OROME
Poleme pepa dake yuu Orome Elyambu Pingi wambu dupwa banya pii selana rapa rapa pyuo kararaminyipa paroŋo lapala pyao maiya. Polena suu pingi angi doko Kurisene wambu yuu Orome karenge dupwa pipya yuu gii lapona rale pyao yulu pipala enakana yuu Sipane dokona Anatunya yulu pela paro dokopa Orome Kurisene wambu dupwame namba nyiso ateŋa lakao kararami lao suu pyapala piya. Leta piyamo doko Kurisene wambu dupwame apa pyuo Anatunya pii soo nyepala Yesu kapa ingingi lao suu pilyaminyi dokona lao polo lamaiyuo pyao reteya. Pyao retapala baame Kurisene wambu dupwa mona kapu kyepala Yesu kapa ingingi lao suu pyapala apa pyuo yulu pyuo pii lamaiyuo kararami doko dopale lao pyao reteya. Buku dakena Polena misi pii leyamo dokona renge angi lapo andapyuowale kyawa pyara pyara pyuo pyasi palamo.
Pole baame Orome wambu dupwa yako lapala nambame nakamana lao loma sakao karenge lamaiya. Lamaipala baame renge angi paleyamo buku dake piya doko polo lamaiya. Anatunya waili pii keyange dokome namwa apa pyuo banya lenge kambu dokona rolo kararami lao lasaka pyuo karamo. Doko wambu Anatu kapa ingingi lao suu pingi kata dokome iki rolae ingyuo parami. Kata wakale mendeme rolae ingyuo paa narami, (1:17) leya.
Poleme angi renge paleyamo buku dake piyamo dokona pii lama opetae konda konda pyuo leya. Juu wambupi Juu daa rara wakale wambupi dupwa koo dokona isarena piso oteyami. Dokona lao nakama peparae Anatupa rolae ingyuo parami ingyara doko Yesu Koraisa kapa ingingi lao suu pyarami ingilyamo, leya. Wambu dupwa Anatupa rolae ingyuo karo Yesu pipya pakapala lete karalu karenge enenge doko nyilyaminyi lao piya. Kurisene angi dupwa Anatupa mona kyuu lao sipyamopa Anatunya Imambu Poo Pyasinya porainya renge dokome koo kumunginya renge dokona kiiramo nyiyamo epasi karaminyi, leya. Rombo 5-8 Pole baame Anatunya Lowa dokome aki yulu pingipi dee Kurisene wambunya monarena dokona Anatunya Imambu Poo Pyasi dokome apa pingipi polo lamaiya. Juupi Juu daa rara wakalepe laparae apa pyuo Anatumi nyisaro lao rapa rapa piyape lao Poleme leya. Wamba Juu wambu dupwame Yesu mata maiyaminyi doko kata wapuli lakamiyamisa wambu rara wakale dupwame Anatunya kata kando nyilyaminyi, leya. Juu wambu dupwame dopako pyuo Yesu mata maiyalu maiya narami, leya. Poleme pii lao oto lao dokopa Kurisene wambu dupwame Kurisene yango mona reto anjiki pyuo nyiso kararami, lao piya. Kurisene wambu dupwame Anatunya yulu pyakamyuope gapomanena pii warombo soope dee wambu yango kando anjiki pyuo rape rape lao nakamana suu pinginya rolaeŋe lao letamo kalyinyi nemba nao kararami lao piya. Pii dake lao lumwa pyuo pyao dokopa baame wambu dupwa yako lao kingi doko lakando pyuo ote leya.
Buku Dakena pii Palamo Dusipa
1. Pii kanda soo lengepe dee buku dakena renge angi paleyamo kyawa nyuo piyamo dokope palamo 1:1-17
2. Wambu dupwa kiiramo eparami kata doko yangeyamo kareyami 1:18—3:20
3. Anatu baame kata wapuo kiiramo nyiya 3:21—4:25
4. Yesu keta wambu lete karenge renge nyilyaminyi 5:1—8:39
5. Isaraele dupwa Anatumi panda rapa rapa pyakamiya ingilyamo 9:1—11:36
6. Kurisene wambunya yulu angi doko 12:1—15:13
7. Pii lao ote pyuo dokopa wambu lapo yako lao pyuo leya 15:14—16:27
1
1 Namba Pole Yesu Koraisana kendemande ingyuo Anatunya waili pii keyange doko lare lao rombo palyuo nembeyamo dokome pepa dake pyao jilyu.
