LAMENTATIONS
Taahili Manawagee Hagadagadagagee
Di haga modongoohia:
Taahili Manawagee Hagadagadagagee la nia daahili e lima ala e helekai manawa gee gi di mooho o Jerusalem i di ngadau 586 i mua o Christ, mo di haadanga balua o nia daangada ala mai i di mooho deelaa mo nadau hagabagi gi daha mo nadau henua. Di lodo huaidu huoloo dela ne haga honu di beebaa deenei, gei di mee mada hagalabagau la taahili hagadagadagagee ang gi Dimaadua i lodo di haingadaa (3.22-47), mo di hagadagadagagee gi di madagoaa dela e hanimoi.
Digau o Jew e hai hegau gi nia daahili aanei nia ngadau huogodoo i nadau daumaha i nadau laangi hagaonge mo di manawa gee e haga langahia ai di mooho o nadau guongo i di ngadau 586 i mua o Christ.
Taahili deenei le e hai nia gubu e madalua maa lua i lodo nia mada e 1, 2, 4, mo 5. Nia gubu dagi dahi i lodo nia mada e 1, 2, 4 e daamada i di leder e dahi o di aiu Hebrew. Nia gubu e dolu i di mada e 3 e daamada i nia leder o di aiu Hebrew. Telekai Hebrew la nia leder e madalua maa lua. Tadinga o di mee deenei bolo gi haga modongoohia taahili deenei le e hagi anga nia mee huogodoo ala e mee di daahili i di hai o di manawa gee mo di hagadagadagagee i lodo di haingadaa la i lodo nia mada e lima aanei.
Di hagahonu di beebaa deenei:
Nia manawa gee o Jerusalem (1.1-22)
Di hagaduadua a Dimaadua ang gi Jerusalem (2.1-22)
Taahili manawa gee (3.1-21)
Taahili hagadagadagagee (3.22-42)
Taahili manawa gee (3.43-66)
Jerusalem i muli dono mooho (4.1-22)
Talodalo gi dumaalia (3.1-22)
1
Nia manawa gee o Jerusalem
xalephx Aleph
E haga manawa gee idimaa gu deai digau i Jerusalem ai,
di waahale dela nogo dogologo ono daangada i mua!
Henuailala hagatau nogo hagalaamua a mee i mua,
dolomeenei guu hai gadoo be di ahina guu made dono lodo.
Di waahale dela koia e aamua guu hai di hege dolomeenei.
 
xbethx - Beth
Mee e dangidangi i di boo hagatau,
ono golomada e halidangi gi lala i dono gili.
Deai dono ehoo mai mua i dono baahi ai
belee haga manawa lamalia a mee.
Ono ihoo hagaaloho guu buhi gu hai baahi gi mee.
 
xgimelx - Gimel
Digau Judah guu hula gi daha mo nadau gowaa donu,
guu noho i lodo di haingadaa mo di mouli hege.
Digaula guu noho i nnuai gowaa, gu deai di gowaa e mee
di haga ingoo bolo di gowaa donu ni digaula ai.
Nadau hagadaumee gu daabui digaula,
gu deai di gowaa e mee di lellele hagammuni ginai ai.
 
xdalethx - Daleth
Digau e hula gi di Hale Daumaha ai
belee hai nadau daumaha i nia laangi dabu.
Nia dama ahina ala nogo dadaahili i mua
la guu noho i lodo nadau hagaduadua,
gei ogo digau hai mee dabu gu tangitangi mo di manawa gee.
Nia ngudu nia bontai o di waahale nadau daangada ai,
gei Zion guu noho i lodo di manawa hagammaemmae.
 
xhex - He
Ono hagadaumee gu aali,
gei mee guu noho i lala nadau mogobuna.
Dimaadua gu hagaduadua a mee,
idimaa mee guu hai ana hala e logo.
Nia dama a maa guu kumi guu lahi gi daha.
 
xwawx - Waw
Di madamada o Jerusalem gu hagalee.
Nia dagi o maa guu hai be nia ee ma ga hiigai ga paagege.
Nia mahi digaula gu hagalee i di madagoaa
digaula e llele gi daha mo digau puu manu.
 
xzayinx - Zayin
Jerusalem gu ongeonge dolomeenei,
gu hagalee madamada be di maa i mua,
gei mee gu langahia dono madamada
dela i mua dono kumi go ono hagadaumee,
deai tangada e hagamaamaa a mee ai,
ono hagadaumee gu gadagada gi dono doo.
 
xhethx - Heth
Dono hagalaamua gu hagalee,
gu ono goloo ai, gu haga huaidu.
Mee gu manawa gee, guu pono ono golomada idimaa mee gu langaadia.
Jerusalem guu bida haga gulugulua ia gi nia huaidu.
 
