LIPITIKASE
Lipae Akali Dupwana Purisi Yulu
Buku Lipitikase lenge dakena purisi akali dupwana yulu pyasi palamo. Wambu dupwame mena kiso Anatu lakandarami lao wato leyaminyi dokopa rara mende Lipae lenge dokona purisi dupwa rapu pyuo kareyami. Anatumi wambu dupwa pimili yaka lao suu piyamo dupwa purisi akali dupwame wambu dupwa Anatu yulu dake pinya letamo doko mana lao kareyami. Buku dakena renge mende palamo doko Anatunya poo pyasi renge doko. Isaraele wambu dupwa Anatu lakando wambu dapwa Anatu baapa role pyao yalya kando karalu karo kararami lao renge dupwa opetae pyasi palamo.
Buku dake mendaki sipyamopape arome pii kingi paki liti pipala pyasi palamo.
1. Rombo 1-7 Mawa pii Anatu lakando mena kisingi dokona lao pyasi palamo.
2. Rombo 8-10 Eronepa ikinyingimoo dupwa pipya nakama purisi ingyuo kanda soo kareyaminyi dokopa yuu gii dokona lao pyasi palamo.
3. Rombo 11-15 Mawa pii wambo piyaminyi dupwa moŋo nyiyaminyi dokopa Anatumi namba karo peteyamosa randa jero dopa letamo lao suu piyami. Rombo dusipa dakena karo petenge mawa pii wambarae dupwa pyasi palamo.
4. Rombo 16 Anatumi Wambunya Koo Nyuo Nembakamiyamo Yuu Gii dokona lao pyasi palamo.
5. Rombo 17-27 Wambu dupwa mee yulu pyuo Anatu lakando apa pyuo poo pyasi ingyuo karalu karo kareyami lao mawa pii dupwa pyasi palamo.
Buku dakena pii malu mee palipyamopape pii kuki mende wambu ama malu mee kame see nange. Pii kuki dake rombo 19 liti 18 dokona pyasi palamo.
Yesu pii dokona lao dopa leyapya. Mawa pii mendaki ikimi mawa pii dake isa palyilyamo, leya. Nakama range kando mona retenge doko suu pyao wambu maki palenge dupwa mona reto karalapape, leya.
1:1—15:33
Rombo 1-7 dupwana Isaraele wambu dupwame bangepe mena pyao kisingipi Anatu maiyami lao palamo. Rombo 8-10 dupwana nakamame Eronemoo banya ikinyingi dupwape purisi yulu pirami lao nakamana kyawa wele kiso rombo palyuo kareyami lao palamo. Rombo 11-14 lowa lengenyili pyuo wambu dupwa poo pyasi ingyuo kareyami lao palamo. Nakamame mena rara lapo iki neyami. Lapo naa nayami. Enda dupwa nyaŋa kando nyepala apa pyuo dee au pyuo peteyami lao lowa pii lapo palamo. Dee rapa akali dupwana lao pii palamoko.
16
Anatumi Wambunya Koo Nyuo Nembakamiyamo Yuu Gii Andake Doko
Eronena ikinyingi dolapome Kamongona lenge kambu dokona isare kopetame kiso kareyambinyisa nakamba kumuyambinyipa enakana Kamongome Mosese pii lamaiya. Dopa lamaiyuo, Embame yangone Erone lamaiyuo, Panda Kamame Poo Pyasi dokona namba kopa rakapana epo Kana Minyuo Lalu Lao Lenge Pii Palenge Bokote roma dokona ketae epengeŋe dokona yuu gii angi rolae dokopa iki komau andake yukwaro karamo dokona matarena baa epapa pinya lamairi. Daaŋa lapala larono dokona palyuo pii napala kamba lara ramo doko baa pyao kumakaro. Wambo baame mena bulamakao kali dusa kanya kanyande wambunya koo dupwana kame sakaminya lao pyao kisakamyuo dee sipisipi kali doko isarena kiso mukunyi nembo maiyuo karapala dokopa Panda Kamame Poo Pyasi dokona sukusa para, leya.
Dokopa enakana Kamongome dopa pinya lamaiya. Erone baa andakare Panda Kamame Poo Pyasi dokona panya karo dokopa ipwame wate pipala purisinya komau dupwa nyuo wapwara. Komau rasisi mende wapupala dee komau keyange londe mende pee pipala dokona ketae marapu mendeme rambu lao wapu pipala komau mendeme kyawa dokona andu pinyi palyara.
