4
Ve sanene, wolai lala a vineu lala, popon amiu asum̃al m̃arera sanene e kieta Sup̃e. Nepisa sanene vanon nesitom amiu, sineun amiu pap̃isi, amiu akila inu nekekara keviu, nop̃arwarin amiu pap̃isi, ana sineun nesape yoko wo van amiu silaga.
Visena kiena yeririna p̃asia
Nemloge piowa komin nepisu sane monar nevis ve tokaki van kieta sira lua nene, Yuotia amio Sintike. Lalua apis vitawa pan la pap̃isi, ana nepisa pan amiu sane sineun lalua monar akila kiela sitomena vito ga tano, vim ve taaga vatanon kieta Sup̃e. Sira lua nene, nanua nemiyum̃ae veraga nemio la po pap̃isi, amio m̃ena yaru nene Klemen amio yar tap̃ena lala, nap̃a mop̃aryon lologena wo pano-o imimi punu ga kiamimi sitomena taaga ga. Nekilia sane kia kiena ne yeririna nayum̃aena punu ga nene asiriar sike pa e tus na malena rui, ana pogos nap̃a amlip̃ere la sina, nemloge piowa pap̃isi. Ve sanene, kiau naviunena tai van ko ne, kiau erau nap̃a nanua sumo tepe yar na yum̃aen veragaena konua rui pimi. Neviun tan ko vena ko na oiila sira lua nene vena aim ave erau wo sina ga.
Visena na iilarena lala
Ana kiau visena si tai van amiu punu ga, nesape amiu akekara e Sup̃e, akekaran naga silau. Pogos nap̃a alual pog m̃arera, ava ruru ga, akila sa nap̃a yar la avisu kilale sane kiamiu sitomena la piayavi ruruia. Akilali nap̃a asitom̃al lue ga sa nap̃a ve ve piavi re na, Sup̃e wasup̃e sina. Amiu ve akila re sinemiu la pepen sur lala, a e sur ya la nap̃a imi kate e kiamiu malena, avisa sip̃a van Ntewa vanonia. Avisawal vania e sur ya nap̃a apilasinia, aleninia, atagin vania, ana nanene monar akila silau e sitomena na visaen potena.
Ana pogos nap̃a aligan sur punu ga e limana sanene, yoko avisu nap̃a Ntewa yoko ligan kiena sum̃are e amiu, iila amiu. Kiena sum̃are nene keviu pap̃isi, kilia kila wo vap̃isi van ita taulu ya nap̃a tekilia tesitomia, vano-o kila nap̃a uarar ruru sineta po kieta sitomena vena m̃arera e Sup̃e Yesu.
Wolai lala a vineu lala, lavis nevisa make kiau visena van amiu narui, ana nesape neiilaar amiu vena kiamiu sitomena la ulen ga sur la nap̃a Ntewa sinenania. Sur ya na pe lelaga, po sur ya na mon metava, po sur mesmes ya, po sur merarava ya, po sur nowo ya, po sur ya navinaiaiena, po sur ya na yeluarena, po sur tap̃ena ya napo, nanene kana sur ne la nap̃a po asulue ga e kieta sitomena lala. Naga nene pe p̃elaga la nap̃a nop̃aryon ke vena neviani amiunia, pona atol tan inu, pona metavania, apisu e kiau malena. Ana visae avisu sane pe lelaga sane p̃elaga wo lap̃as nene sike e kiau malena, nemiye awis pan amiu vena amiu m̃ena aligan ruru e kiamiu malena lala. Ana visae akila sanene, nemlelaga sane kieta Ntewa nasum̃areena yoko sike amio amiu, iila amiu.
