5
Yonia nagola avoma kae-male omana haya ki-malenegeno age-maine.
1 Nagaya Yoninae agoana ani sauve kanomo sialema maiya kanomona tamaga ayapina nagola avoma kae-male omana aye-gafage ki-malegeno hane. Ani omanamona amegaene agusafinagaene avona kae-maleteno veamoya oagesayafene huno atupale sevenia (7) menimo fuki kana yateti aye kamae-malene. 2 Aye kamae-malenegena agoana nagola tokiyaa hanea ensole kanomoa ala kegefafiti keha keha huno mage hie “Hana kanoa atesia kanomo anima menimo fukiteti aye kamae-malegeno hanea omana ali vaka yegahie?” huno hie. 3 Higena agoana atiyeyama agayana ikapinagaene mopafiene mopamona afepinagaene nagola ani avoma ali vaka yesigeno atesia kanoa omaine. 4 Nagola ani avoma kae-male omanama ali vaka yesigeno atesia kanoa omaigena agetena tusiya huna avia ate-mainoe. 5 Neatogeno tueti foa (24) kava vayapiti nago kanomoa nagaifena mage huno hie “Avia oateka havio nago kanoa Teviti aginagomoa, kaveage laiyoni afu kana humainea kanoa, Yuta nofipiti kanogino, Sataniene tua huno ago agase-maineafe ani avoma kae-male omana sevenia (7) menimo fukiteti aye kamae-malenea yana ali hakao huteno ali vaka-yegahie.” huno humaine.
Yonia Sipi sipi nafanea age-maine.
6 Ani sauve kanomo siamo amunopina nagola Sipi sipi nafanea heti-mainegeya foa (4) hamaimuene anagayaene tueti foa (24) kava vayamoyaene agaila mai kagi-mainagena age-mainoe. Agoana ani Sipi sipi nafanea maiyanagi hayagenoma fali-mainea afu kana huno sevenia (7) aveene sevenia (7) aulagaene hane. Ani aulagayaga sevenia (7) Anumaya Kotia hutegeno mukia ma mopafi vaiyatete nehia Alu Aotage Avamulagiya mainae. 7 Ani Sipi sipimo nafanemoa viaamo sauve kanomo siale mainea kanomona tamaga ayapiti ani avoma kae-male omana ali-maine. 8 Aligeya foa (4) hamaimuene anagayaene tueti foa (24) kava vayamoyaene ani Sipi sipimo nafanea avate mope huya mukiamoya gita kana yana yagame nehaya yaene kanileta yafateti talo hu-malenaya yopaene atafa hulinae. Ani yopafina manaage halinamo humainea tanefamoa havate-maine. Ani manaage halinamoa maa humaine veamoya nunamuma nehuya Anumayamo agima alisaga nehageno Anumayamo avate vigeno havigeno aipamoa kanale higeno hagaage manama nehavia kava humaine. 9 Ani anagamoya Sipi sipi nafanemofena mage huya yagamea humainae
“Kagaila kahayageka fali-mainana kolateti ma mopafi veamogamina, alu kote kotega veanene, alu make alu make neaiya veanene, alu amaugafa alu amaugafa kalimainea veanene, kefo yaamimo alino hayagimatenegeka kagayama fali-mainana kolateti anifiti aligalu heka amavayu huteka Anumaya Koti veane maisaya yafe mukia ago miya humatenane. Miya humatenanafe kagaila kanale ya huno katea kava hana kano mainananagika anima aye-gafage ki-maleteya menimo fukiteti aye kamae-malenea avo omana alika ali hakao hisana tokiyakaa hane. 10 Anumaya Kotia kava yagai-lamatesia yapi ago amatanageya Anumaya Koti agia alisaga nehuya agai aliyana nealiya ma mopafi veamogamina kava humategahae.” huya yagamea hagena havimainoe.
Sipi sipi nafanemo agia alisaga humainae.
11 Havitena agoana kasagoya ensole vayala teni milionia (10,000,000) ensole vayamoya hetiya Anumaya Kotima nemaiya sialeene foa (4) hamaimuene anagaene tueti foa (24) kava vayamoyaene maigagiya maineya ala kegefafiti mage huya hagena havimainoe.
12 “Ani Sipi sipi nafanea hayageno faliteno heti-mainea kanogino tusia kanale kano maineanagino atesia napamaa aliteno tusia tokiyaa hanenageno mukia kanale yaene kanale havi haviyaene hanea kanogino kava hisia tokiyaaenena haneanagita tokiyaage hale yamaene agia alisaga hisunageno anale hanesigeno mukia muse hisia yana alisie.” huya hae.
13 Hagena havugeno mukiama Anumaya Kotia talo humalenea yamoa ikapinaga mainaya yaene mopafima mainaya yaene mopamo agusafinagama mainaya yaene tipima mainaya yaenena mukiamoya mage huya hae
“Sauve kanomo siale mainana Anumaya Kotigaene Sipi sipi nafanene agola mukia kanafina muse hisaa yamoa hanege hanege huno hanesie. Tokiyaage hale yamaaene tanakia haneanagita alisaga hisunageno anale hanesigetana kava hisaa tokiyatanimoa hanege hanege huno hanesie.” huya hae.
14 Hageya foa (4) hamaimuene anagamoya “Tamage huya hae.” hageya tueti foa (24) kava vayamoya ape huya Anumayamo agia alisaga humainae.