Isaraele wambu peparaeme Erone mena meme kali lama wambunya koo dupwana lao pyao kiso mainyale lao maiyuo dee sipisipi kali mende isarena kiso mukinyi nembena lao maiyuo pirami. Erone baame mena bulamakao mende banya rangena koo dupwanape banya ree palunya koo dupwanape lao pyao yangara. Dokopa baame Kamongona komau anda kambu konandowame dokona mena meme kali lama nyepala minyuo para. Baame kana lama nyepala mende Kamongonaŋa lao mende Asasele lengendenaŋa lao reto pipala kana dolapo kanda nao karo mende ipyuo nyera. Ipyuo nyeramo dokopa mena meme Kamongonaŋa lao rombo palyaramo doko Eroneme wambunya koo dupwana lao pyao kisakamira. 10 Mena meme Asasele lengendenaŋa lao rombo palyaramo doko lenge rape rape Kamongo maipala yuu muiyane dokona Asasele keta mainyi nembara. Dopa piramo dokome wambunya koo dupwa nyuo nembakamira.
11 Erone baame banya ree palu dee baa rangepena koo dupwana lao bulamakao kalinde pyao kisakamyuo 12 dokopa isare pee nembenge kapa mendena isa lengya nyuo simbuo reto dee kingi kape laparaena kete pyao rendamu bange kyaa pingi mende nyuo pipala Panda Kamame Poo Pyasi dokona peparae minyuo para. 13 Papala dokopa Kamongona lenge kambu dokona bange rendamu pingi doko isarena retara. Retaramo dokopa rendamu pingi bange dokona sukwa dokome Kana Minyuo Lalu Lao Lenge Pii Palenge Bokote roma doko yambe pyara. Yambe pyaramo dokona Erone baame doko kandapala kuma nara. 14 Baame mena bulamakao kali dokona ranjama lapo nyepala kingi pambu dokome minyuo pyarenda lanyi bokote roma lenge kambusa pisara. Pisapala dee Kana Minyuo Lalu Lao Lenge Pii Palenge Bokote seramo dokona lenge kambusa yuu yanda ipingi nyepo ranjama dokome pyarendanyi pisara.
15 Pisapala baame mena memende wambunya koo dupwana lao pyapala dokona ranjama nyepala Panda Kamame Poo Pyasi dokona minyuo epo bulamakaona ranjama dokome wambo piyamuli pyuo baame bokote roma dokonape Kana Minyuo Lalu Lao Lenge Pii Palenge Bokote dokona lenge kambusa dokonape pyarendanyi pisara. 16 Yulu dopa piramo dokopa Panda Kamame Poo Pyasi doko pyuo elya pinyi retara. Isaraele wambu nakama keyange ingya nao Anatupa kamba koo lao kareyaminyisa banya Panda Kamame Poo Pyasi doko kokwa siyamisa piyamo dokona Eroneme baa dopako pira. Yuu paleyaminyi doko poo pyasi ingya napyamo sukusa dokona Anatunya komau anda karapyamosa Erone baame dopako pira. 17 Erone baame banya koope dee banya ree palunya koope Isaraele wambu peparaena koope dupwa nyuo kame sakaminya lao yulu piramo mange dokopa komau anda andakare dokona wambu mendepe pisa nara. 18 Dokopa baame Anatunya lao kana pyare lasi dokona kiso mukinyi nembo maingi doko elyape inginyi pyambuo para. Dopa pyuo dokopa mena bulamakao kalinya ranjamape dee memena ranjama lapo nyepala kana pyare pinjingi kisima siyamo dusipana raeyo reto pira. 19 Banya kingi pambu dokome ranjama doko nyepala kana pyare lasi dokona yuu yanda ipingi nyepo pyarenda lanyi pisara. Dopa piramo dokome Isaraele wambunya koo dupwame kana pyare lasi kokwa siyaminyi doko keyange inginyi pyambuo poo pyarasa pira.
