MATIU
Matiu Khergi Kaman Vhuuŋ
Khe fharav ganɨnga buni khare.
Matiu khergi kaman vhuuŋ ana mba fethɨgi gavir ana fharigi gap ana Zisas kha nuianan kim, ana hɨgi bigi ana nta neŋgegi gap ma. Kha gap ana fharav, Maria Zisas tɨr za mbuim, hɨgi bigi neŋgap vov, mbe Zisas shogim, ana rimgiap, taagia khavgiap, won ŋaara gumgi thav taagia Hevenan ndagi ne phorgap neŋgegi.
Matiu nza khɨr za mbui bigɨna bakɨme khare. Ana Zisas Fhe Bakɨme fhum muun zav ana suaŋgi kameŋ, ana guigira ne zɨra vugi. Mbe fhum ana muunga kameŋ mbe ne khergim, ne Fhe Bakɨme suaŋgi kaman vureŋ ki gavar ki. Fhe Bakɨme suaŋgi kaman vureŋ ki gavar ki. Fhe Bakɨme fhum kha kameŋ suaŋgi, ana guma the sararim, ana zirɨv taagip Isreriŋ ndigɨrga. Kha gap ana khuen nza khɨr za mbui, Zisas ana mba suaŋgi guma ma. Kha gap Matiu anan ŋani vhɨrvera khuen nza khɨvigi, Zisas ana Fhe Bakɨme suaŋgi kameŋ zɨn vo muuŋgi bigi Fhe Bakɨmen Proferi mbe fhum ana nzuav khergi buni ana guigira mba buni zɨn vugi. Ndu Matiu 1.22-23 thɨgɨri. Ndu vhɨra 2.4-6 thɨgɨri. Ndu vhɨra 2.14-15 thɨgɨri. Ndu vhɨra 2.23 ganɨv, sapta 4.13-16 thɨgɨri. Ndu 8.16-17 thɨgɨri. Ndu vhɨra 12.15-21 thɨgɨri. Ndu vhɨra 13.34-35 thɨgɨri, 21.2-5 thɨgɨri. Ndu vhɨra 21.16 ganɨri, ndu vhɨra 16.24 gangiri, ndu vhɨra 26.31 ganɨri. Ndu vhɨra 26.54 ganɨri. Ndu vhɨra 27.6-10 thɨgɨri.
Harigi bigɨna bakɨmen Matiu khergi gap ne nzuai ne khare. Matiu Fhe Bakɨme wo gumgi gu mbigi garim, mbe ana piin ki ŋgu gum Fhe Bakɨme wo gumgi gu mbigi garim, mbe ana piin ki ntɨɨri ga nzuai. Ana Zisas ŋgarigi ŋaarar panan Fhe Bakɨme ŋgui vhɨrve gari guman pan kɨv ana za kha gumgi gu mbigi ganɨrim, kha gumgi gu mbigi, mbe za ana vuzvuga zɨn ŋgɨrga.
Kha Matiu khergi gavar, meeŋthɨgi ŋaniven Zisas bun suaŋgi buni mpeeiŋ ki. Mba fharigi buna mpeeŋ ne 5.7 ki. Mba buni Zisas mbɨkshɨm mben kav mba buni suaŋgi. Mba buni nta Fhe Bakɨmen gumgi gu mbigi guari ki gumgi gu mbigi mbui tɨv ma. Mba fharigi bun mpeeŋ thɨgi buna mpeeŋ ne sapta 10 ki. Mba bunin Zisas wo farasegi 12 thɨgi ŋaara gumgi ga nzuai, mbe ana ntan mbe nzuai.
