MATYU
Lete Wai Pyao Nyingi Akali mende eparamo dokona lao Anatu baame Ole Tesamene dokona banya wambu dupwa pipya lalu lao lao lamaiya. Dokona lao Yesu Koraisa epeyamo dokopa Anatunya pii leyamo doko angi kapa wai piya. Matyu baame banya waili pii keyange doko pyao reto Yesu baa Pyuo Nyingi Akali epo otelyamo lao lasaka piya.
Yesu baa Juu wambu role pyao kareyaminyi dupwana lao waili pii keyange doko epeyande daa. Wambu yuu muu peparaena lao waili pii keyange dake epeya.
Matyu baame banya waili pii piyamo doko poraiyuo kandokondali pyuo suu pyao pyao reteya. Kanda soo Yesu mandeyaminyi pii dokona pyao reto enakana Yesu bapitisimo nyiyamo dokope Satane baame Yesu makande piyamo dokope pii dolapona lao piya. Pyapala yuu Galili dokona Yesumi wambu dupwa Anatunya pii polo lamaiyuo mana lao wambu anga pingi dupwa pyuo nyuo kareyamo dokona lao pyao reteya. Pyao retapala Matyu baame Yesu baa yuu Galili karo Jerusaleme peyamo dokona lao piya. Yuu Jerusaleme dokona karo oo repeta kumuyamo dokopa apa piya lao dupwape Matyumi piya. Yesu baa isa mamando dokona kumuo paleya dokope dee malu anda palipala lopo epeyamo doko dupwapena lao Matyumi pyao reteya.
Matyunya Waili Pii dakena Yesu baa Mana Lenge kamame andake karenge lao mana nyilyamano. Yesu baa porainya renge palelyamopa Anatunya Mawa Pii rolae polo lamaiyuo dee Anatunya Isingi Yulu dokona lao kapa mana lamaiyuo pingi. Banya mana leyamo dupwana pii kingi paki pyasi palamo. (1) Yesu baa yuu kyau dokona piso banya wambu dupwa apa pyuo yulu pyuo pii lao rengya nyera dupwana apa pyuo pisirami lao lao mana lamaiya (Rombo 5-7). (2) Yesumi disaepole dupwa banya yulu pela neta pena lao mana lamaiya pii doko (Rombo 10). (3) Yesumi yake pandana isingi yulu dokona lao kongwalu pii lapo mana lamaiya (Rombo 13). (4) Wambu dupwa banya disaepole ingyuo apa pyuo kararami lao Yesumi mana lamaiya (Rombo 18). (5) Isa wambu karamano yuu gii doko lumwa piramopa yake pandana isingi yulu pyaka seramo doko mana lamaiya (Rombo 24-25).
Matyumi Ole Tesamene poropeta pii dupwa angi epo pyaka silyamo lao yuu malu ingyuo lapa lapa piya. Baame Yesu baa Koraisa doko Kiŋi dokoŋo, leya.
Buku Dakena Pii Palamo Dusipa
1. Yesu anja piso ingiyamo dokope Yesu Koraisa mandeyami pii dokopa 1:1—2:23
2. Jone Bapitisimo pii lao yulu piyamo doko 3:1-12
3. Yesu bapitisimo nyiyamo dokope Sataneme baa makande piyamo dokope pii dolapo 3:13—4:11
4. Yesu baa yuu Galili dokona panembena yulu pyuo kareya 4:12—18:35
5. Yesu baa yuu Galili dokona karo Jerusaleme peya 19:1—20:34
6. Koro mendakinya Yesu yuu Jerusaleme repeta karo enakana kumuya 21:1—27:66
7. Yesu Koraisa baa lopo epeya dokope pano banya puu minyingi dupwa lasaka piya dokope 28:1-20
1
Yesunya Rora Ambasupi Ingyuo
Epeyamo Dupwa
(Lu 3:23-38)
Pii pyasi dake Yesu Koraisana rora ambasu dupwana lao pyasi palamo. Yesu baa Dapitinya rara dokona dee Dapiti baa Aporakamena rara dokona.
