kagihena avanena huna fala okigahue.” huno higeya mukia anagamoya nagoke kegeya humainae.
Yisasia Ketesemani hoyafi nunamu mo humaine.
32 Huteya Ketesemani uvayi hageno Yisasia agaiaenema tokaeya nemaiya anagafena mage huno hie “Tamakaya male maineho. Nagaya Anumaya Kotitega nunamu huna havigegahue.” huno hie. 33 Pitaene Yemesiene Yoniene amavaleno viana aepa heno aipamoa kanaage higeno haumana halegeno kasageke hie. 34 Huteno mage huno hamapaiye “Nahau nayamopamoa tusia kanaage nehigena ago falisua kava nehugi male mainetama kava yagaitama maineho.” huno hie. 35 Osia viaamo nunamu huno havigegahe mopafi agoya moyeno maineno nunamuna mage huno havige “Kahaisigekahena falisua kanania alitalesane huna kahavinegoe. 36 Nenafagae kagaya mukia yana kanale hateasine. Nagaya falisua kava nehugi ani havi kanamoa satuage hia ti kana tima hanea keayola nahafaletalo. Afaa nagai nagu nagesa akave ohuka kahaisia yana afaa huo.” huno havige.
37 Havigeteno viaamo momakeana agaiaenema tokaeya nemaiya anagala faeya mainageno Pitafena mage huno hie “Saimonigae faekage mainano? Vae kagaya aupa kana kanoa kava oyagaikage mainano? 38 Satania ayelamavataga hisigeno tamakuamoa ‘Ohugahue.’ huno tokiyaage humaineanagi afaa amega tamaugafamoa tokiyaa omaleneanagino ‘Hugahue.’ huno hisia yana hugahigi Satani kema ohavisaya yafena kava yagaitama mainetama Anumayamotega ke hutama havigeho.” huno hamapaiye.
39 Huteno amataleno viaamo Anumayamotega havigea kea ania huno nagoene mo havige. 40 Havigeteno eteno momakeana amau tokotoko higeya faeya mainageno momakeanagi “Vae tagaya naane hisune?” hugeya amakesagumo humainae.
41 Hageno Yisasia eteno eaamo tagufa (3) kanale amakaifena mage huno hamavige “Maifalu hutamage faetama mainao? Hailagino kanania ago falote nehie. Nagaya ikapinagati emainoa kanoa vayamo natenea nafanemonia nagesi huno navaleno kefo yama nehaya vayamogami amayapi natesigeya nahaegahe nehae. 42 Mukiamogatama hetitama vigetao. Ageho nagesi huno nahaesia kanoa ago neegi vigeta mogamano.” huno humaine.
Yutasia Yisasina avaleno kame vaya amayapi atene.
43 Yisasia mani kea nehigeno aupaa Yutasia tuelufua (12) anagaaenema tokaeno nemaiya kanomoa evayi higeya agaiene mukia vayayagaene mono note kava vayaene kahegi kema havilinaya anagaene nagoa Yuta vayatamaenema humataya vayamoya ayaaya naepege naipege huya muki kayoene aliya emainae. 44 Agesi huno Yisasina haesaya yama amavalisea kanomoa vayayagahena mage huno hamapaiye “Atakoma hisua kanoa haesaya kano mainegi atafa hutama tokiyaage hutama avaletama viho.” huno hamapaiye.
45 Yutasia evayi huno Yisasite eaamo mage hie “Hulavenelina kanomogae.” nehuno atako me hie. 46 Atako higeya ageteya vayayagamoya Yisasina atafa huya ayetalako humainae. 47 Atafa nehageno nagola agaiaenema hetimaiya kanomoa ayaaya naepea hevayu huno ala mono note hagote kava kanomo aliya kanoamo agesa aifakalitalegeno asaka hulavimaine. 48 Aifakalitegeno Yisasia mage huno hie “Tamakaya nagaifena ‘Vaya nehamaeno musufaya nehia kano maine.’ hutama nagaima natafa hugahena ayaaya naepene muki kayoene alitama neao? 49 Mukia kanafina efiefi huna tamakaiene mainena ala mono nopina mono kea huhalena nehuanagi nagaila natafa ohunayanagi afaa kanalele. Nayoma kaemalenaya kemoa falote huno tamage hisia yafe menia natafa nehae.” huno hie. 50 Higeya mukia agaiaenema tokaeya nemaiya anagala neataleya fale hano humainae.
Nago neya kanomoa koli huno falemaine.
51-52 Nago neyamoa aye ohati kena kenalafamaage failino Yisasi akave umainegeya agaila atafa hugahe hageno kenaa hateno neataleno augafa alapaage aiyayeno faleno umaine.
Yisasina kanisole vaya amaulagale kaiyekea hutenae.
