Surat kasi orang
Ibrani
yang baru parcaya sang Yesus Kristus
deng kasi tenga dong pung nene-moyang pung agama
1
Tuhan Allah su kirim Dia pung Ana yang lebe hebat dari Dia pung jubir lama dong
1 Dolu-dolu Tuhan Allah pake Dia pung jubir dong, ko omong deng kotong pung nene-moyang orang Ibrani.* a: Kata Ibrani ni, nama laen kasi bangsa Yahudi. Orang Yahudi yang parcaya sang Yesus Kristus, orang subu bilang, “orang Kristen Ibrani”, tagal dong su laen dari dong pung sodara Yahudi yang masi pegang atoran agama Yahudi yang lama. Dia pake cara macam-macam ko omong banya kali deng dong.† b: Tuhan Allah kasi tau Dia pung pasán dong, deng pake cara macam-macam. Conto ke: Dia kasi tau sang Abraham pake janji, sang Musa pake atoran agama, sang Daud pake lagu puji, sang Yeremia pake umpama. 2 Ma sakarang Dia su kirim Dia pung Ana, ko omong langsung deng kotong.
Dari mula-mula, Tuhan Allah su pili ame Dia pung Ana,
ko parenta sama-sama deng Dia.
Waktu Dia bekin ame langit deng bumi, deng dia pung isi samua-samua,
Dia pung Ana ni ju ada bekin sama-sama deng Dia.
3 Tuhan pung Ana ni, kasi tunju Dia pung Bapa pung hebat,
sama ke matahari pung sinar yang tapontas dari carmín.
Te Dia satu model parsís ke Dia pung Bapa.
Deng dari Dia pung Kata-kata yang hebat,
Dia kasi jalan samua yang ada di langit deng di bumi.
Dia ju buka jalan,
ko hapus buang orang pung sala-sala dong,
ko biar dong jadi barisi.
Ais Dia pulang pi sorga,
ko dudu di Tuhan Allah pung sablá kanan,
di tampa yang paling hormat.
Tuhan Allah pung Ana paling hebat, lebe dari ana bua di sorga
4 Tuhan Allah pung ana bua di sorga memang hebat. Ma Dia pung Ana yang paling hebat, lebe dari dong samua. Tuhan Allah pung pangkat, paling tinggi. Deng Dia su kasi Dia pung pangkat sandiri sang Dia pung Ana. Andia ko Dia pung Ana, lebe tinggi dari ana bua di sorga dong.
5 Tuhan Allah parná omong sang Dia pung Ana bilang,
“Ini hari, Beta angka sang Lu ko pegang parenta.”✡ Lagu Puji dong 2:7
Tuhan Allah ju omong bilang,
“Beta ni, Dia pung Bapa.
Deng Dia tu, Beta pung Ana.”✡ 2 Samuel 7:14; 1 Sajara Israꞌel deng Yahuda 17:13
Tuhan Allah omong memang bagitu soꞌal Dia pung Ana, ma Dia sonde parná omong bagitu soꞌal Dia pung ana bua di sorga.
6 Waktu Tuhan Allah kirim datang Dia pung Ana yang paling hebat, Dia ju parenta Dia pung ana bua di sorga bilang,
“We! Ana bua dong!
Bosong musti pi kasi hormat,
deng sémba sang Beta pung Ana doo!”✡ Carita Ulang soꞌal Jalan Idop 32:43; Lukas 2:13-14
7 Tuhan Allah ju omong soꞌal Dia pung ana bua di sorga bilang,
“Beta bekin Beta pung ana bua di sorga dong,
jadi kincang sama ke angin.
Beta bekin Beta pung hamba dong,
jadi sama ke api.”✡ Lagu Puji dong 104:4
Tuhan Allah omong bagitu, tagal dong tu, cuma Dia pung tukang suru-suru sa.
8 Ma Dia omong laen lai kasi Dia pung Ana sandiri bilang,
“Lu ni, Tuhan Allah.
Lu nanti dudu di korsi parenta sampe salamanya.
Lu nanti pegang kuasa ko parenta deng hati lurus.
9 Lu pung hati sanáng lia orang yang idop lurus.
Ma Lu pung hati susa lia orang yang idop pakaneꞌo.
Andia ko Lu pung hati sanáng,
ko Beta poꞌa minya di Lu pung kapala,
ko angka sang Lu jadi Raja lebe dari yang laen dong.”✡ Lagu Puji dong 45:7-8
10 Tuhan Allah ju omong sang Dia pung Ana bilang,
“Ana, ó!
Lu ni, Bos yang su parenta memang dari dolu.
Lu ni, yang suru ko langit ada memang.
Lu ni, yang parenta ko bumi jadi memang.
11-12 Nanti langit deng bumi puruk buang.
Nanti langit deng bumi ilang buang.
Ma Lu sandiri idop tarús-tarús.
Nanti Lu angka buang langit deng bumi,
sama ke orang angka buang pakean puruk.
Nanti Lu ganti langit deng bumi,
sama ke orang ganti pakean baru.
Ma Lu sandiri sonde bagitu.
Tagal Lu idop sampe salamanya.”✡ Lagu Puji dong 102:26-28
13 Tuhan Allah ju omong sang Dia pung Ana bilang,
“Ana, é!
Mari dudu sini, di tampa paling hormat,
di Beta pung sablá kanan ni.
Nanti Beta bekin sang Lu pung musu dong,
sampe dong taꞌalok sang Lu.”✡ Lagu Puji dong 110:1
Tuhan Allah omong memang bagitu soꞌal Dia pung Ana, ma Dia sonde parná omong bagitu soꞌal Dia pung ana bua di sorga. 14 Dia pung ana bua dong memang pantíng. Te Dia utus sang dong, ko pi urus Dia pung orang samua yang nanti Dia kasi salamat dari dong pung sala-sala. Biar bagitu, ma Tuhan Allah pung Ana, masi lebe dari dong samua.
*1:1: a: Kata Ibrani ni, nama laen kasi bangsa Yahudi. Orang Yahudi yang parcaya sang Yesus Kristus, orang subu bilang, “orang Kristen Ibrani”, tagal dong su laen dari dong pung sodara Yahudi yang masi pegang atoran agama Yahudi yang lama.
†1:1: b: Tuhan Allah kasi tau Dia pung pasán dong, deng pake cara macam-macam. Conto ke: Dia kasi tau sang Abraham pake janji, sang Musa pake atoran agama, sang Daud pake lagu puji, sang Yeremia pake umpama.
✡1:5: Lagu Puji dong 2:7
✡1:5: 2 Samuel 7:14; 1 Sajara Israꞌel deng Yahuda 17:13
✡1:6: Carita Ulang soꞌal Jalan Idop 32:43; Lukas 2:13-14
✡1:7: Lagu Puji dong 104:4
✡1:9: Lagu Puji dong 45:7-8
✡1:11-12: Lagu Puji dong 102:26-28
✡1:13: Lagu Puji dong 110:1