Mba buna mpuani thɨgi buna mpeeŋ ne sapta 13 ki. Mba buna mpeen Zisas Fhe Bakɨme wo gumgi gu mbigi garim, mbe ana piin ki ntɨɨri mba gumgi gu mbigi khɨvav, ana ana vhunama si bunin mbe nzuai. Mba fethɨgi buna mpeeŋ ne sapta 18 ki. Mba buna mpeen Zisas guigira wo phorgɨp rurga gumgi gu mbigi guari muunga tɨva nzuai. Mba meeŋthɨgi buna mpeeŋ ne sapta 24 kega vov sapta 25 vugi. Mba buna mpeen Zisas taagi kha nuianan zirɨrga tuk han mbararga, ana mba mpuu rarivigen hɨrga bigi ga nzuai.
Kha gap ana khergi guma ana tuituigiap ana bun nzuai fhuvara. Kha gap kha zɨ ana ki, ana khaŋ nzuai, Matiu khergi kaman vhuuŋ. Maaŋ muuŋgiap, mbe kha ndɨkndɨga mbui. Matiu mba ŋkɨɨa ndia ruigi guma. Ndu Matiu 9.9-13.
Zisas kha nuianan hɨgi.
1
Khe Zisasan nzɨgi zɨri khare.
Ruk 3.23-38
Stt 22.18; 1 Sto 17.11Khe Zisas Krais nzɨgi bun nzuai buni khare. Zisas ana Devitan nzɨk ma. Devit ana Abrahaman nzɨk ma.
Abraham Aisak tegi, Aisak Zekop tegi. Zekop Zuda gum ntogi tegi. Stt 38.29-30; Rut 4.18-22Zuda Peres gu Sara tegi, mani niamuuŋ, ana Tamar tegi. Peres Hesron tegi. Hesron Ram tegi. Ram Aminadap tegi. Aminadap Nason tegi. Nason Sarmon tegi. Sarmon Boas tegi, ana niamuuŋ Rahap. Boas Obet tegi. Obet niamuuŋ Rut ma. Obet Zesi tegi. 2 Sml 12.24Zesi Devit tegi. Ana Devit tegim, ana ŋgui vhɨrve gari guman pan kegi.
Devit, ana Soromon tegi. Soromon tegi niamuuŋ, ana fhum Uria ga tɨga kegi. 1 Sto 3.10-16Soromon Rehoboam tegi. Rehoboam Abiza tegim, Abiza Asa tegi. Asa Zehosafat tegi. Zehosafat Zehoram tegi. Zehoram Usia tegi. Usia Zotam tegim, Zotam Ahas tegi. Ahas Hesekia tegi. 10 Hesekia Manase tegi. Manase Emon tegi. Emon Zosaia tegi. 11  2 Kin 24.14-15; 1 Sto 3.15; 2 Sto 36.10; Jer 27.20Zosaia, ana Zehoiakin gu ntogi tegi. Mba tugen Babironiŋ Isreriŋ shogap mbe ndiga Babironan vegap, mbe ndim bɨna suegim, mbe fhura mben ŋaara gumgi ki.
12  Esr 3.2Mba Isreriŋ Babironan bɨnan ki tuge thɨgap, zav, Zehoiakin Seartier tegim, Seartier Serubaber tegi. 13 Serubaber Abiut tegi. Abiut Eriakim tegi. Eriakim Asor tegi. 14 Asor Sadok tegim, Sadok Akim tegi. Akim Eriut tegi. 15 Eriut Ereasar tegim, Ereasar Matan tegi, Matan Zekop tegi. 16 Zekop Zosep tegi. Zosep Maria man ma.
Maria, ana Zisas tegi. Zisas mbe vhɨra kha zɨn ana kaai, Krais, ana Fhe Bakɨme taagip kha nuianan ki gumgi gu mbigi ndir zav farasarigi guma ma.
17 Maaŋ muuŋgiap, Abrahaman nzɨgi, mbe zav Devit thɨgi, mbe phɨk bavira fethɨgi. Devitan kegap zav, mbe Isreriŋ Babironiŋ mbe shogap, mbe ndiga vov bɨna suegi tugen, Devita nzɨgi vhɨra phɨk bavira fethɨgi. Mbe Babiron bɨnan kav, fhura Babironin ŋgari tugen kega zav, Krais kha nuianan hɨgi tugen, mbe nzɨgi vhɨra phɨk bavira fethɨgi.
