JOSUA
Buku dake Josua lenge dokona Isaraele wambu dupwame yuu Kenane range dupwa pyao ralipala yuu nyiyami dokona arome pii pyasi palamo. Dopa piyaminyi dokopa akali Josua lenge dokome baa Isaraele wambu dupwa peparae iso kareya. Pii liti rema ingyuo pyasi palamo.
1. Rombo 1-12 Isaraele wambu dupwa ipwa Jotane yalo pao yuu Kenane pyao ralipala nyiyami.
2. Rombo 13-22 Yuu Kenane anamasi minyuo nyuo kunjo liti pyuo rara akalisa ipisu lama dusipana mokwa soo nyuo piyami letamo.
3. Rombo 23-24 Josua kumalana repe ingiyamo dokopa kanju lao mondo lao pyuo karena lao wambu dupwa lamaiya. Yuu lamana pii doko leyamo dokopa yuu Sikeme dokona Isaraele wambu dupwa kana minyuo Anatu keta lalu lao leyami.
1
Anatumi Josua Kando Yuu Kenane Doko Pyao Wini Pira Lao Lamaiya
Kamongona kendemande akali Mosese kumapeyamo dokopa enakana Mosesena nyiso yulu pingi akali Nanena ikinyingi Josua doko kando Kamongome pii lamaiya. Baame lamaiyuo lao, Nambana kendemande akali Mosese doko kumapya dokona epapu rapa rapa pipala embape dee Isaraele wambu peparaepe ipwa Jotane doko yalo pao yuu nambame nakama mailyunu dokona sukusa pali pupwape. Mosese lamaiyunuli pyuo nakama kimbu kimbu kalyuo eparami yuu peparae embape nambana wambu dupwanape lao retakayo, leya. Nakamana yuu liti make doko yuu muiyane dokona pisipala pao yuu Lepanone kyau dupwana suu lara. Dee ipwa andake Yuporisa lenge dokona piso pao Itai wambunya yuu peparaena piso pao neta anda pao yalyingi dorename ipwa kota pete andake Metitaraniane lenge dokona pao nakamana lili ingyara. Josua emba lete kararene yuu gii dusipana mendemepe emba nyuo isa palyuo wini pira ingya nalyamo. Namba Mosese keta pyakamyuo kareyonoli pyuo emba keta dopako pyakao kararo. Dee yuu peparae namba emba role karo emba yaki nyuo kaeyaronde daa. Embame mona kumapala yulu dokona pilyuŋu lao suu pyao kandokondali pyuo poraiyuo pepe. Dokona lao nambame nakamana rora ambasu dupwa keta yuu mairu lao lalu lao leyono dokona nakama palyuo kararaminyi dokopa emba wambu dapwana mupwa ingyuo iso karare. Dokona kando mona kumapala porai ingyuo karo nambana kendemande akali Moseseme Mawa Pii emba jiya dusipa peparae warombo soo minyuo pyuo karape. Mawa Pii peparae dupwana mende yaki nyii napipi. Dopa pyuo karo dokopa kata peparae papirinyi dupwana kapa ingyara. Embame Mawa Pii buku doko kambunya lao lao pyuo karape. Yuu peparae kukwa korakama lao mana nyepala pii dokona pyasi palamo dusipa peparae suu pyanyi pyano piso dokopa warombo sepe. Dokopa emba au pyuo keyange ingyuo elyape keta pare. Nambame emba kando, Mona kumapala porai ingyuo yulu dokona kandokondali pyuo karape lao mana langiyu kande. Dokona lao namba embena Kamongo Anatu emba anja panda parene dupwana role pyapeta paramba dokona paka nao mona nemba nao poraiyuo karape, lao Kamongome leya.
Josuame Wambu Dupwa Dopa Pinya Lao Mana Lamaiya
10 Dokopa Josuame akali mupwa dupwame wambu palyuo petaminyi yuu dokona papyuo pii lamainya lao lamaiyuo, 11 Yuu gii rema paparamopa ipwa Jotane doko yalo nakamana Kamongo Anatu dokome yuu jipyamo dokona karala paramaŋa dokona nenge lapo rapa rapa pinya lena leya.
12 Josuame akali Urupene rarape Gatena rarape dee akali Manasana rara pingyasi pakipi lamaiyuo lao, 13 Kamongona kendemande akali Mosese dokome nakama langiya kande. Doko nakamana Kamongo Anatu dokome ipwa Jotane epenge yuu neta pyakalyingi dorena nakama rangena ingyara lao jeraŋa, leya. 14-15 Nakamana enda wanepe dee mena bulamakaope dupwa dae kararaminyipa nakamana yanda singi dupwa yanda pingi bange dupwa minyuo nakamana Isaraele yango dupwa enakao epena lapala nakama nyiso wambo parami. Pao nakamana Kamongo Anatu dokome ipwa Jotane epenge yuu neta anda pao yalyingi dorena maipyamo dokona kapa pao kararami doko kandapala kaeyarami. Kapa kareyami kande doko kandapala Isaraele rara dupwa peparae nakama kapu kyuo epo ipa Jotane neta epenge yuu dorename akali Moseseme nakamba yuu rangena lao jiyamo dokona palyuo kararami, leya.
16 Leyamo dokopa nakamame Josua isingi lamaiyuo lao, Embame pii peparae namwa langilinyili pyuo pirama dee embame anja pupwa larenele pyuo parama. 17 Namwame yuu peparae Mosesena pii warombo singi dokoko suu pyao embena pii warombo serama. Dokona embena Kamongo Anatu Mosese role karenge dokoko suu pyao emba keta role pyao karena. 18 Namwana wambu dupwana mendeme embena yulu dupwana pisalya pisana pyuo dee embena pii larene dupwana lapo kamba lao pirami dupwa pyao kumakarama. Dokona mona kumapala porai ingyuo yulu doko kandokondali pyuo pyuo karape, leyami.