2 THESSALONIANS
Di Lua Lede a Paul ang gi di Nohongo Dabu i Thessalonica
Di haga modongoohia:
Tee donu gi di lua hanimoi o Christ le e hana hua i golo i lodo di nohongo dabu i Thessalonica, gu haga hinihini nia daangada.
Di lua lede a Paul ang gi di Nohongo Dabu i Thessalonica le e helekai i di hagadonu o nia daangada o di nohongo dabu, ala e hai bolo di laangi dela e hanimoi ai Christ la guu lawa di hanimoi. Paul gu hagadonu gii donu di maanadu deenei, bolo i mua di lua hanimoi o Christ, gei nia huaidu o nia daangada, la koia ga huaidu huoloo, e dagi go tangada dela e haga ingoo bolo “Di Hagadaumee o God”, dela e hai baahi gi Christ.
Paul e agoago maaloo ang gi di nohongo dabu i Thessalonica bolo digaula gi mau dangihi gi nadau hagadonu, ma e aha maa digaula gaa tale gi nia haingadaa be nia hagaduadua. Digaula gi hai hegau hua be Paul mo ono ehoo gau hai hegau, digaula gi daudali hua beelaa nadau hegau humalia.
Di hagahonu di beebaa deenei:
Di haga modongoohia (1.1-2)
Di hagaamu mo nia haga modongoohia (1.3-12)
Di haga modongoohia di hanimoi o Christ (2.1-17)
Di aago di hai o di mouli o nia dama a Christ (3.1-15)
Di hagaodi di lede deenei (3.16-18)
1
Mai baahi o Paul, Silas, mo Timothy, ang gi di nohongo dabu i Thessalonica, dela gu hai mee ginai tadau Damana go God, mo tadau Dagi go Jesus Christ:* Nnegau 17.1


Di waahale go Thessalonica
God Tamana mo tadau Dagi go Jesus Christ gi gowadu gi goodou tumaalia mo di noho i di aumaalia.
Di hagi aga i di hanimoi o Christ
Madau duaahina nei, gimaadou e hai loo gi danggee gi God i nia madagoaa huogodoo i goodou. E donu belee hai go gimaadou beelaa, idimaa, godou hagadonu mo hagadau aaloho la gu tomo aga. Deelaa di mee e hagaamu ai goodou go gimaadou i lodo nia nohongo dabu a God. Gimaadou e hagaamu godou manawa hagakono, hagadonu, mo hagaduadua mono haga mmaemmae huogodoo ala ne tale adu gi goodou.
Nia mee huogodoo aanei, le e haga modongoohia bolo di hagi aga a God le e donu, idimaa, di hagaodi gi muli o nia mee aanei, gei goodou gaa tau di ulu i Teenua King o God, dela e duadua ginai goodou. God gaa hai laa di mee dela e donu, e hagaduadua digau ala e hagaduadua goodou. Mee ga haga dagaloaha goodou ala e noho i lodo nia hagaduadua, mo gimaadou. Mee gaa hai di mee deenei i di madagoaa Jesus ma ga haneia i di langi mo* mo be: madalia ana gau di langi maaloo dangihi, mo di ulaula di ahi, e hagaduadua digau ala e haga de iloo a God, mo digau ala hagalee daudali di Longo Humalia o tadau Dagi Jesus. Digaula ga hagaduadua gi di hagaduadua e dee odi, gaa wwae gi daha mo Tagi mo nia madamada ono mahi,* Isaiah 2.10 10 i di laangi ma ga hanimoi iei Mee belee hagamadamada go ana daangada huogodoo, mo di hagalaamua go digau huogodoo ala gu hagadonu. Goodou ga madalia digaula, idimaa, goodou gu hagadonu madau helekai ala ne hagi adu gi goodou.
11 Deelaa di mee e dalodalo ai gimaadou i nia madagoaa huogodoo i goodou. Gimaadou e dangi ang gi God gi haga dohu ina goodou ang gi dono mouli dela ne gahi ginai goodou gi mouli ai. God gi heia goodou gii mee di haga kila aga godou hiihai humalia mai i ono mahi, ge gi hagangudu ina gi muli godou hegau i di hagadonu. 12 Deenei di godou hai e haga madamada ai di ingoo o tadau Dagi go Jesus, gei Mee e haga madamada labelaa goodou, mai i tumaalia o tadau God mo tadau Dagi go Jesus Christ.

*1.1: Nnegau 17.1

*1.7: mo be: madalia

*1.9: Isaiah 2.10