2 Anatumi waili pii keyange dake nyerami lao lalu lao lapala banya poropeta akali dupwa lamaipala, buku Baepole poo pyasi dokona pyao retena leya. 3 Waili pii doko banya Ikinyingi namwana Kamongo Yesu Koraisa doko baa mee isa wane ingyuo kiŋi Dapitinya rora ambasupi ree palu dokona manjo nyiyami dokonasa letamo. 4 Anatu porayapala Yesu lete minyalyuo nyiyamo dokome Yesu baa Anatunya Ikinyingi isa komba pyao poo pyasi karenge doko paneyamo silyamano. 5 Dokona lao Anatumi Yesu keta namba Pole doko aposele inginyi pyambuya. Koraisana reke lao yuu muu dupwana wambu rara peparae baa kapa ingingi lao suu pyapala warombo soo kararami lao mana pii lamailyu. 6 Dopa piyamo doko nakama yuu Orome range dupwa opetaeko Yesu Koraisana ingyarami lao Anatumi kee lao sukusa nyiya.
7 Anatumi nakama yuu Orome range banya wambu angingyuo kyakale lao nyiyamopa baa mona reto karaminyi dupwa nakama pepa pase dake pyao jilyu. Namwana Rakane Anatu Kamongo Yesu Koraisapana mona keyange palyuo ipingi rengepe mona kyuu lao singi rengepe nakama keta jinya leto.
Ateŋa Lao Sangyu Leya Pii Doko
8 Nakama Yesu kapa ingingi lao suu pyao karaminyi doko yuu muu dupwana lao raeyaminyisa silyaminyi dokona nakama peparaena lao Yesu Koraisa keta Anatu sangyu lao karo. 9 Namba Anatu iki lao suu pyao karapala banya Ikinyingi dokona lao waili pii keyange kaeya nao lao karo. Namba kinyi kinyi yuu peparae nakama suu pyao ateŋa lakao karo doko Anatumi soo karamo. 10 Anatumi kapa lao suu pyapala nambana kata wapwakara ramo doko namba nakama waiya lao kandala eparo lao suu pyapala ateŋa lao karo. 11 Nambame nakama dakepa kandowane lao suu pilyu. Epapala imambunya yulu dokona renge keyange lapo polo langirunupa nakama Kurisene yulu dokona porainyi pyambwara. 12 Pii suu pyao leto doko dakesa laro. Anatu nambame kapa ingingi lao silyunuli pyuo nakamba langirunu dee nakambame silyaminyili pyuo namba langirami. Dokopa nambame laro dokome nakama nyiso, nakamame larami dokome namba nyiso pira.
13 Yangonemoo namba yuu malu epana mali soo karapunupa kata rokwapa pilyamoŋo lao langilyu. Namba waili pii keyange polo lamaiyunupa Juu daa rara wakale dupwame mona Anatu maiyaminyi doko suu pyao nakama opetaeko kata dokonako pumili lao suu pilyu. 14 Wambu peparae gapomane lowa singi see nangepe sukuli yulu singi see nangepe mana lamairunu doko nambana yulu palamo. 15 Dokona lao Anatunya waili pii keyange dokona nakama yuu Orome range dupwa opetaeko langyalana suu pyao karo.
Yesunya Waili Pii Keyange Doko Porai
16 Yesu Koraisana waili pii keyange dokona namba lalana elya nalyo. Banya waili pii keyange dokona porainya renge dokome Anatumi wambu baa mona mairami dupwa pyuo nyepa pingi. Juu dupwa wambo nyepala Juu daa rara wakale dupwa opetaeko pyuo nyera ingilyamo. 17 Anatumi waili pii keyange dokome namwa apa pyuo banya lenge kambu dokona rolo kararami lao lasaka pyuo karamo. Doko wambu Anatu kapa ingingi lao suu pingi kata dokome iki rolae ingyuo parami. Kata wakale mendeme rolae ingyuo paa narami. Anatunya buku Baepole lao, Mendali kapa ingingi lao suu pyara dokome Anatupa rolae ingyuo paramo dokopa baa letena renge nyera letamo.