53 Yisasina avaleya ala mono notela hagote kava kanomote ageya mono note kava vayayagaene Yuta vayatamayagaene kahegi kema havilinaya anagaene alitalu huya mainae. 54 Pitaa akave anatino vianagi avatela ounegi aluale umaineno ala mono notela hagote kava kanomo nomo haupale uvayi huno ati vayaene mopale umaineno atale tota huno maine.
55 Mono note kava vayamoyaene mukia kanisole vayaene Yisasima haesaya kaiyekema hutegahena nagoa vayamoya “Kefo kavala higeta agemainone.” huya hutesaya vayafe atiyayana omainae. 56 Omaigeya kasagoya vayamoya havige huya Yisasifena hayanagi amakai kemoa nago katela ohunagi alu ke alu ke maiya humainae. 57-58 Nagoa vayamoya hetiya havige huya Yisasifena mage huya hae “Tagaya agaiama humainea kea havilinone mage huno humaine ‘Nagaya vayamoyama kimalenaya ala mono nona alina lagape aitalena tagufa (3) kanafi ani nona etena vayamoya nokiya avamete no ali hetigahue.’ huno higeta havilinone.” huya nehae. 59 Hayanagi ani kemoa nago avamete kea ohunagi alu ke alu ke maiya humainae.
60 Hageno ala mono notela hagote kava kanomoa amunoamifi hetimaineno Yisasina mage huno havige “Na augafa ke kagaifena nehae? Kagaifena kaiyekema hunegatayana kenonaamia hufalote huka nohane?” huno havige. 61 Havigeanagi Yisasia kea ohuno avaya lukino maineno nagola osi ke kanoa ohutafa huno mainegeno ala mono notela hagote kava kanomoa eteno nagoene havige “Kagaya Anumaya Kotia taugafa aligatigahema hugatenea kano mainano? Kagaya agima alisaga nehaya Anumaya Kotina nafaneamoga mainano?” huno havige. 62 Havigegeno Yisasia hufalote huno hie “E, nagaya ani kano mainoanagitama tamakaya haenagaa Ikapinagati emainoa kanoa vayamo natenea nafanemonia tusia tokiya yamaa hanea Anumaya Kotina tamaga ayatega hanea siale mainena ikate hanea siate esugetama nagegahae.” huno hie. 63 Higeno ala mono notela hagote kava kanomoa ani kea havigeno aipamoa tokiyaage higeno kenaa alino hatata nehuno mage huno hie “Tagaya hai havunanagiya nagoa vayamoya kaiyekea huoatesae. 64 Anumaya Kotifema huhaviya hutea kea ago nehavigi. Na tamakesa nehaviye?” huno higeya mage huya hae “Tamage nehane anona yamaa alisia yafe haesageno falisie.” huya hae.
65 Huteya nagoa vayamoya Yisasina amavetuna heneateya aulagafi aiso huteneya aikoneliya mage huya havigae “Kaune kema nehana kanomoga tahapaiyo taya negahayae?” huya havinegeya ati vayamoya amayateti aikolimainae.
Pitaa Yisasifena avane huno “Nagaya noagoa kano maine.” huno hie.
66-67 Pitaa nomo haupalega afetega mainegeno ala mono notela hagote kava kanomona aliya munamoa anile emaineno ageana Pitaa ata lota nehigeno ani munamoa megeteno Pitana agesagali maineno mage huno hie “Kagayaenena Nasaleti Yisasiene vaiyatete nehana kanoe.” huno hie. 68 Higeno Pitaa avane huno “Aao nagaya ani kanoa oagenoa kanohe maika nehane.” huno nehuno fiate nevigeno anile kokolemoa agea aimaine. 69 Fiate mainegeno ani munamoa mogeteno anile hetimaiya vayafena mage huno hie “Mani kanoa Yisasi anagapiti kanoe.” huno hie.
70 Higeno Pitaa nagoene eteno “Aao nagaya ani kanoa omainoe.” huno hie. Osi kana kanoa maigeya anile hetimaiya vayamoya mage huya hae “Tamage kagaya Kalili kano mainana yafe agaiene vaiyatete nehana kano mainane.” huya hae. 71 Hageno Pitaa mage huno hie “Nagaya tamagema ohisugenoa Anumaya Kotia nahaesie. Anumaya Koti aulagafina tamage huna tamahanepauve tamakayama haya kanoa nagaya oagenoa kanoe.” huno hie. 72 Nehigeno aupaa hagoteno agema aiya kokolemoa anile viaamo agea aigeno Pitana agesamoa aikalo higeno Yisasima hapaigeno havimainea kea mage huno humaineane “Kokolemoa tole kanale agea oainesigeka kagaya tagufa (3) kanale avane huka nagaifena ‘Noagoa kano maine.’ huka hugane huno humainea kemoa Pita agesamoa aikalo higeno haviteno tusia avitemaine.