1 Nagola tusia tokiyaage avame yana ikapinaga falote hie. Nago amoa mainegeno kenaamoa yege aumona ayeno auvai-maigeno ikamoa aiyafinaga hanegeno anutela tuelufua (12) kanefimoya tumano ku kana huno vai-line. 2 Ani amoa aipaene maineno inamu ya alitegeno agata aigeno avovo humaine.

3 Nehigeno nagola tokiyaage avame yana ikapinaga falote hie. Nagola tusia haesa osifave mainegeno sevenia (7) anuna hanegeno tenia (10) aveyaga anuyagafina hanegeno sevenia (7) ala sauve kanomo tumano kuyaga ani avetela vai-line. 4 Ani osifavemoa ikatema hanea kanefiyaga tagufafi (3) ali fako hu-malageno anifiti nago haupa kaiyaga kanefiyaga aigoyaleti aye tafai-talegeno mopafi elavi-mainegeno ani osifavemoa amo aule hetino nafaneama neatesiana ani havi osifavemoa haeno nesiafene huno agava maine. 5 Mainegeno ani amoa ne nafanema neateana ani nafanemoa haenaga ala kano maiteno aeni ayopaa ali-lineno mukia ma mopafi veate tokiyaage huno kava yagaisia nafanema neateana ani nafanea aupaa hafaleya avalesaga huya anafinaga Anumaya Koti siale atenae. 6 Atageno ani amoa nafanema atetenoa faleno vigeno Anumaya Kotia maisia kumala talo tala hutegeno kame kotega viaamo tagufa (3) kafuene sikisia (6) ikaene Anumaya Kotia yagaitene.

7 Naa higeno ikatela tusia tua falote humaine. Ensolemo-gami kava kanoamimo agia Maikoloe ensole vayayagaene tokaeya havi osifavene agaia Kefo Avamuyagaene tusia tua humainae. 8 Tuma hayanagi havi osifavemo tokiyaa omalegeya asaga hu-mainageya avaleya ikapinagati avaleya hagayu hu-talegeno nagoene anile omaigahie. 9 Ani nayoma nemaiya ala osifavemo agia Satanie nehaya kanomoa ma mopafi veafena havigegeya huno ayemavataga hugeno omai kanoene agaia avamuyagaene ikapinagatila amavaleya hagayu humatalageya ma mopafina elavi-mainae.

10 Elavi-mainagena havugeno ikapinaga ala kegefafiti mage huno hie “Anima avaleya hagayu hu-talaya kanomoa tafu-tagana-gamina mukia kanafina humatege humatege huno mage hie ‘Ani kefo yana nehae.’ huno Anumaya Koti aufima hufalote nehia kanomona ikapinagatila ago avaleya hagayu hu-talenaya yafe Anumayatimoa tagu tamema aligatisia yamoa ago falote humaine. Anumaya Kotia agaia tokiyaa mukia veanea ago amave-liteno agaya ala sauve kava kano maine. Maineanagino agaia tamaugafa aligatisiafene huno hutenea kanomo kava yagaisia tokiyaa hane. 11 Haneanagino Satania tafu-tagana-gamifena ‘Naa kefo yana nehae.’ huno ali falotela hianagi tafu-taganaya Yisasia, Sipi sipi nafanemo kolamoma tavi-mainea kene Anumaya Koti kemoene huhaleya humainaya yateti Satanina agase-mainayanagi amakaiami amaugafahena amakesa ohaviya falisaya yafe kolia nohae. 12 Naa humainaya yafe ikamogaene ikapinaga mainaya veanene musena hiho. Musena hugahayanagi Satanina ikapinagatila avaleya hagayu hu-talageno ma mopafina elavi-mainegeno ‘Aupa kana kanoa maigahue.’ huno agesa havimainea yafenagino aipamoa ata neleanagina avonio ma mopafiene hagelipiene mainaya yayagahena nahau hugi kayeho.”

13 Ala osifavea ago avaleno hagayu hu-talegeno ma mopafi elavinoma emainea yana ageteno ani ne nafanema atenea amona ali haviya hutesia yafe mo nati-maine. 14 Mo natianagi Anumaya Kotia ani amona aluga aluga haopalega ala hakikimo agekona talo huno ategeno ani amoa haleno kame kotega, Anumaya Kotia talo tala humalenea kumate umainegeno Anumaya Kotia tagufa (3) kafuene sikisia (6) ikaene yagai-mainegeno ani havi osifavemoa ali haviya hutesia tokiyaa omalene. 15 Omaleneno ani osifavemoa avayafitila muvali-talegeno tavia timoa tusia ti hogino aiyayeno laviaamo ani amona asaga huno nakaino ali haviya hisie huno ani kavala humaine. 16 Naa hianagi ani amona aya hisia yafe mopamoa eko alino avaya aka hu-mainegeno ani osifavemo avayafitima lavia timoa ani eko kapi tavi fale hano humaine. 17 Tavi hano hianagi ani osifavemoa amofena aipa kafa heteteno ani amo aginagomoyaene tua hugahe umaine. Ani veamoya Anumaya Koti kahegi kema haviya akavema nemaleya Yisasi humainea kema atafa hu-linaya veanene tua hugahe umaine. 18 Ani osifavemoa hagelimo agegayalega hetino maine.