Anatu Mata Maiyuo Koo Pingi Pii Doko
18 Anatunya imbu singi yake panda piso neta epelyamo yulu koo dokonape isa wambu koo pyuo banya pii kinyi dupwa kalyamo karaminyi dupwa ketape pano epo palamo lao kandelyamano. 19 Anatu apiyakale lao nakama silyaminyi. Baame lasaka piyamopa soo nyiyami dokona yulu koo pimisa randa maiyuo karamo. 20 Namwa Anatu lengeme kanda nayamanopa baa yuu wasiyamo dokona piso epo dakepape neta renge ingyuo porai wakasa karalu karenge ingilyamo doko panelyamo. Baa bange peparae wasiyamo dokome baa angi apiyakale doko panelyamo. Dokona ingyuo namwa baa see nayama larama dokona kata mende pali nalyamo. 21 Nakama Anatu kando sepalape baa angi lakando lapengele doko kaepala sangyu lao kara nalyaminyi. Dopa piraminyiŋi doko suu pyao nakambana suu pingi dupwa kopyali ingyalu ingyuo ingyapyamopa nakamba suu pingi doko kwaeyo eŋa paa napyamopa petaminyi. 22 Nakambame range kando mona palenge lao suu pyaminyipape nakamba mee kopyali ingyuo pelyaminyi. 23 Anatu karalu karenge doko ketae pyambuo lakandarami doko kaepala nakamba mee bange lapo isa wambupi mena yaka kaupi dopale lapo wasapala dupwa ketae pyambuo kingi letaminyi.
24 Akali dupwa kopyali ingyuo pyuo karamisa suu pinginya koo andake pimwalimi kumami dokona Anatumi kapa pinya lapala yaki nyuo kaelyamo. Nakama akali yango sukusa yulu koo pii naramili elya pingi dupwa pyuoko karaminyi. 25 Anatu lao pii kinyi doko alowa pyuo kyambo inginyi pyambwapala karo Anatu dokona iki lakandapenge doko kaeyapala baa bange wasiyamo dupwana lapo nyepala karo mona kando kingi letaminyi. Doko kaeyapala bange angi wasiyamo doko baa iki lakando karalu karamana kinyi.
26 Wambu dopa pilyaminyisa Anatumi yulu koo dupwa maso pundapala pyuo karena lao yaki nyuo kaenge. Enda dupwa opetaeko akalipa paenge doko suu pyao enda yango sukusa yulu pii nange kata dokona palyuo koo pingi. 27 Dopako pyuo akali dupwame endapa role pingi doko kaepala mona rakusi relyamosa akali yango pipya kepo pyalana pingi. Yulu koo yango sukusa pilyaminyi dokona bakimi pyuo koo renge dokome nakama keta randa nyuo karaminyi.
28 Akali dupwame Anatu dokona lao suu pyaa nalyamisa Anatu baame nakamana suu pingi doko kwaena lao kaeya. Dokona lao nakama lao nakama yulu pii naramili dupwako pingi. 29 Nakama yulu kamame koo pyuo nyipuli nyipuli lao suu pyao mendali kando koo piminyi dupwame palyuo pyoko pyoko lapyamo karaminyi. Yango koo palyuo wambu pyao kumakao pyakando pyuo panga sepala soo wambu mendali langa pyalana suu pyao karenge yulu dupwame palyuo simbwapyamoko pyuo karaminyi. 30 Nakama mendali kando koo pipya lao lapona kingi dupwa koo keta palyuo lao papyuo karenge. Nakama Anatunya yanda pimwai ingyuo karo kyawa sisingi pali napala moŋokyaŋe soo rangena kingi ketae pyambuo lao karaminyi. Apa pyuo koo pirama lao kata dupwanako koto nyuo endangi rakangepena pii kamba lao pyuo karenge. 31 Nakama kepo pingi yulu pyuo, pii lao kana minyingi pii dupwana kapa moko minyuo pii nange. Nakama mendali kando sakawape dee anjiki pingi yulupi pii nangeko. 32 Anatunya mawa pii dokome lao dokopa wambu yulu dopa pyuo pingi dupwa kumarami ingilyamo letamo doko silyaminyi. Sepalako karo kata koo dupwanako pyulu pyuo pilyaminyi. Dee wambu lapo koo pilyaminyi dokona mee kyanyi kando karaminyi.