4
Anumaya Kotia Apalahamufena “Fatago kano mainane.” huno hutene.
1 Apalahamua Yuta veamogati taginagomofena naane hisune? 2 Apalahamua agaia aliyateti mukia kahegi kemona akave maleneafe Anumaya Kotia “Fatago kano mainane.” huno hileasina Apalahamua agaia agia alisaga hileasinagi Anumaya Koti aufina naa kavala ohune. 3 Anumaya Koti autamafina mage huno kae-malenayane
“Anumaya Kotia Apalahamufena ‘Naa hugategahue.’ huno hulokiya vai-malenea kehena ‘Lamage hanafe ania hunategane.’ huno agupi maleno ametiti hiafe Anumaya Kotia mage huno hutene ‘Fatago kano mainane.’ huno huteneane.” huya kae-malenayane.
4 Veamoya aliya nealiya yateti miyama alinuyahena ani miyafena “Afaa muse ya nelamie.” huya nohagi “Aliya alimainona anonaa nealune.” huya nehae. 5 Nago kanomoma “Kahegi kema mukia kanalema akave malesuafe Anumaya Kotia ‘Fatago kano mainane.’ huno hunategahie.” hunoma ohisiana “Anumaya Kotia agaiage kefo kava nehia kanomofena ‘Fatago kano mainane.’ huno hutenea kanomoa nagaila ‘Fatago kano mainane.’ huno hunategahie.” huno ametiti humaineafe Anumaya Kotia anima agupi maleno ametiti humainea yana ageteno “Fatago kano mainane.” huno huneate. 6 Yuta veamogatina taginagomoa, Tevitia, mage humaine nagoa veamoya kahegi kea akave omaleya Anumaya Kotife haviya amakupi malesayana Anumaya Kotia amakaifena “Fatago veane mainae.” huno humatesia veamoya tusia muse hugahae. 7 Tevitia amakaifena mage huno Anumaya Koti avopina humaineane
“Veamogatama kefo kavama haya kavala Anumaya Kotia ago aigetamateno atalelamateneafe muse hiho. Kefo yama haya kavala ago ayehami-taleneafe muse hiho. 8 Anumayamoa nago kanomo humainea kefo yafena havino oamino age kanitesiana ani kanomoa muse hugahie.” huno humaineane.
9 Amaugafa laga humainaya Yuta vayafekeya ani musena hisae huno nehio? Aao, amaugafa laga ohunesaya veanene ania huya musena hugahae. Apalahamufe tagesa havisune. Anumaya Kotia Apalahamufena “Naa kavala hugategahue.” huno hulokiya vaimalenea kehena “Tamage hananagika ania hunategane.” huno agupi maleno ametiti humainea yateti Anumaya Kotia “Fatago kano mainane.” huno hutene. 10 Apalahamua hanaa huno mainegeno Anumaya Kotia “Fatago kano mainane.” huno hutene? Agoya anoya laga hutegeno huteneo? Aao, laga ohunea kanafi ani kea huteneane. 11 Hagoteno augafa laga ohuneno Anumaya Koti kea havino agupi maleno ametitia humainea yateti Anumaya Kotia “Fatago kanoa mainane.” hunoma hutenea yafema veamoya havisaya yafe augafa laga humaine. Ani yafe mukiamoya amaugafa laga ohuneya Apalahamuma humainea kava huya Anumaya Kotife haviya amakupi maleya amametiti humainaya yateti “Fatago veane mainae.” huno humatenesia veamoya Apalahamuna aginagomoya mainae. 12 Mainagi nagoa veamoya amaugafa laga humainayanagi ani kavakeyama ohayana Apalahamuma augafa laga ohunea kanafima humainea kava huya Anumaya Kotife haviya amakupi malenaya kavaene humainaya veamogami totoamimo maine.
Anumaya Kotia hulokiya vaimalenea kemoa agaifema haviya amakupi malenaya veafeke humaine.
13 Anumaya Kotia Apalahamuene aginagomoenefe mage huno humaineane “Mukia ma mopagefa kava yagaisayafe tamamigahue.” huno hulokiya vaimalene. “Kahegi kemona akave maletesagena tamamigahue.” huno ohunegi “Tamakaya Anumaya Kotife havitama lamakupi malagena ‘Fatago veani mainae.’ huna hulamatoafe tamamigahue.” huno humaineane. 14 Kahegi kema akave nemalaya veamoya alileasina haviya amakupi nemalaya yamoa afa ya kana higeno hulokiya vai-malenea kemoa falote ohileasine. 15 Kahegi kemoa Anumaya Kotina hai vaigeno anonaa nelamianagi kahegi kema omalesina “Ago ali neatagaune.” huya ohaleasine.
16 Anumaya Kotia hulokiya vai-malenea kemoa kayone nehia yamaaleti falote hisiafeene mukia Apalahamuna aginagomoya alisaya yafeene “Agaife haviya amakupi maleya amametiti humainaya yateti aligahae.” huno humaine. Kahegi kema akave nemalaya veamoyage oaligahagi taginagomoa, Apalahamuma, ametiti humainea kava hisuna veamogatina Apalahamua nealafa maine. 17 Mage huya Apalahamufena kae-malenayane
“Kagaya mukia kotega veamogamina totoamimoga maigane.” huya kae-malenayane.
Apalahamua Anumaya Kotife havino agupi maleno ametiti humaineafe Anumaya Koti aulagalela tototimo maine. Anumaya Kotia falimainaya veala eteno hamaimula neamamino falote ohunea yamofena “Falote huo.” huno higeno falote humainea kano maine.
Apalahamua kanaleya huno Anumaya Kotifena havino agupi malene.
18 Apalahamua ani kehena havino ametitia hianagi nafanema atesia kanaamoa ago hano humainea yafena agesa ohavinegi “Mukia kotega veamogamina totoamimoga maigane.” huno humainea kele ametiti humaine. 19 Ani kanafina Apalahamua vani hataletia (100) kafu ago hano hutegeno kolamoa ago hau higeno nafane atesia tokiyaa omalegeno aamoenena namo a mainea yafena tole agesa ohavinegi tokiyaage huno Anumaya Kotife havino agupi maleno ametitia humaine. 20 Anumaya Kotia “Hugategahue.” huno humainea kehena “Namisio onamisio?” huno tole agesa ohavinegi Anumaya Koti agia alisaga nehuno havino agupi maleno ametiti hia yamoa alakefa humaine. 21 “Hugategahue huno humainea yana namigahie.” huno agesa havilama humaine. 22 Naa humaineafe Anumaya Kotia “Fatago kanoa mainane.” huno hutene. 23-24 “Anumaya Kotia ‘Fatago kanoa mainane.’ huno hutene.” huno kae-malenea kea agaiagefekeyana ohunegi tagaienefe mani kea humaineane. Tagaya “Anumaya Kotia Yisasi Kalaisina falimainefiti alino hetitenea kano maine.” huta havita lagupi maleta tametiti hunageno “Fatago veanea mainae.” huno hulatene. 25 Anumaya Kotia Yisasina kefo yatia ayehami-talesiafe hutegeno me falimaine. Faliteno tagaifena “Fatago veaneniae.” huno hulatenea kemona tokiyaage huno hanesiafe Anumaya Kotia Yisasina fali-mainefitila ali hetitene.