Maria Zisas Krais tegi.
Ruk 2.1-7
18  Ru 1.27; 1.35Khe Zisas Krais kha nuianan hɨgi ne neŋgi buni khaŋ muuŋgi. Ana niamuuŋ Maria, mbe Zozevan rɨgɨr zav ana ndi fagi. Mbe ana ndi fagim, mani wani ga tɨgi fhuvara. Mbe garim, Maria ndave rɨgi. Fhe Bakɨmen Ŋina Ŋaar nduara mba tarar Maria ndava sarigim, Maria mba tara ndavar ki. 19  Lo 24.1Ana man Zosep, ana tɨvir vhuuiŋra zɨn vui guma ma. Maaŋ muuŋgiap, ana Maria mbararagim, ana ndavar kim, ana ana thamthar za mbui. Ana Maria thamthar za mbuav, ana vhɨra mba gumgi gu mbigi nɨman memɨrar Marian nɨɨngeŋ vuzvugi fhuvara. Ana maaŋ muuŋgiap nimra ana thamthar za mbui. 20 Zosep ana thamthar zav wo ndav vhera mba ndɨkndɨga mbuav ki. Ana mba ndɨkndɨga mbuav kim, maan Fhe Bakɨme enser mbe rɨman ana kharigi. Ana rɨman ana kharav khaŋ ana nzuai, “Zosep, Devitan nzɨk, ndu Marian rɨgɨrgen rɨvɨ thari. Ndu mbarara! Maria ndavar ki tar, Fhe Bakɨmen Ŋina Ŋaar nduara mba tarar ana ndava vhee sarigi. 21  Ru 1.31; 2.21; FG 4.12; 13.23; 13.38Ana mba ŋguga ruagirim, ndu kha zɨn mba tara tɨgɨri, Zisas. Ne khaŋ muuŋgi, mba tar, ana won gumgi gu mbigi muuŋgi tɨvi mbatɨgi vhɨzɨv, taagi mbe ndirga.”
22 Mba bigi maaŋ muuŋgip hɨgɨp, mba Fhe Bakɨme kamthooŋ guma fhum suaŋgi bunira zɨn ŋgɨgɨrga. Fhe Bakɨme kamthooŋ guma fhum khaŋ suaŋgi, 23  Ais 7.14“Nde mbarara! Mbigar kama the, ana guma the ndiga kegi fhu, ana ndava rɨgɨp, ŋguga the ruagirga. Ana mba ŋguga ruagirga, mbe kha zɨn ana tɨgɨrga, Emanuer.” Mba zɨ nɨɨngeŋ khaŋ nzuai, Fhe Bakɨme nza phorga ki.
24 Zosep mba rɨma kuigap, mɨtimanera khavgiap, ana mba Guma Bakɨme enser ana suaŋgi kameŋra zɨn vugi. Ana mba kameŋ zɨn vov won muuŋ Maria ga tɨgi. 25  Ru 2.7; 2.21Zosep Maria ga tɨgap, ana ndiga wo phenan vugap, ana gura Maria phorga kui fhuvara. Ana fhura ana phorga kav kim, Maria mba ndavar ki ŋguga ruagi. Maria mba ŋguga ruagim, ana kha zɨn ana tɨgi, Zisas.

1:1 Stt 22.18; 1 Sto 17.11

1:3 Stt 38.29-30; Rut 4.18-22

1:6 2 Sml 12.24

1:7 1 Sto 3.10-16

1:11 2 Kin 24.14-15; 1 Sto 3.15; 2 Sto 36.10; Jer 27.20

1:12 Esr 3.2

1:18 Ru 1.27; 1.35

1:19 Lo 24.1

1:21 Ru 1.31; 2.21; FG 4.12; 13.23; 13.38

1:23 Ais 7.14

1:25 Ru 2.7; 2.21