7
Vani hataleti foti fo tausenia (144,000) Isaleli veamogamina Anumayamo avona hamanile aigamaema-tene.
1 Ani kema havitena agoana foa (4) ensole vayamoya foa (4) ma mopamo atupalega heti-maineya yasimona atafa huya ali-talako huligeno yasimoa taga higeno mopafima hanea yamoene hagelimoene yosayagamoenena kanage kanagala ohunae. 2 Ohagena agogeno nago ensole kanomoa yagemoma evayi nehilegati eaamo haimuma hanea Anumaya Kotia agaia veamogami humatenea avona aigamaematesia yana ayapi atafa hulineno ani foa (4) ensole vayala mopaene hageliene ali haviyama hisaya tokiyaamima amaminea ensole vayafe mage huno ala kegefafiti hamapaiye. 3 “Tamakaya mopaene hageliene yosayagaenema ali haviyama hisaya ensole vayamogatama neataletama tagava mainegeta tagaya hagoteta Anumaya Kotitimo aliya veamogami hamanilela Anumayamoma humatenea avona aigamae-matetesunagetama ani yayaga ali haviyana hugahae” huno hie. 4 Higena havugeno huyogino hamanile avoma kae-malenea veanea vani hataleti foti fo tausenia (144,000) Isaleli veanea alu nofipiti alu nofipiti huyogi-malenea venea agoe. 5 Yuta nofipiti tuelufu tausenia (12,000) veanene Lupeni nofipiti tuelufu tausenia (12,000) veanene Kati nofipiti tuelufu tausenia (12,000) veanene huyogi-malene. 6 Asa nofipiti tuelufu tausenia (12,000) veanene Napatalai nofipiti tuelufu tausenia (12,000) veanene Manase nofipiti tuelufu tausenia (12,000) veanene huyogi-malene. 7 Simioni nofipiti tuelufu tausenia (12,000) veanene Livai nofipiti tuelufu tausenia (12,000) veanene Isaka nofipiti tuelufu tausenia (12,000) veanene huyogi-malene. 8 Sepuluni nofipiti tuelufu tausenia (12,000) veanene Yosefe nofipiti tuelufu tausenia (12,000) veanene Penisamini nofipiti tuelufu tausenia (12,000) veanene huyogi-malene.
Kasagoya veamoya Anumaya Koti agia alisaga humainae.
9 Kasagoya veanea ohavunamaa veanea alu kotega alu kotega veanene, alu make alu make neaiya veanene, alu amaugafa lu amaugafa kali-mainea veanene, mukia Anumaya Koti sauve kanomo siamo aulegaene Sipi sipi nafanemo aulegaene heti-maineya efe kena ayaaya kenaamia failineya fanofamo haisa amayapi atafa huli huli hulinae. 10 Hu-lineya ala kegefafiti mage huya hae “Sauve kanomo siale mainea Anumaya Kotitimoene Sipi sipi nafanemoene tagu tamema ago aligati-mainea yamona aepaa mainae.” huya hae. 11 Nehageya mukia ensole veamoya hetiya Anumaya Kotima mainea sialeene tueti foa (24) kava vayamoyaene foa (4) hamaimuene anagamoyaene maigagiya maineya mukiamoya ani siale ape huya Anumaya Koti agia alisaga nehuya mage huya hae.
12 “Tamage Anumaya Kotia mukia muse hisia yana alisie. Tokiyaage hale yamaaene agia haneanagino kanale havi haviyamaa hanea kano maineafe agia alisaga nehuta tusia muse hutesune. Agaia kava yagaisia tokiyaamoa agola hanege hanege huno hanesie. Tamage.” huya humainae.
Ani anagamogamina amakatama neaiya yamoa menia agola hano hie.
13 Ani kea hu neatageno nagola ala kava kanomoa nagaifena mage huno nahavige “Nama ayaaya efe kenama fai-linaya veala tayae? Hanategati emainae?” huno nahavige-maine. 14 Nahavigegena nagaya, Yonina, mage huna hue “Musekaa nehugi kagaya kagaikaa havilinane.” huna hugeno nagaifena mage huno hie “Mani veamoya tusia kana yama hanea kanafi maineya tokiyaage huya kefo yaamihema haviya fali-mainea Sipi sipi nafanemo kolateti kenaamia agola sese hageno efeage hu-maineanagiya emainae. 15 Ani yafe amakaya Anumaya Kotima mainea siamo aulega heti-maineya felugaene kegeene agai agia alisaga nehuya agai aliya nealiyanagino Anumaya Kotia au vaimateno kava yagaimategahie. 16 Yagai-mateneanagino nagoene amakala otegahie. Tifena oamakegahie. Yagemoa amuko-nako huno amaleno oamasagaligahie. 17 Sipi sipi nafanemoa Anumaya Koti mainea siamona aulega hanea amunopi hetino maineno sipi sipi kava kanoami maineanagino kapaima nehagea tima hanea komulega amavaleno mo matenageya maige maige hisaya tina nenesageno Anumaya Kotia amaunua alino hami-matesigeya nagoene avia oategahae.” huno higena nagaya Yonina havimainoe.