Leveleseni
Mani kemona agimo aepaa Kanite kefina mage huno hane “Fala kimainea yana alino fufute maleno ali falote humalene.” huno humaine. Mani avona haenagama falote hisia yana Yisasi Kalaisia himona kana yapi ali falote huno Yonina ave-ligeno Yonia kae-malenegeta nehavune. Yonia ani kanafina kosuna leteno nagola ti amunopi hanea kumate kina nopi maineno mani yayaga himona kana yapi ageteno kae-malene. Yisasia faliteno hetino ikapinaga haitegeno Yonia sikisiti faefua (65) kafu agava maineno Leveleseni kea kae-malene.
1
Mani kemona aepaamoa maa humaine.
1 Nagaya Yoninae Yisasi Kalaisia naveligena agetena mani kea kaena tamahapaigahe nehue. Nayona mani kemoa fala-kino haneanagino Anumaya Kotia ani kanamoa aupaa falote hisia yana Yisasi Kalaisina agaia aliya veane amave-lisiafene huno Yonina ave-ligeno kae-malene. Yisasia ensole kanoa hutegeno nagaya agai aliyama nealua kanoa, Yoninile, eaamo mani yayaga me naveli-maine. 2 Me naveligena age-mainoa yafeene Anumaya Koti kene Yisasi Kalaisi humainea kene alina tamage huna tamahanepauve. 3 Ma avopima kae-maloa kea ago aupaa falote hisia yafe aune laga huno humainea kema hapaliya havisaya veanene haviteya akavema malesaya veanene tusia muse hugahae.
Yonia sevenia (7) kumate hanea mono note avona kaeno amamine.
4 Nagaya Yoninae Esia kotega sevenia (7) mono noma hanea veamogatamale mani avona kaena nelamamue.
Anumaya Kotia nayona maineanagino menienena maineanagino haenagaa maisia kanogino agaia kava yagai-mainea siamo aulega sevenia (7) Avamumoya hetiya mainayanagiya kayone hisaya yaamiene tamaipa falu hisia yaamiene tamamisae. 5 Tamamisageno Yisasi Kalaisia fatago huno Anumaya Koti kema hamapai-mainea kanomoa fali-mainaya veapitila uhagote-lateno heti-maineanagino mukia veanema fali-mainesafiti hetisaya katia valilatene. Mukia mopafima mainaya sauve vayamogamina sauveamimoa agaiage maineanagino kayone hisia yamaaene tamaipamo falu hisia yamaaene tamamisie. Tagaifena hau ayamopafi haigeno agaia kolamaa ailaki-talenea yateti mukia kefo yatimoa aigagilateneanagino agola ali kalu hetalene. 6 He-taleneanagino Anumaya Kotia kava yagailatesia yapi tavaleno tategeta mainonanagita tagayama Nelafa Anumaya Koti aliyama nealita agima alisaga huta musema hutesunafene huno hulatene. Hulateneanagita mukia kanafina agai agia alisaga hisunageno tokiyaage hale yamaamoa agola hanege hanege huno hanesie. Tamage.
7 Ageho Yisasia siate maiteno egahigi mukia amakavenoma huteteya augafafima kevema aye-mainaya veanene mukia ma mopafima mainaya veamoyaene ageteya tusiya huya hamau huteya avi tegahae. E, ani yana tamage huno falote hugahie. Tamage.
8 Ala Anumaya Kotia mage huno humaine “Nagaya nagainia mukia tokiyamona aepaa mainoanagina mukia yatela kava yagai-mainoafe alivayayesua kanoa tamage huna mainoe. Nayo kanafina mainoanagina menia mainoanagina haenagaa maigahue. Tusia tokiyania hanea kava kano mainoe.” huno hu-maineane.
Yonia Yisasina age-maine.
9 Nagaya Yoninae neputamimona tamakaienena Yisasiene ailokaeta mainona yafe tusia kana yaene tagata aiya yaene falote hianagi Anumaya Kotia kava yagailategeta mailava huta tokiyaage huta mainone. Nagaya Anumaya Koti kene Yisasia tagaima hulatenea mono kene huhalena hua yateti navaleya Patimosia ti amunopi hanea kumate kina hunatagena mainoe. 10 Mainogi nago Sotayupa Alu Aotage Avamumoa tokiyaage huno natafa higena nehavugeno nakavelagati nagola ala kegefamoa ufema nehaya avamete huno agea aigena havimainoe. 11 Ani kemoa mage huno humaine “Mukia yama agesana yana avopi kaeteka atalegeno sevenia (7) kumate hanea mono note veatega vino. Efesusiene Simenaene Pegamumuene Taiyatailaene Satisiene Filatelefiene Leotisiaene vino.” huno humaine.
12 Higena kema nahapaiya kanoma agesuafene huna maiyahae huna agoana sevenia (7) lamua kanileta yafateti talo humale lamua hanegena age-mainoe. 13 Agoa lamuyagamo amunopina nago kanoa, ikapinagati emainea kanoa vayamo atenea nafanemo augafa kana kanoa hetino mainegeno ayaaya kenamoa aiyalega vai-talegeno tavigeno kanileta yafateti talo humale amunofila aigagino haifiyafale hu-malenegena agoe. 14 Agogeno ayolagefamoa efeage huno sipi sipimo ayolagefaleti talo humale nofi kana huteno efeage sia kana nehigeno aulagamoa ata nefemoma hia avamete humaine. 15 Higeno aiyamoa nagola atafima kae-malageno teno tokiyaage huno hale yamaaene kanileta yafa kana nehigeno agema aiya agemoa paugegefa nehigeno ala timo agemoma neaiya avamete kava huno aimaine. 16 Ayapina sevenia (7) kanefi atafa hu-linegeno avayafitila tole kaiyaga avenene naepe kayona anikofi-linegeno augosamoa yagemoma hia kava huno aigalu galu huno aivasa humaine. 17 Aigalu galu higena neagena fali-mainea vaya kana huna aiyafi nagoya aye-mainogeno tamaga ayana naugafale maleno mage huno hie “Kolia ohuo nagaya mukia tokiyamona aepaa mainoanagina nagaya uhagotena maitena haenagalafana maitena huna mainoa kano mainoe. 18 Nagaya nahaimuene kano mainoe. Nayona ago fali-mainoanagi ago hetina haegafa huna agola mukia kanafina maige maige huna mainoanagina veama nefalia yaene fali-mainaya veamoya mainaya kumate ki nofitela ali-linena ani yapitima amavalena amatalesua himamunia hane. 19 Haneafe kagaya menima falote higeka agana yaene haenagama falote hisia yaenena avopi kae-malo. 20 Sevenia (7) kanefiene sevenia (7) kanileta yafateti talo humalenaya lamuenena tamaga nayapima hanegeka agana yamoa falaki-mainea yamo aepaa kahapaigahue. Sevenia (7) kanefimoa maa humaine sevenia (7) kumatema Yisasife haviya melitalu nehaya veate kava vayafe humaine. Sevenia (7) lamumoa ani sevenia (7) mono noyagafi Yisasife haviya melitalu nehaya veafe humaine.”