Meme Mendeme Koo Dupwa Nyuo Peya
20 Eroneme Panda Kamame Poo Pyasipi Kamongona komau anda panda wakalepe kana pyare lasipi dusipana mondo lao pyuo rolo otapala dokopa mena meme mende lenge rao Asaselena rombo palyisi doko kararamopa Kamongo keta minyuo epo maira. 21 Maipala banya kingi dolapo memena ayemba dokona ketae retaro karo Isaraele wambunya yulu koope kamba lao Anatu mata maiyuo yulu pingipi polo lamaiyuo memena ayemba keta pisara. Pisapala akali mendeme meme doko nyuo lanyuo neta para lao rombo palyiyami dokome yuu muiyane dokona meme mapanyi nembara. 22 Mena meme dokome Isaraele wambunya koo dupwa nyepala paleta wambu pali nange panda keroŋo mendena para.
23 Yulu doko pyuo otapala dokopa Erone baame Panda Kamame Poo Pyasi dorena kolandalana karo purisi komau wapuyamo dupwa Kamongona komau anda dokona papala roko neta nyuo retara. 24 Retapala baame yuu poo pyasi dokona wate pipala rangena komau doko nyuo wapupala pao baa rangenape dee wambu dupwanape koo dupwana lao mena isarena kiso mukinyi nembara. 25 Baame kana pyare lasi dokona wambunya koo dupwana lao mena pyao kiso maiyamo dokona kapa rukisi dupwa kisakamira. 26 Akali mena meme Asaselena lao yuu muiyane dokona mapanyi nembala peyamo doko pao yuu paleyami dokona epana dokopa komau yanengepe wambo wate pipala sukusa kolando epara. 27 Purisi dokome mena bulamakao kali dee memepe dolapona ranjama nyepala lanyuo Panda Kamame Poo Pyasi dokona koo dupwana nyuo kame soo nembakana lao minyuo kolandeya. Bulamakaope memepe dolapona yanenge ingi minjupi dupwa peparae yuu kame netarena minyuo papala kisinyi nembara. 28 Akali kisinyi nembaramo doko yuu paliraminyi dokona kapu kyuo sukusa epana dokopa yanenge komaupi wate pipala epara, leya.
Anatumi Wambunya Koo Nyuo Nembakamiyamo Yuu Gii Andake Dokona Ee Kana Yaka Lao Yulu Pingi
29 Nakamame yuu gii doko kame see napala minyuo karalu kararami. Kana yanda ipingi dokona yuu gii akalisa dokopa Isaraele wambu rangepe dee karala papingi dupwa nakama role pyao palaminyi dupwape nenge wasaka pyuo yulu minyanda nao mee pisirami. 30 Yuu gii dokopa purisi dokome yulu Kamongome pinya leyamuli pyuo piramopa Kamongome nakamana koo dupwa nyuo kame sakaramopa elyape ingyuo kararami. 31 Yuu gii doko ama poo pyasi ingyuo sera. Dokopa nakamame nenge wasaka pyuo yulu pii nao mee imambu soo pisirami ingilyamo. Yuu peparae mawa pii dapwa minyuo kararami. 32 Akali mendeme purisi mupwana yulu pyuo karalana rakangena panda nyeramo doko nakamame rolae pyuo rombo palyuo baa Anatunya yulu iki lili pyuo pinya lao larami. Laraminyi dokopa baame wambunya koo dupwa nyuo kame sakamira lao Anatumi leyamuli pyuo pira. Dopa pyuo pinya piso dokopa purisimi komau wapungi doko nyuo pee pipala 33 Panda Kamame Poo Pyasipi Kamongona komau anda panda wakalepe kana pyare lasipi purisi akalipi Isaraele wambu peparaepe Anatunya lenge kambu dokona poo pyasi ingyuo sera lao koo dupwa nyuo nembakamira. 34 Yulu dopale dokopa yuu peparae kaeya nao pipa pyuo kararami. Purisi mupwa baame ee kana yaka lao Isaraele wambu dupwana koo dupwa nyuo kame sakamyuo Anatunya lenge kambu dokona rolae ingyuo petena lao pipa pira, leya.
Dokona Kamongome leyamuli pyuo Moseseme piya.
17:1—18:30 Rombo 17 Anatunya anda mupwa dokona iki mena pyao kiso maiyami. Dee wambu dupwame ranjamape minju ranjama paletape naa nayami, letamo. Rombo 18 dokona kata anjukunya enda akalipa rolae paleyambi lao letamo.