xtethx - Teth
Ono gulugulua gu modongoohia hagammaa,
gei mee e dehei eia nia mee ala gaa tale ang gi deia.
Dono doo gi lala e huaidu,
idimaa tangada e haga manawa lamalia a mee ai.
Ono hagadaumee gu aali,
gei mee gu dangidangi gi Dimaadua gi dumaalia ang gi deia.
 
xyodhx - Yodh
10 Ono hagadaumee gu gaiaa ono goloo hagalabagau huogodoo.
Mee gu gidee ia di nadau ulu gi lodo di Hale Daumaha,
di gowaa dela guu bule go Dimaadua
bolo digau tuadimee gi dee ulu gi lodo.
 
xkaphx - Kaph
11 Ana daangada gu tangitangi mo di manawa gee
i nadau madagoaa e halahala nadau mee e gai.
Digaula gu koodai nadau goloo hagalabagau
gi nia meegai bolo gi mouli ai ginaadou.
Di waahale e dangidangi boloo,
“Meenei Dimaadua, mmada mai gi di au,
gi gidee Goe dogu haingadaa.”
 
xlamedhx - Lamedh
12 Mee e dangidangi gi digau ala e hula laalaa i dono baahi boloo,
“Mmada mai gi di au, deai tangada guu mmae
be di mmae deenei i di au ai,
go di mmae a Dimaadua ne gaamai gi ogu nua
i di madagoaa o dono hagawelewele.
 
xmemx - Mem
13 “Mee ne hagau eia dana ahi i di langi,
di ahi dela ne dudu ogu lodo.
Mee ne gaamai dana hele i ogu mua
gi hinga au gi hongo di gelegele,
gei Mee gaa hudu au gi daha gi lodo di mmae dee odi.
 
xnunx - Nun
14 “Mee gu hagailongo ogu huaidu huogodoo,
guu nnoo gi di gowaa e dahi,
gu daudau gi dogu uwa,
gei au gu daamaha gu hagalongo gee.
Dimaadua guu wanga au gi ogu hagadaumee,
dela ga deemee iei au di duu aga
e hai baahi gi digaula.
 
xsamekhx - Samekh
15 “Dimaadua gu gadagada gi agu gau dauwa ala koia e maaloo,
gu hagau ana gau dauwa belee hagahuaidu agu dama daane,
gu dagadagahi agu daangada be nia ‘grape’ i di gowaa dagadagahi waini.
 
xayinx - Ayin
16 “Deenei tadinga ogu golomada ala e halidangi.
Tangada e haga manawa lamalia au ai,
tangada e hai au gii mahi ogu lodo ai.
Ogu hagadaumee gu aali i di au,
gei ogu daangada nadau mee e dubu ai.
 
xpex - Pe
17 “Au guu holo ogu lima gi daha,
gei tangada e hagamaamaa au ai.
Dimaadua gu gahigahi ogu hagadaumee
gi hai baahi mai gi di au mai i nia gowaa huogodoo.
Digaula guu hai au be di mee gulugulua.
 
xtsadhex - Tsadhe
18 “Gei Dimaadua le e donu,
gei di maa ko au dela gu de hagalongo gi Mee.
Hagalongo mai gi di au, goodou go nia henua huogodoo,
mmada mai gi dogu hagaduadua nei.
Agu dama daane mo agu dama ahina huogodoo
gu lawalawa, guu lahi gi daha.
 
xqophx - Qoph
19 “Au gu gahigahi ogu ihoo,
gei digaula hagalee hiihai e hagamaamaa au.
Digau hai mee dabu, mo nia dagi
guu mmade i hongo nia ala o di waahale
i di nadau halahala nadau meegai belee hagamouli ginaadou.
 
xreshx - Resh
20 “Meenei Dimaadua, mmada mai gi dogu mmae huoloo,
au gu huaidu ogu lodo!
Ogu lodo gu daamaha huoloo gi ogu huaidu.
Taaligi dangada guu hai i hongo nia ala,
di made hogi gu i golo i lodo nia hale.
 
xshinx - Sin ma Shin
21 “Hagalongo mai gi dogu lee manawa gee,
tangada e haga manawa lamalia au ai.
Ogu hagadaumee gu tenetene gi do gaamai di haingadaa deenei.
Gaamai gi di au di laangi dela gu hagababa Kooe,
hagaduadua ina ogu hagadaumee
be dau hai dela nogo hai mai gi di au.
 
xtawx - Taw
22 “Haga huaidu ina digaula
idimaa digaula ala nogo haihai nia mee huaidu.
Hagaduadua ina digaula be dau hai
nogo hagaduadua au i ogu huaidu.
Au gu manawa gee huoloo i lodo ogu haingadaa,
gei au guu magi i lodo dogu manawa.”