Ri carta ri tz'iban can chique ri kach'alal ri e Hebreos
1
Ri Dios ja ri Ruc'ajol ri xrucusaj richin xuk'alajirisaj ri ruch'abel
Ojer-ojer can, q'uiy c'a bey xch'on ri Dios quiq'uin ri kati't-kamama'. Y tok xch'on quiq'uin, xerucusaj c'a ri achi'a' ri yek'alajirisan ri ruch'abel. Y richin xuk'alajirisaj ri ruch'abel chique ri achi'a' ri', q'uiy rubaniquil ri xrucusaj. Jac'a chupan re tiempo ojc'o-vi roj, ri ruq'uisibel tiempo richin re ruvach'ulef, ri Dios can ja ri Ruc'ajol ri xrucusaj richin xuk'alajirisaj ri ruch'abel chikavech. Ri Dios pa ruk'a' c'a ri Ruc'ajol xuya-vi ronojel. Y pa ruk'a' chuka' ri Ruc'ajol xuya-vi richin xuben re ruvach'ulef y ronojel ri c'o. Riq'uin ri Ruc'ajol nik'alajin ri ruk'ij-ruc'ojlen ri Dios. Ri Ruc'ajol can junan riq'uin rija'. Y jac'a ri C'ajolaxel ri uc'uayon richin ronojel ri c'o; riq'uin ri ruchuk'a' ri ruch'abel ruchapon-vi. Y rija' xquen (xcom) richin xrelesaj ri kamac; y xc'astej. Y xbetz'uye' chila' chicaj pa rajquik'a' ri nimalej Dios.
Ri Ruc'ajol ri Dios más ruk'ij que chiquivech ri ángeles
Ri Ruc'ajol ri Dios c'o más ruk'ij que chiquivech ri ángeles. Y roma ri samaj ri xuben rija', ri Dios xunimirisaj ruk'ij. Y chuka' ri rubi' rija' can más vi nim rejkalen que chuvech ri bi'aj ángel. Can ketaman-vi chi janíla ruk'ij, roma ri Dios man jun bey rubin ta chire jun ángel:
Ja rat ri Nuc'ajol.
Romari' ninya' ac'aslen. Y chuka' man jun bey rubin ta chirij jun ángel:
Ja rija' ri Nuc'ajol
y ja yin ri Rutata'.
Man jun bey rubin ta queri' chirij jun ángel. Y tok ri Dios xutek-pe ri Ruc'ajol chuvech re ruvach'ulef, can xk'alajin-vi chi c'o ruk'ij, roma xubij chique conojel ri ru-ángeles:
Tiya' ruk'ij ri Nuc'ajol.
Chiquij c'a ri ángeles xaxe nubij:
Ri nu-ángeles janíla yebiyin chubanic ri nusamaj,
roma ninben chique chi e achi'el ri cak'ik' y e achi'el ri ruxak-k'ak'.
Jac'a chire ri Ruc'ajol, roma ri c'o ruk'ij, can nubij-vi chire:
Dios, rat can richin vi jantape' xcak'aton tzij,
y choj c'a ri ak'atbel-tzij ri'.
Avajovan c'a ri chojmilal y avetzelan ri etzelal.
Y romari' yin ri a-Dios nuyo'on quicoten pan avánima.
Más quicoten nuyo'on chave rat que chuvech ri quicoten ri nuyo'on chique ri ch'aka' chic.
10 Y chuka' ri Dios xubij chire ri Ruc'ajol:
Ajaf, rat xaben ri ruvach'ulef pa rutiquiribel pe,
y xaben chuka' ri caj.
11 Ri ruvach'ulef y ri caj xqueq'uis.
Jac'a rat man jun bey xcaq'uis ta.
Ri ruvach'ulef y ri caj xa can xquerijix,
achi'el yerijix ri tziek.
12 Ri ruvach'ulef y ri caj can xque'ajel c'a,
achi'el niban chire ri tziek ri man utz ta chic.
Ri caj can xtabot c'a el.
Jac'a rat man jun bey xcajalatej.
Man jun bey xtiq'uis ta ri ac'aslen.
Queri' xubij ri Dios.
13 Y ri Dios man jun bey xubij ta chire jun ángel:
Catz'uye' pa vajquik'a',
y xquenya' pan ak'a' ri ye'etzelan avichin, xcha' ri Dios.
14 Ri ángeles can choj c'a e rusamajela' ri Dios. Y je rije' ri yetak roma ri Dios richin yequito' ri e colotajinek.