Aporakameme Aisake manjo, Aisakame Jekope manjo, Jekopeme Jutamoo banya yangonge dusipa pipya manjo piya. Jutame enda Tama nyepala Peresapa Sarapa manjo, Peresame Esorone manjo, Esorone Oramo manjo piya. Oramome Aminatape manjo, Aminatapeme Nasone manjo, Nasoneme Salomane manjo piya. Salomaneme enda Oreapa nyepala Boasa manjo, Boasame enda Uruti nyepala, Opeta manjo, Opetame Jese manjo piya. Jeseme Dapiti kiŋi akali doko mandeya.
Dopa pipala Dapitimi Yuraya kumuyamo dokona enda waiya nyepala Solomone mandeya. Solomoneme Oriapome manjo, Oriapome Apaisa manjo, Apaisame Esa manjo, Esame Jiosapata manjo, Jiosapatame Jorama manjo, Joramame Usaya manjo piya. Usayame Jotame manjo, Jotameme Easa manjo, Easame Esekaya manjo piya. 10 Esekayame Manasa manjo, Manasame Emosa manjo, Emosame Josaya manjo piya. 11 Josayame Jekenayamoo yangonge dusipa pipya manjo piya. Dopa piyamopa yuu Bapilone range dupwame Juu wambu pyao anjo lanyuo peyami.
12 Yuu Bapilone dokona pyao anjo lanyuo peyaminyipa kareyaminyi dokopa Jekenayame Siatiele manjo, Siatieleme Serapapele manjo piya. 13 Serapapeleme Apiata manjo, Apiatame Elayakimi manjo, Elayakimimi Eso manjo piya. 14 Esome Saitoko manjo, Saitokome Ekimi manjo, Ekimimi Elayata manjo piya. 15 Elayatame Eliesa manjo, Eliesame Matana manjo, Mataname Jekope manjo piya. 16 Jekopeme Josepe mandeya. Dokopa enda Mariame Yesu kingi Koraisa lenge doko mandeya. Enda doko Josepeme nyiya.
17 Aporakame kareya dokona piso rakange akalisa mendaki ipisu kisima karo kumuo peyami dokona epo Dapiti mandeyami. Dee Dapiti kareyamo dokona piso epo yuu Bapilone dokona Juu wambu dupwa pyao waiku nyuo lanyuo peyami dokona rakange akalisa mendaki ipisu kisima karo kumuo peyamioko. Dokona piso rakange akalisa mendaki dee ipisu kisima ando karo papeyami dokona epo Yesu mandeyami.
Yesu Koraisa Mandeyami Pii Doko
(Lu 2:1-7)
18 Yesu Koraisa mandeyami doko dopa pyuo mandeyami. Josepeme Maria ene nyelana mokoriya pyao kareyamo dokopa Imambu Poo Pyasimi renge kuiyamosa wane rombanda palyamo lao Mariame soo peteya. 19 Josepeme Maria mokoriya piyamo doko elya maiyuo pano daa laro ramo doko elyara lao suu pyapala yalu pyuo nembaro lao suu piya. 20 Dopa piru lao suu pyao kareyamo dokopa Kamongona aŋala mende kombeyame epapala baa lamaiyuo, Josepe Dapitinya para pyasi embena enda Maria wane petamo doko Imambu Poo Pyasimi renge kuiyapya dokona nyerono lao paka napipi. 21 Baame wane mende manjiramopa wane dokome banya wambunya koo dupwa raka lanyi nembo pyuo nyera dokona embame banya kingi Yesu lare leya.
22 Dopa piraŋa lao Kamongo dokome poropeta akali keta leya dokona palyuo pyaka siya. 23 Doko enda mapwae mende wane pisaramopa wane mende manjira dokopa banya kingi Imanuele larami leya. (Kingi Imanuele doko Anatu namwa pipya role pyao karamo dopale.)
24 Josepe lenge rapala dokopa Kamongona aŋala dokome leyamuli pyuo Maria nyepala kaeya. 25 Nyiyamopape enda wane manjapa naya dokopa role pyao palipa nayambi. Enakana wane kando nyiyamo dokopa Josepeme kingi Yesu leya.