Potena e nalaena
10 Nesape nevisa van amiu nesape pupia kekarena pan inu, sane yam piavi li m̃a ga pe nepisu re sur tai poli, p̃isi na netol ga narin nalaena nap̃a amligan pimi. Nemlelaga sane asitom in m̃a ga, ana nekilia sane amiu pe mrapa re ga nap̃a akilia akila sur imi tol inu e nini poli. Ana pogos nap̃a nepisu kiamiu nalaena nene, nepisu sane kiamiu sitomena naiilaena kiau yum̃aena mal sina ga, ana nemiyeluar Ntewa vanonia. 11 Nepisa sanene, a pe naga re ga nap̃a sane nepisape pe kiau sur re poli, vanon sur nene nep̃arpoyo e rui, sane sur ya na vim katen inu, po nesike sanape, nekekaran ga. 12 Nesike tano po nesu metava, visokar inu po kau kinanena moki, lum̃au korena po lum̃au pule, in na nokom e sur la punu nene rui. Pog viowa pona pog wo, ana mrapa kien Ntewa navawarpoen ea teke ne, a naga pian inu ea, kila nep̃arpoyo e sur la nene rui. 13 Ve sanene, nanagane na nepisu sane nekilia netaulu sur la punu ga nap̃a p̃isina vim e inu, nane e pupia puriukawaena nap̃a Kristo kila ke nem̃arera ea.
14 Nesape nevisa sanene, amiu nae Pilip̃ae, asitom na iila inuena e pog m̃arera la ne sanene, amiu ape lemam pap̃isi ne. 15 Sa nap̃a apisulup̃ar pa rui, pogos nap̃a nesiar kiau nayalinen lologena wo nene, pogos nap̃a nepetan M̃asitonia nepano, pe sum̃are re nena tai nap̃a miila inu, peraga, amiu ga. In na nep̃ar sur wo la moki pan la pap̃isi, a pe lala yar re tai nap̃a sitom sape ligan sur tai vim poli vena iilaen kiau mrapa pona kiau yum̃aena. 16  Yum̃aena 17:1 2Kor 11:9Ana amiu apo pap̃isi, pogos nap̃a lum̃au plasia amiilala inu, amligan nalaena la pimi pan inu yam mok li m̃aga, pano tol pogos nap̃a nepa nemiyum̃ae ke gare gar Tesalonaika. 17 Nepis ke sanene, pe naga re ga nap̃a nesape nowar lue nalaena la poli, ana vanon nap̃a sineun nevisu naiilaena la molue e sum̃are lala na iilaena yum̃aena kiena Sup̃e. Nanene vanon sane visae akila wo sanene van yar tap̃ena lala, ana kiamiu p̃elaga wo nene yoko war mrasa, kila sur punu ga wo laa sane van amiu sina ga. 18 Vanon nagane, nepisa potena pan amiu pap̃isi e nalaena la nap̃a apitetalia Epaprotaetas p̃ar pimi, netol la punu pa rui. Nalaena la nene pimi, pa taulu ya nap̃a sineunia, ana nepisu sane nanagane po laa pan inu. Kiamiu naiilaena la nene, sane ponotaninu tai nap̃a ponos po pap̃isi, la sane kup̃ap̃aena tai nap̃a akila pan Ntewa naga pisu po pap̃isi, kekarania. 19 Ana nekilia sane visae limamiu plas pogos tai, yoko kiau Ntewa visuvevea lue ga, vanon Yesu Kristo kila pa rui nap̃a naurarena lala kiena ne Ntewa nae mae peni akeviu pap̃isi. 20 Sanene, yoko tesum̃a teyeluar kia kiena ne arimata Ntewa silau, yoko teyeluar m̃a naga vano-o ve p̃isi re pogos tai, sanene.
Visena maro
21 Aliganlelein kiau visena nene van li nalelagaena wa lala nap̃a asike ne, avisawal van la apisape nesitom̃al la ke silau. Wolai tap̃ena lala amio vineta tap̃ena lala nap̃a asike amio inu e nini, lala m̃ena asape avisa pokolulagi po pokolemalo van amiu. 22 P̃as si naliganen visena sanene im̃asu van amiu, nane li na lelagaena wa la punu ga e nini, amio m̃ena la nap̃a amiyum̃ae kiena p̃arin sup̃e nene Sisa e m̃ana pupia yum̃a nene.
23 Kiau leniena, sane lemamiena kiena ne Sup̃e Yesu Kristo sike e ninumiu lala, sike likan amiu silaga.
Inu, Pol.

4:16 Yum̃aena 17:1

4:16 2Kor 11:9