MALAKAE
Ee kana 500 W.K. dopale tembole anda kamba pyuo oteyaminyi dokopa enakana pii dake akali Malakae lenge dokome lao kareya. Pii mupwa doko purisi akali dupwape mee wambu dupwape Anatu role pyao kana kamba minyuo lena dopa leya. Namwa pii dake yaka laramano dokopa Anatunya wambu dupwa yame yame lao Anatu lakandelyamano lao yulu koo dupwa elya nao pyuo kareyaminyi doko namwa soo nyerama. Anatunya purisi akali dupwape mee wambu dupwape nakamana bange Anatu maipenge dupwa kaepala panga piso nakama range nyuo dee Anatunya mana leyamo doko suu pyao moko minyuo kara nao piyami. Yulu koo dupwa piyaminyipape Anatu baame banya wambu dupwa kote lala epo dokopa mona imambupi enenge palyinyi pyambwala epara. Eparamopa yuu gii dokopa wambo banya waili pii minyuo polo lenge akali dokome kata rapa rapa pyuo wambu dupwa banya kana minyuo lalu lao lenge pii doko baa pyao lao pena lara.
1
Wai pii dake Isaraele wambu dupwa lamainya lao Kamongome Malakae maiya.
Kamongome Isaraele Wambu
Mona Reteya
Kamongome lao, Nambame nakama yuu peparae mona retelyo, letamo.
Dopa pipunupape wambu nakamame isingi lao dokopa, Embame apa pyuo namwa mona retengese? letaminyi.
Dokopa Kamongome isingi lao, Iso Jekopepa ane yangongepa dokona nambame Jekope baape banya rara wambu wai kiso nyiyamo dupwa peparaepe mona retelyo, leya. Dee Iso baape banya wai kiso nyiyamo wambu dupwa peparaepe nambame awa napala Isona yuu kyau pyalya pyana pingi dupwa apa sinyi nembapala yuu doko mena rae lenge dupwa keta pyambuyu, leya Anatumi.
Isona rara Itome range wambu dupwame lao, Namwana taone dupwa kokwa siyamoko doŋo namwame kamba pirama larami. Kamba pirama larami dokopa Kamongome isingi dopa lao, Nakamame dee pinyali dokopa nambame kambako lalyinyi nembaro, letamo. Dokopa wambu wakale dupwame kandapala yuu doko koo ingilyamo, larami. Wambu rara dokona palirami dupwa Kamongome kando imbu karalu kararalyamo, larami.
Nakama Isaraele wambu dupwame doko kandapala dokopa nakamame lao, Kamongo dokome Isaraele wambunya yuu nyisarena dupwana opetaeko poraiyuo karamo, larami.
Purisi Dupwa Koo Piyamisa Kamongome Lao Nembeya
Kamongo Porai Wakasa dokome purisi dupwa lamaiyuo lao, Ikinyingimi rakange rape rape lenge kandape. Dee kendemande akali dokome banya yulu pyakamingi akali doko kando rape rape lenge kandapi. Namba nakamana rakane doŋo akipamo nakamame namba kando rape rape laa nalyamisi? Namba nakamana mupwa doŋo akipamo nakamame namba paka nalyamisi? Nakamame namba kilya kando kandelyaminyi. Kandapala piso soo lao, Apa pyuo namwame emba kilya kandelyamase? letaminyi. Dopa pyuo nenge koo dupwa minyuo epo nambana kana pyare lasi dokona kisapala dokopa dopa lao piso silyaminyi. Apa pyuo namwame emba kando paka nalyamase? letaminyi. Dokona nambana mena pyao kiso jingi kana pyare lasi doko koo ingyuo kilya kando lao karaminyi, leto. Nakamame mena lenge koope kimbu kwaengepe anga palengepe koole dupwa iki minyuo epo pyao kiso jepala dokopa nakamame doko kapa lao suu pilyamisi? Dopa pyuo mena koo dopale dupwa nakamana gapomane doko maiyuo kandalapape. Dokopa baame nakama kando rae maipala nakamana keyange mende pyakarase?
Epapu nakama purisi dupwame Anatumi namwa kando keyange pinya lao piso soo kandalapape. Dokopa nakamana ateŋa doko isingi yano pyaka nara ramo doko nakama kwaeyarami dokona pira. 10 Kamongo Porai Wakasa dokome lao, Nakama mendeme tembole anda kambu dowa doko upi lamili leto. Dopa pirami dokome nambana kana pyare lasi dokona isare dupwa mee langa kisa namili. Nambame nakama rae mai nalyo dokona nambame nakamana nenge minyuo epo jeraminyi dupwa kando rae maiyuo nyii naro, letamo. 11 Wambu yuu muu dupwana peparaeme namba rape rape lao karaminyi. Dupwana peparaeme bange rendamu pingi dupwa kiso joo dee bange rae maiyuo nyeroli dupwa jilyaminyi. Jepala peparaeme namba rape rape lao karaminyi. 12 Nakambame nambana kana pyare lasi doko kwaelyamo lapala namba ketae pyambwa nalyaminyi. Nenge awa nami dupwa kana pyare lasi dokona kiso jiminyi doko kilya kandaminyi doko kandelyo. 13 Nakamame lao, Namwame dupwana peparae ama makalyamano lapala namba kando gyaa silyaminyi. Nakamame mena minyuo epo kiso jilyamano lapala mena anga ikyane palengepe kimbu koope waa menape dupwa minyuo epo jilyaminyi. Nambame dupwa rae maiyuo nyereŋe lao nakamame suu pilyamisi? 14 Akali mendeme banya mena karenge dokona keyange mende jero lao lalu lao lapala kaeyo joo dokopa dee mena koo mende pyao kiso jera ramo baa keta koo palena leto. Dokona lao namba kiŋi andake mupwa dokome wambu peparaeme namba kando pakalyaminyi, Kamongome dopa letamo.